މާލޭ ބާޒާރުން ފިޔާ ހުސްވުމާއެކު އެއްގަމުގެ ބައެއް ވިޔަފާރިތަކުން ފިޔާގެ އަގު ބޮޑުކުރަން ފަށައިފިއެވެ.

މާލޭގެ ބައެއް ފިހާރަތަކުން ފިޔާ ގާތްގަނޑަކަށް ހުސްވެފައިވާއިރު، ބައެއް ފިހާރަތަކުން ރޭ ވަނީ ފިޔާ ވިއްކުން ހުއްޓާލާފައެވެ. އަދި އަނެއްބައި ފިހާރަތަކުން ވަނީ ފިޔާގެ އަގު ވަރަށް ބޮޑަށް އުފުލާލާފައެވެ. އެގޮތުން ހުޅުމާލޭ ފޭސް އެކެއްގެ މާރުކޭޓުގައި ރޭ ވަނީ ފިޔާ ކިލޯއެއް 75 ރުފިޔާއަށް ވިއްކާފައެވެ.

ވޮއިސްއިން ބެލިބެލުމުން ފިހާރަތަކުގައި މިހާރު އެންމެ އަގުހެޔޮވެގެންވެސް ފިޔާ ކިލޯއެއް ލިބެންހުރީ 35 ރުފިޔާއަށެވެ. ބާޒާރުން ފިޔާ ހުސްވެފައިވަނީ މޫސުން ގޯސްވުމުގެ ސަބަބުން ވިޔަފާރި ބަނދަރުން ފިޔާ ނެރުމުގައި ތާށިކަމެއް އައުމުންނެވެ. ނަމަވެސް މިއަދުގެ ވަގުތެއްގައި ފިހާރަތަކަށް ފިޔާ ލިބޭނޭކަމަށް ވިޔަފާރިވެރިން ވަނީ ބުނެފައެވެ.

މާލޭ ބާޒާރުގައި ފިޔާ ލިބުން ދަތިވުމާ ގުޅިގެން އެސްޓީއޯއިން ވަނީ ފިޔާ ޝިޕްމަންޓެއް ގެނައުމަށް މަސައްކަތް ކުރަމުންދާކަމަށް ބުނެފައެވެ. އެސްޓީއޯއިން ވަނީ މީގެ ކުރިންވެސް ފިޔާ ލިބުން ދަތިވުމާ ގުޅިގެން ބާޒާރަށް ފިޔާ ނެރެފައެވެ.

މާލޭގެ ބައެއް ފިހާރަތަކުން ފިޔާ ކިލޯއެއްގެ އަގު 75 ރުފިޔާއަށް އުފުލާލާފައިވާއިރު، މައުލޫމާތު ލިބިފައިވާ ގޮތުގައި މިއީ އަދި ފިޔާ ކިލޯއެއްގެ އަގު މިހާ ބޮޑަށް އަރައިގެންދިޔަ ފުރަތަމަ ފަހަރެވެ. ފިޔާ ލިބުން ދަތިވުމާ ގުޅިގެން ބައެއް ފިހާރަތަކުން ފިޔާ ވިއްކުން މަޑުޖައްސާލާފައިވަނީ ގަސްތުގައި ފިޔާގެ އަގުބޮޑުކުރުމުެގ ނިޔަތުގައިކަމަށް ބައެއް ފަރާތްތަކުން ވަނީ ފާހަގަކޮށަްފައެވެ. 

ދިމާވާ ކަމަކުން ބާޒާރުގައި ތަކެތި ސަޕްލައިކުރުން ލަސްވާ ގަޑިތަކުގައި ތަކެތީގެ އަގު އުފުލާލުމަކީ ބައެއް ވިޔަފާރިވެރިންގެ އާންމު އާދައެއްކަމަށް ތަކެތި ގަންނަންދާ ފަރާތްތަކުން ބުނެއެވެ.