ހެންވޭރު ގެއެއްގެ ފުރާޅު މައްޗަށް ހައްވާ ޔުމްނު ނަމަކަށް ކިޔާ އަންހެނަކު ވެއްޓިފައި އޮއްވާ ފެނުނު މައްސަލައިގައި ހައްޔަރު ކުރި ރައުދު އަހުމަދު ޒިލާލް ދޫކޮށްލުމަށް ފަހު އަލުން ހައްޔަރު ކުރި ސަބަބު ފުލުހުން ސާފުކޮށް ދީފި އެވެ.

ފުލުހުން ދެންމެ ބުނީ ހ. މިޓާޒް ގޭގެ ފުރާޅު މައްޗަށް އަންހެނަކު ވެއްޓުނު މައްސަލައާ ގުޅިގެން ހައްޔަރު ކުރި ރައުދު އަހްމަދު ޒޖލާލް، ފުރިހަމަ ކުރަންޖެހޭ އިޖުރާއަތުތަކެއް ހުރުމުން، މިއަދު ބަންދުން ދޫކޮށްލި ކަމަށެވެ.

އަދި އައު ކޯޓު އަމުރެއްގެ ދަށުން އަލުން މިއަދު ވަނީ ހައްޔަރު ކޮށްފައި ކަމަށް ބުންޏެވެ.

ރައުދުގެ ބަންދު އެންމެ ފަހުން އިތުރު ކުރީ މި މަހުގެ 15 ވަނަ ދުވަހު އެވެ. މިއަދު ހެނދުނު އޭނާ ދޫކޮށްލީ ބަންދުގެ މުއްދަތު ހަމަނުވަނީހެވެ. ރައުދު ދޫކޮށްލިކަން ފުލުހުން ހާމައެެއް ނުކުރެ އެވެ.

އެކަން ހާމަވީ ހައިކޯޓަށް، ރައުދުގެ ފަރާތުން ހުށައަޅާފައިވާ މައްސަލަ ބާތިލުކޮށްދޭން އެދުމުން އެ މައްސަލަ ބާތިލުކޮށް ހައިކޯޓުން ނިންމި ނިންމުން އާންމުވުމުންނެވެ. 

ޔުމްނު ވެއްޓުނު މައްސަލާގައި ރައުދު ހައްޔަރުކުރީ މިދިޔަ މަހުގެ 24ވަނަ ދުވަހުގެ ރޭ 18:20ގައެވެ. އެފަހުން ކްރިމިނަލް ކޯޓަށް ހާޒިރުކޮށް، އެންމެ ފުރަތަމަ އޭނާގެ މައްޗަށް ޖެހީ ފަސް ދުވަހެވެ.