ބެންގާލު ކަނޑުގައި އުފެދުނު ތޫފާން ފެންގަލްގެ ސަބަބުން އިންޑިޔާ އާއި ސްރީލަންކާގައި 19 މީހުން މަރުވެއްޖެއެވެ.

ރޮއިޓާސް ނޫސް އޭޖެންސީން ރިޕޯޓުކުރި ގޮތުގައި މި ސައިކްލޯން ހޮނިހިރު ދުވަހު އިންޑިޔާގެ ދެކުނު ސަރަޙައްދަށް އަމާޒުވެ، ތަމިލްނާޑޫ ސްޓޭޓާއި ޕުދުޗެރީ ސަރަޙައްދުގައި ވަނީ ފެންބޮޑުވެފައެވެ.

އިންޑިޔާގެ މޫސުމާބެހޭ އޮފީހުން ސޯޝަލް މީޑިއާގައި ހާމަކުރި ގޮތުގައި ޕުދުޗެރީގައި ވޭތުވެދިޔަ 30 އަހަރުގެ ތެރޭގައި 24 ގަޑިއިރުގެ ތެރޭގައި ވާރޭ ނުވެހޭވަރަށް މިތޫފާނުގައި ވަނީ ވެހިފައެވެ. އަދި ފެންގަލް ގެ ސަބަބުން  ދެކުނުގެ ސިޓީ ޗެންނައިގެ ބައެއް ސަރަޙައްދުތަކުގައި ފެންބޮޑުވެފައިވާކަމަށް ވެސް ކަމާ ބެހޭ ފަރާތްތަކުން ރިޕޯޓްކުރެއެވެ.

Advertisement

ތޫފާނާއި ގުޅިގެން ޗެންނައިން ވައިގެ ދަތުރުތައް ވަގުތީގޮތުން ހުއްޓާލުމަށްފަހު ވައިގެ ދަތުރުތައް އަލުން ފަށާފައިވަނީ މިއަދުގެ ފަތިހުގެ ވަގުތެއްގައެވެ.

ދައުރުވަމުންދާ ވީޑިއޯތަކުން ވަރުގަދަ ވައި އާއި ބޯކޮށް ވެހޭ ވާރޭގެ ސަބަބުން މަގުތަކުގައި ފެންބޮޑުވެ، މީހުން ސަލާމަތްކުރުމަށް އޮޑިދޯނިފަހަރު ބޭނުންކުރާ މަންޒަރު ފެނިގެންދާއިރު، އިންޑިއާގެ ސިފައިން ވަނީ ތޫފާނުގެ އަސަރު ކުރި ސަރަޙައްދުތަކުގައި، ޚާއްޞަކޮށް ޕުދުޗެރީގައި އިމަޖެންސީ އެހީތެރިކަމުގެ މަސައްކަތްތައް ކުރަމުންނެވެ. 

ފެންގަލްގެ ސަަބުން ސްރީލަންކާގައި 16 މީހުން މަރުވެފައިވާއިރު، ކޮލަންބޯގެ ޑިޒާސްޓަރ މެނޭޖްމަންޓް ސެންޓަރުގެ އެންމެ ފަހުގެ ތަފާސްހިސާބުތަކުން ދައްކާގޮތުގައި ޖުމްލަ 138,944 ޢާއިލާއަށް ތޫފާނުގެ އަސަރުކޮށްފައިވެއެވެ.