މާލޭ ވިޔަފާރިބަނދަރުގައި އޮތް ބޯޓުތަކުން އިއްޔެއިން ފެށިގެން މިހާތަނަށް 4720 ބަސްތާ ފިޔާ ބާލާފައިވާކަމަށް މޯލްޑިވްސް ޕޯޓްސް އޮތޯރިޓީ، އެމްޕީއެލުން ބުނެފިއެވެ.
މޫސުން ގޯސްވުމުގެ ސަބަބުން ބޯޓުތަކުން ފިޔާ ބޭލުން ލަސްވުމުގެ ސަބަބުންކަމަށް ބުނެ، ބާޒާރުމަތިން ފިޔާ ހުސްވެފައިވާކަމަށް ވިޔަފާރިވެރިން ވަނީ ބުނެފައެވެ.
ބާޒާރުގައި ފިޔާލިބުން ދަތިވެ، ފިޔާގެ އަގު އުފުލިފައިވަނިކޮށް އެމްޕީއެލުން މިއަދު ބުނީ އިއްޔެއިން ފެށިގެން މިހާތަނަށް 4720 ބަސްތާގެ ފިޔާ ބޯޓުތަކުން ބާލައި ގުދަނަށް ގެންގޮސްފައިވާކަމަށެވެ. އެގޮތުން ވިޔަފާރި ބަނދަރުގައި އޮތް 3 ބޯޓަކުން ކޮންމެހެން ބޭނުންވާ މުދާ ބޭލިއިރު އޭގެ ތެރޭގައި ފިޔާ ހިމެނޭކަން އެމްޕީއެލުން ފާހަގަކުރިއެވެ. އެމްޕީއެލްގެ މީޑިއާ އޮފިޝަލް ވިދާޅުވީ މޫސުން ތަންދޭ ވަރަކުން ބޯޓުން މުދާ ބޭލުމުގެ ކަންކަން ކުރިއަށްގެންދާކަމަށެވެ.
އެމްޕީއެލް ގުދަނުގައި މިއަދު ބޭލި ފިޔާ ބަސްތާތަކެއް... ފޮޓޯ: އެމްޕީއެލް
ބޯޓުތަކުން ފިޔާބަސްތާ ބޭލުމަށްފަހު އެމްޕީއެލް ގުދަނުން ނެރެ ވިޔަފާރިކުރާ ފަރާތްތަކަށް އެތަކެތި ސަޕްލައިކުރުމަކީ ތަކެތި އެތެރެކުރާ ފަރާތްތަކުގެ ޒިންމާއެކެވެ.
ބާޒާރުމަތީ ފިހާރަތަކުން ބުނީ މެންދުރުފަހުން ފިޔާ ލިބޭނޭކަމުގެ އުއްމީދުބޮޑުކަމަށެވެ. ބާޒާރުން ފިޔާ ހުސްވުމާއެކު، ފިހާރަތަކުން ވަނީ ފިޔާގެ އަގު ބޮޑުކޮށް ވިއްކަން ފަށާފައެވެ. އެގޮތުން ހުޅުމާލޭ ފޭސް އެކެއްގެ މާރުކޭޓުން މިއަދު ފިޔާ ކިލޯއެއް 75 ރުފިޔާއަށް ވިއްކަމުންދާަކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
