ޣައްޒާ ހިސާރުކޮށްފައި އޮންނައޮތުން ނިމުމަކަށް ގެނައުމަށް މަސައްކަތްކުރަމުން އަންނަ ގްލޯބަލް ސުމޫދު ފްލޮޓީނާ މޫވްމަންޓްގެ ރައްކާތެރިކަން ކަށަވަރު ކޮށްދިނުމަށް ރާއްޖެ ހިމެނޭހެން 15 ޤައުމަކުން ގޮވާލައިފިއެވެ.

އެ ޖަމާއަތުގެ ރައްކާތެރިކަން ކަށަވަރުކޮށްދިނުމަށް ގޮވާލާފައިވަނީ ރާއްޖެ ހިމެނޭހެން ބަންގްލަދޭޝް، ބްރެޒިލް، ކޮލޮމްބިއާ، އިންޑޮނޭޝިއާ، އަޔަލޭންޑް، ލިބިޔާ، މެލޭޝިއާ، މެކްސިކޯ، ޕާކިސްތާން، ޤަތަރު، އޮމާން، ސްލޮވީނިއާ، ދެކުނު އެފްރިކާ، ސްޕެއިން، އަދި ތުރުކީއެވެ.

އެ ޤައުމުތަކުން ގުޅިގެން ނެރެފައިވާ ބަޔާނުގައި ބުނެފައިވަނީ، ޣައްޒާގެ ރައްޔިތުންނަށް އިންސާނީ އެހީތެރިކަން ފޯރުކޮށްދިނުމަށް އެޖަމާއަތުން ފަށާފައިވާ ހަރަކާތަށް އިސްރާއީލުން ނުރައްކާކުރަމުންގެންދާ ކަމަށެވެ. 

ގްލޯބަލް ސުމޫދު ފްލޮޓިލާގެ މަޤްޞަދަކީ ގާޒާ ސަރަޙައްދަށް އިންސާނީ އެހީ ފޯރުކޮށްދިނުމާއި، ފަލަސްޠީނު ރައްޔިތުންގެ ކުއްލި އިންސާނީ ބޭނުންތަކާއި ގާޒާގައި ހިނގަމުންދާ ހަނގުރާމަ ހުއްޓުވުމުގެ މުހިންމުކަމާ މެދު ހޭލުންތެރިކަން އިތުރުކުރުމެވެ. ބަޔާނުގައި ބުނީ އިސްރާއީލްގެ ނޭއްގާނީ އަމަލުތަކާހެދި އެ ޖަމާއަތުގެ ހަރަކާތްތަކަށް ހުރަސް އެޅިފައިވާކަމަށެވެ.

ބަޔާނުގައި ވަނީ ފްލޮޓިލާއާ ދެކޮޅަށް އެއްވެސް ޣައިރު ޤާނޫނީ ނުވަތަ އަނިޔާވެރި ޢަމަލެއް ނުހިންގުމަށާއި އަދި އެފަދަ އެންމެހާ ކަންކަމުން އެއްކިބާވެ، ބައިނަލްއަޤްވާމީ ޤާނޫނާއި އިހްތިރާމްކުރުމަށް އިސްރާއީލަށް ގޮވާލާފައެވެ. އަދި ބައިނަލްއަޤްވާމީ ކަނޑުތަކުގައި އުޅަނދުފަހަރަށް ހަމަލާދިނުން ނުވަތަ ޣައިރު ޤާނޫނީ ގޮތުން ބަންދުކުރުން ފަދަ، ކަންކަން ކުރާނަމަ އެކަމުގެ ޒިންމާ އުފުލަންްޖެހޭނޭ ކަމަށްވެސް ވަނީ އަންގާފައެވެ.

ގްލޯބަލް ސުމޫދު ފްލޮޓީނާ މޫވްމަންޓްގެ ހަރަކާތްތަކަށް އިސްރާއީލް ސިފައިން ހަމަލާދިނުމުގެ މައްސަލަ ފެންމަތިވެފައިވާއިރު، ގިނަ ޤައުމުތަކަކުން ދަނީ އިސްރާއީލް ސިފައިންގެ އަމަލުތައް ކުށްވެރި ކުރަމުންނެވެ.