ފެނަކައިން އިސްތިއުފާ ދެއްވުމަށްފަހު ޤައުމުދޫކޮށް ފިއްލަވައިގެން އުޅުއްވާކަމަށް ދެކެވޭ ވާހަކަތައް ފެނަކައިގެ ކުރީގެ މެނޭޖިންގ ޑިރެކްޓަރު މުއާޒް މުހައްމަދު ދޮގުކުރައްވައިފިއެވެ.

މިދިޔަ ހޯމަދުވަހު ފެނަކައިގެ މެނޭޖިންގ ޑިރެކްޓަރު މުއާޒު މުހައްމަދާ ގުޅޭގޮތުން ސަރުކާރަށް ނިސްބަތްވާ ސިޔާސީ ބައެއް ފަރާތްތަކުން ސޯޝަލް މީޑިއާގައި ގެންދަނީ އޭނާއަށް ނިސްބަތްކުރައްވައި ތަފާތުއެކިއެކި ތުހުމަތުތައް ކުރައްވަމުންނެވެ. މިގޮތުން އެއްބަޔަކު ވަނީ ފެނަކައިން އިސްތިއުފާ ދެއްވުމަށްފަހު އޭނާ ފިއްލަވާފައިވާކަމަށް ތުހުމަތުކޮށްފައެވެ.

މިކަމާ ގުޅޭގޮތުން އެކްސްގައި ކުރެއްވި ޕޯސްޓެއްގައި މުއާޒް ވިދާޅުވީ ފިލަންޖެހޭވަރުގެ ކަމެއް ކޮށްފައެއް ނޯންނާނެ ކަމަށާއި، އޭނާ މިވަގުތު ހުންނެވީ އާއިލާއާއެކު ބޭސްފަރުވާއަށް އަވައްޓެރި އިންޑިއާގައި ކަމަށެވެ. މިގޮތުން ވަރަށް އަވަހަށް ރާއްޖެ ވަޑައިގަންނަވާނޭކަމަށްވެސް މުއާޒް ވަނީ ވިދާޅުވެފައެވެ.

Advertisement

ފެނަކައިން މުއާޒު އިސްތިއުފާދެއްވީ އޭނާގެ ކޮރަޕްޝަން ކަންތައްތަކެއް ފެންމަތިވުމުންކަމަށް އިސްތިއުފާ ދެއްވި ދުވަހުން ފެށިގެން ބައެއް ފަރާތްތަކުން ދަނީ ސޯޝަލް މީޑިއާގައި ވާހަކަދައްކަމުންނެވެ. މީގެ ތެރޭގައި ސަރުކާރަށް ނިސްބަތްވާ އެކްޓިވިސްޓުން ހިމެނެއެވެ. އެ ވާހަކަތަކަށް ރައްދު ދެއްވަމުން މުއާޒު މީގެކުރިން އެކްސްގައި ކުރެއްވި ޕޯސްޓެއްގައި ވިދާޅުވީ، އިސްތިއުފާދިނީ ސަރުކާރުން އޭނާގެ މައްޗަށް އެފަދަ އެއްވެސްކަމެއް ތުހުމަތުކޮށްގެން ނޫންކަމަށެވެ. ބައެއް ފަރާތްތަކުން މުއާޒަށް ނިސްބަތްކޮށް ދައްކަމުންދާ ވާހަކަތަކަށް ރައްދުދެއްވަމުން އޭނާ ވިދާޅުވީ، ހަގީގަތް އޮޅުވާލަން މަސައްކަތް ކުރާނެކަމެއް ނެތްކަމަށާއި، ދައްކަން ޖެހިއްޖެއްޔާ ލައްކަ ވާހަކަ އެބަހުރިކަމަށެވެ.

މުއާޒުގެ ވާހަކަތަކަށް ބަލާއިރު، ސަރުކާރުގެ ބައެއް ފަރާތްތަކާއި އޭނާ އާ ދެމެދު ކޮންމެވެސް ވަރެއްގެ ނުތަނަވަސްކަމެއް އޮތްކަން ފާހަގަކޮށްލެވެއެވެ.

ފެނަކައިން އިސްތިއުފާ ދެއްވި ސިޓީގައި މުއާޒު ވިދާޅުވެފައިވަނީ، މަގާމުން އިސްތިއުފާ ދޭންޖެހުނީ ކުންފުނީގެ މާލީ ހާލަތު އޮތްގޮތުންނާއި، އަދި ކަންކަން ދާގޮތުން ފެނަކައިުގެ މުސްތަގްބަލު ފަހިވާނޭކަމަށް ނުބެލެވޭތީ ކަމަށެވެ.

މުއާޒު އެގޮތަށް ވިދާޅުވިއިރު، މީގެ އަހަރެއްހާ ދުވަސްކުރިންވެސް ފެނަކައަކީ ސަރުކާރުގެ ކުންފުނިތަކުގެ ތެރެއިން މާލީހާލަތު އެންމެ ދަށް ކުންފުންޏެވެ. ފެނަކައިގެ މާލީހިސާބުތަކަށް ބަލާއިރު، މިދިޔަ އަހަރު ނިމުނުއިރު ފެނަކައިގެ ދަރަނި ހުރީ 4 ބިލިއަން ރުފިޔާއަށްވުރެ މަތީގައެވެ.