އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުގެ އިމިގްރޭޝަން ހަރުކަށި ސިޔާސަތުގެ ދަށުން، އިސްރާއީލުން ޣައްޒާގައި ހިންގަމުންދާ ޤަތުލުޢާއްމާ ދެކޮޅަށް އަޑުއުފުލާފައިވާ އިންޑިއާގެ ދަރިވަރަކު އެގައުމުން ޑީޕޯޓްކޮށްލުމަށް ހައްޔަރުކޮށްފިއެވެ.

ވޮޝިންގްޓަން ޑީސީގައި ހުންނަ ޖޯޖްޓައުން ޔުނިވަރސިޓީގެ ޕޯސްޓްޑޮކްޓޯރަލް ދަރިވަރެއް ކަމަށްވާ ބަދަރު ޚާން ސޫރީ ޑިޕޯޓް ކުރަން ނިންމާފައިވަނީ "ހަމާސްގެ ޕްރޮޕެގެންޑާ ފަތުރައި، އެންޓިސެމިޓިޒަމް ކުރިއެރުވުމަށް" ސޯޝަލް މީޑިއާގައި މަސައްކަތްކޮށްފައިވާ ކަމަށް ބުނެއެވެ. މިކަން ހޯމްލޭންޑް ސެކިއުރިޓީ ޑިޕާޓްމަންޓްގެ އެސިސްޓަންޓް ސެކްރެޓަރީ ޓްރިޝިއާ މެކްލޯލިން ވަނީ ބުދަ ދުވަހު ހާމަކޮށްފައެވެ.

"ސޫރީއަކީ ހަމާސްގެ ސީނިއަރ އެޑްވައިޒަރެއް އަދި، ޓެރަރިޒަމްއާ ގުޅުންހުރި މީހަކާ ގާތް ގުޅުމެއް އޮތް މީހެއް،" މެކްލޯލިން ވަނީ އެކްސްގައި ބުނެފައެވެ.

މެކްލޯލިން މިހެން ބުނި ނަމަވެސް، ސޫރީއާއި ހަމާސްއާ ދެމެދު ގުޅުމެއް އޮތްކަމުގެ ހެއްކެއް އޭނާ ހުށަހަޅާފައެއް ނުވެއެވެ.

ސޫރީ މިހާރު ހުރީ ލުއިޒިއާނާގެ އެލެގްޒެންޑްރިއާ އިންޓަރނޭޝަނަލް އެއަރޕޯޓުގައި ހުންނަ އިމިގްރޭޝަން އެންޑް ކަސްޓަމްސް އެންފޯސްމަންޓްގެ ބަންދު މަރުކަޒެއްގައި ކަމަށް އައިސީއީގެ އޮންލައިން ޑިޓެންޝަން ލޮކޭޓަރއިން ދައްކައެވެ.

ސޫރީގެ ވަކީލު އަޙްމަދު ޙަސަން ވަނީ ބުދަ ދުވަހު އޭނާ ދޫކޮށްލުމަށް އެދި ވަރޖީނިއާގެ އީސްޓަން ޑިސްޓްރިކްޓް ކޯޓަށް މައްސަލައެއް ހުށަހަޅާފައެވެ.

ސޫރީގެ ނަމުގައި ހަދާފައިވާ އެކްސް އެކައުންޓެއްގައި އިސްރާއީލާ ދެކޮޅަށް އަދި ފަލަސްޠީނަށް ތާއީދުކޮށް ގިނަ ޕޯސްޓުތަކެއް ކޮށްފައިވެއެވެ.

ސޫރީގެ ހައްޔަރުކޮށއފައި މިވަނީ، ޓްރަމްޕްގެ ސަރުކާރުން ކޮލަމްބިއާ ޔުނިވަރސިޓީގެ ދަރިވަރެއް ކަމަށްވާ މަޙްމޫދު ޚަލީލް، ފަލަސްޠީނަށް ތާއީދުކޮށް ބޭއްވި އިހުތިޖާޖުތަކުގައި ބައިވެރިވި ކަމަށް ބުނެ ހައްޔަރުކުރިތާ ދެ ހަފްތާއަށްވުރެ ކުރު މުއްދަތެއްގެ ތެރޭގައެވެ.

ބުދަ ދުވަހު ފެޑެރަލް ކޯޓަކުން ވަނީ ޚަލީލް އަނބުރާ ފޮނުވާލުމަށް ޓްރަމްޕް އިދާރާއިން ނެރުނު އަމުރާ ދެކޮޅަށް ޤާނޫނީ ގޮތުން ޗެލެންޖްކުރުމުގެ ފުރުޞަތު ދީފައެވެ. ޚަލީލްއަކީ އެމެރިކާގައި ދާއިމީ ރެސިޑެންޓެއްގެ ގޮތުގައި ދިރިއުޅެމުންދާ މީހެކެވެ.

ޖަޖް ޖެސީ ފަރމަން ވަނީ ޚަލީލް އަނބުރާ ފޮނުވާލުމަކީ އެމެރިކާގެ ޤާނޫނު އަސާސީގެ ދަށުން އޭނާއަށް ލިބިދޭ ޚިޔާލު ފާޅުކުރުމުގެ މިނިވަންކަމާއި ޑިއު ޕްރޮސެސްގެ ޙައްޤުތަކާ ޚިލާފު ކަމެއް ކަމަށް ބުނެ ހުށަހެޅި ވާހަކަތަކަކީ "ފަރުވާތެރިކަމާއެކު ބަލަންޖެހޭ" ކަންކަން ކަމަށް ނިންމާފައެވެ.