ރައީސުލްޖުމްހޫރިއްޔާ ޑރ. މުހައްމަދު މުޢިއްޒުއާ އެކު ކުރެވުނު އުފެއްދުންތެރި މަޝްވަރާތަކާ އެކު ދެ ގައުމުގެ ގުޅުމަށް ވަރަށް ބޮޑު ހަކަތައެއް އިތުރުވެގެންދާނެ ކަމަށް އިންޑިއާގެ ބޮޑުވަޒީރު ނަރެންދުރަ މޯދީ ވިދާޅުވެއްޖެ އެވެ.
މޯދީ މިހެން ވިދާޅުވީ ރާއްޖެއިން ފުރާވަޑައިގަތުމުގެ ކުރީން އެކްސްގައި ކުރެއްވި ޕޯސްޓެއްގަ އެވެ. ދިވެހި ބަހުން ކުރެއްވި ޕޯސްޓެއްގައި ރައީސް ވިދާޅުވީ ރާއްޖެއަށް ކުރި މި ކާމިޔާބު ދަތުރު ނިންމުމަކަށް އަންނައިރު، ހިތުގެ އެންމެ ފުންމިނުން ރައީސް މުޢިއްޒުއަށާއި، ދިވެހި ސަރުކާރަށާއި، ދިވެހި ރައްޔިތުންނަށް ތިޔަ ދެއްވި މެހެމާންދާރީއަށް ޝުކުރު ދަންނަވާ ކަމަށެވެ.
"... 60 ވަނަ މިނިވަން ދުވަހުގެ މުނާސަބަތުގައި ބައިވެރިވުމަކީ އަޅުގަނޑަށް ލިބުނު ވަރަށް ބޮޑު ޝަރަފެއް,"
މީގެ އިތުރުން މޯދީ ވިދާޅުވީ ދިވެހިރާއްޖޭގެ 60 ވަނަ މިނިވަން ދުވަހުގެ މުނާސަބަތުގައި ބައިވެރިވުމަކީ ލިބުނު ޝަރަފެއް ކަމަށެވެ. އަދި ވިދާޅުވީ މި މުހިންމު މުނާސަބަތުގައި ދިވެހިރާއްޖޭގެ ރައްޔިތުންގެ މުއްސަނދި ސަގާފީ ތަރިކައާއި ވަރުގަދަ ރޫހު ފެނިގެންދިޔަ ކަމަށެވެ.
އަދި ވޭތުވެދިޔަ އަހަރުތަކުގެ ތެރޭގައި ގައުމު ކޮށްފައިވާ ދަތުރު ފެނިގެންދިޔަ ކަމަށް ވިދާޅުވި އެވެ. އަދި ވިދާޅުވީ ގަދީމީ ސަގާފަތުން ފެށިގެން މޫސުމަށް އަންނަ ބަދަލުތައް ފަދަ މުހިންމު ދާއިރާއިން ނަގާފައިވާ އިސްކަމުގެ ސަބަބުން ރާއްޖެ ވަނީ ބައިނަލްއަގްވާމީ މައިދާނުގައި ހާއްސަ ޖާގައެއް ހޯދާފައިވާ ކަމަށެވެ.
"އަޅުގަނޑުގެ އެންމެ ހެޔޮއެދުންތައް ދިވެހިރައްޔިތުންނަށް އަރިސްކުރަން," މޯދީގެ ޕޯސްޓްގައި ވިދާޅުވެފައިވެ އެވެ.
Advertisement
This content is created and paid for by advertisers and does not involve Voice Journalists
