ފެނަކަ ކޯޕަރޭޝަނުގެ މެނޭޖިންގ ޑިރެކްޓަރުކަމުން މުއާޒް މުހައްމަދު ރަޝީދު އިސްތިއުފާދެއްވައިފިއެވެ.

މުއާޒް ވަނީ އޭނާ މަގާމުން އިސްތިއުފާދެއްވި ސިޓީ އެކްސްގައި ހިއްސާކުރައްވާފައެވެ. އިސްތިއުފާގެ ސިޓީގައި މުއާޒް ވިދާޅުވެފައިވަނީ، ހުރި ގޮންޖެހުންތަކާއެކުވެސް ކުންފުނިން ފޯރުކޮށްދެމުންދާ ހިދުމަތްތައް މެދުނުކެނޑި ދިނުމަށް ފާއިތުވެދިޔަ އަހަރެއްހާ ދުވަހުގެ ތެރޭގައި ކާމިޔާބު މަސައްކަތްތަކެއް ކުރެވިފައިވާކަމަށެވެ. 

ކުންފުނިތަކަކީ އުސޫލެއްގެ ގޮތުން އެކުންފުނިތަކަށް ލިބޭ އާމްދަނީއަކުން ހިންގުން ބައްޓަން ކުރަންޖެހޭ ތަންތަނަށް ވީނަމަވެސް ފެނަކަ ފެނަކައަށް ދިމާވެފައިވާ މާލީ ހާލަތުން އެކަން އެގޮތަށް ކުރުމަކީ މުސްތަހީލް ކަމެއްކަމަށެވެ.

- އަތޮޅުތެރޭގެ އިންޖީނުގެތަކުގެ މެއިންޓަނަންސް ރަނގަޅަށް ބަލަހައްޓާފައި ނުވުމުން އެކަން ބޮއްސުންލައިގެން ދިއުން

- ކުންފުނީގެ ދަރަނީގެ ގޮތުގައި 4.3 ބިލިއަން ރުފިޔާ އޮތުން

- ކުންފުންޏަށް ބޭނުންވާ ވަރަށްވުރެ އިތުރަށް މުއައްޒަފުން ތިބުން

- ކުންފުނި ރަނގަޅުކުރުމަށް ސަރުކާރުގެ އިދާރާތަކުގެ އެއްބާރުލުން ނުލިބުން

- ލިބޭ އާމްދަނީއަށްވުރެ ކުރަންޖެހޭ ހަރަދު އިތުރުވުން

މުއާޒް ވިދާޅުވީ ފެނަކައިގެ ހާލަތު ކިތަންމެ ދަށުގައި އޮތްނަމަވެސް ވޭތުވެދިޔަ އަހަރެއްހާ ދުވަހުގެ ތެރޭގައި ކުންފުނީގެ ހިންގުން ހަރުދަނާކުރުމަށް މުހިއްމު ފިޔަވަޅުތަކެއް އެޅިފައިވާކަމަށެވެ. މިގޮތުން ވޭތުވެދިޔަ އަހަރެއްހާ ދުވަހުގެ ތެރޭގައި ކުންފުނީގެ ހަރަދުތަކުން 160 މިލިއަން ރުފިޔާ ސަލާމަތްކުރެވިފައިވާކަމަށް މުއާޒް ފާހަގަކުރެއްވިއެވެ.

މުއާޒް ވަނީ ފެނަކައިގައި އުފެދިފައިވާ ދަރަންޏަށް ބަލާއިރު ހަމައެކަނި ހިންގުމުގެ ހަރަދު ކުޑަކޮށްގެން މިހާރު ވެއްޓިފައިވާ ހާލަތުން ކުންފުނި ސަލާމަތް ނުކުރެވޭނޭކަން ސިޓީގައި ފާހަގަކުރައްވާފައެވެ. ފެނަކަ ދަރަނިން ސަލާމަތްކުރުމަށް ތައްޔާރުކުރި ޕްލޭން ސަރުކާރުގެ ކަމާގުޅޭ ފަރާތްތަކާ ހިއްސާކުރިނަމަވެސް މިކަމަށް އަލިމަގެއް މިއަދާ ހަމަޔަށް އާއިރުވެސް ފެނިފައި ނުވާކަމަށާއި އަދި ފާއިތުވި އޮކްޓޯބަރު އަދި ނޮވެމްބަރުމަހު މުސާރަ މުއައްޒަފުންނަށް މަސް ފެށުނުއިރުވެސް ޖަމާކޮށްފައި ނުވާކަމަށް މުއާޒްގެ ސިޓީގައި ވިދާޅުވިއެވެ. މިއީ މީގެ ކުރިން ފެނަކަ ދުށް ކަމެއް ނޫންކަމަށްވެސް މުއާޒް ވަނީ ފާހަގަކުރައްވާފައެވެ.