ލ.މާވަށުގައި މިއަދު މީހަކަށް ވަޅިން ހަމަލާދީ މަރާލިކަމުގެ ތުހުމަތުގައި ފުލުހުން މީހަކު ހައްޔަރުކޮށްފިއެވެ.
މި މައްސަލާގައި ފުލުހުން ހައްޔަރުކޮށްފައިވަނީ ހދ. ނޮޅިވަރަންފަރު، އަސަރީމަންޒިލް، އުމުރުން 29 އަހަރުގެ މުހައްމަދު އިބްރާހީމެވެ. ފުލުހުން ވަނީ އޭނާ ހައްޔަރުކުރިކަން ޔަގީންކޮށްދީފައެވެ.
މާވަށުގައި މިއަދު ހެނދުނު ވަޅިން ހަމަލާދީ މަރާލާފައިވަނީ އެރަށު ނަލަހިޔާގޭ އުމުރުން 29 އަހަރުގެ މޫސާ އިބްރާހީމެވެ. މި ހާދިސާ ހިނގާފައިވަނީ މިއަދުގެ ހެނދުނުގެ ވަގުތެއްގައި އެރަށު ވޮލީކޯޓް ކައިރީގައެވެ. އެރަށުން ވާހަކަދެއްކި މީހުން ބުނެފައިވަނީ އޭނާ މަރާލާފައިވަނީ ނޭނގޭގޮތަށް ފަހަތުން ކަރަށް ވަޅި ހަރައިގެންކަމަށެވެ.
މޫސަ ހޮސްޕިޓަލަށް ގެންދިޔައިރުވެސް މަރުވެފައިވާކަމަށް ފުލުހުން ވަނީ ބުނެފައެވެ.
މި ހަމަާދިން ކަމަށް ބެލެވޭ މުހައްމަދު އިބްރާހީމަކީ އޭރު ދަތުރުވަރެއްގައި މާވަށަށް އައިސްހުރި މީހެއްކަމަށް މައުލޫމާތު ލިބެއެވެ. އަދި އެމީހުންނަކީ މަސްތުވާތަކެތީގެ ކަންކަމުގައި އުޅޭމީހުންކަމަށްވެސް އެރަށުން ވާހަކަދެއްކި ބައެއް މީހުން ފާހަގަކުރިއެވެ.
ފުލުހުން ދަނީ މި މައްސަލަ ތަހުގީގުކުރަމުންނެވެ.
Advertisement
This content is created and paid for by advertisers and does not involve Voice Journalists
