އަވައްޓެރި އިންޑިއާ އިން ރާއްޖެއަށް އެހީނުވާނަމަ ރާއްޖެ އޮންނާނީ ބަނގުރޫޓް ވެފައި ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ނަޝީދު މިހެން ވިދާޅުވީ އިންޑިއާގެ އޭޝިއަން ނިއުސް އިންޓަނޭޝަނަލަށް ދެއްވި ބަސްދީގަތުމެއްގަ އެވެ. ރާއްޖޭގެ 60 ވަނަ މިނިވަން ދުވަހުގެ ހަަރަކާތްތައް ޝަރަފުވެރި ކޮށްދެއްވުމަށް އިންޑިއާގެ ބޮޑުވަޒީރު ނަރެންދުރަ މޯދީ ރާއްޖެއަށް ކުރައްވާ ދަތުރުފުޅުގެ ތެރެއިން ދެ ގައުމުގެ މެދުގައި ވެވޭ އިގްތިސާދީ ބައެއް މުހިންމު އެއްބަސްވުންތަކާއިމެދު ސުވާލު ކުރުމުން ނަޝީދު ވަނީ އެކަމުގެ މުހިންމުކަން ފާހަގަ ކުރައްވާ އިންޑިއާގެ އެހީތެރިކަން ވަރަށް ބޮޑަށް ފާހަގަ ކުރައްވާފަ އެވެ.

އިންޑިއާއާ ވާދަވެރި ޗައިނާއަށް އަބަދުވެސް ތުހުމަތުތައް ކުރުމާއެކު ފާޑުވިދާޅުވާ އަދި އިންޑިއާގެ ދިފާއުގައި އަބަދުވެސް ވާހަކަ ދައްކަވާ ނަޝީދު ވިދާޅުވި ގޮތުގައި އިންޑިއާ އަކީ ރާއްޖޭގެ ހަގީގީ އެކުވެރި އެކެވެ. އިންޑިއާ އަކީ އަބަދުވެސް ރާއްޖެ އެންމެ ބޭނުން ވަގުތު އެންމެ މުހިންމު އެހީތެރިކަން ފޯރުކޮށްދޭ ގައުމު ކަމުގައި ވިދާޅުވި އެވެ.

އަދި ރާއްޖެ ބަނގުރޫޓް ނުވެ އޮތުމުގެ ސަބަބަކީ އިންޑިއާގެ އެހީތެރިކަން ކަމުގައި ވެސް ވިދާޅުވި އެވެ.

"ހަގީގަތުގައި އިންޑިއާގެ އެހީތެރި ނުވާނަމަ ރާއްޖެ މިހާރު އޮންނާނީ ބަނގުރޫޓުވެފައި. އިންޑިއާގެ އެހީތެރިކަން ދިވެހީން އަބަދުވެސް ބަލައިގަނޭ އެކަމުގެ އަގު ވަޒަން ކުރޭ" ރައީސް ނަޝީދު ވިދާޅުވި އެވެ.

އިންޑިއާއަށް ވަރަށް ބޮޑަށް ތައުރީފު ކުރައްވާ ނަޝީދު ވިދާޅުވީ އެ ގައުމުން ގެންދަނީ ސަރަހައްދީ ސަލާމަތާއި ރައްކާތެރި ކަމަށް ހާއްސަ އިސްކަމެއް ދިނުމުގެ އިތުރުން އަވައްޓެރި ހުރިހާ ގައުމުތަކަށް ވެސް އެހީތެރިވަމުން ކަމަށެވެ. އިންޑިއާ އަކީ މިވަގުތު އެންމެ ފުޅާ އަދި އެންމެ ހަލުވި އިގްތިސާދު އޮތް ގައުމުކަން ފާހަގަ ކުރައްވާ ނަޝީދު ވިދާޅުވީ އެ ގައުމުގެ ވިސްނުމަކީ ގުޅިގެން ކުރިއަށް ދިއުން ކަމަށެވެ.