ފ. ދަރަނބޫދޫގެ ރަށް ގިރުމުގެ މައްސަލައަށް ޙައްލެއް ހޯދުމަށް މި އަންނަ އަހަރުގެ ބަޖެޓުގައި ހިމަނުއްވައިގެން ކުރިޔަށްގެންދަވާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
އަތޮޅުތަކަށް ކުރައްވަމުންގެންދަވާ ދަތުރުފުޅުގެ ތެރެއިން ދަރަނބޫދޫއަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައި ރައީސް ވިދާޅުވީ، އެރަށުގެ ރަށްގިރުމުގެ މައްސަލައަކީ ވަރަށް ރަނގަޅަށް ދިރާސާކުރަން ކުރަންޖެހޭ ކަމެއް ކަމަށެވެ. އަދި ސީރިއަސް މައްސަލައެއްގެ ގޮތުގައި ބަލައި ޙައްލުކުރަން މުހިންމު ކަންތައްތަކެއް ކުރުމަށް މި އަންނަ އަހަރުގެ ބަޖެޓުގައި ހިމަނުއްވާނެ ކަމަށް ރައީސް ވިދާޅުވިއެވެ.
މި އަންނަ އަހަރުގެ ބަޖެޓުގެ ތެރެއިން މުހިންމު މަޝްްރޫއުއްގެ ގޮތުގައި އަޅުގަނޑުމެން ހިމަނާނަން، ރަށްގިރުމުގެ މައްސަލަ ޙައްލުކުރުމަށް ކަންތައްތަކެއް ކުރަން. މިކަމަކީ ރަނގަޅަށް ދިރާސާކުރަންޖެހޭ ކަމެއް. ތަންކޮޅެއް ސީރިއަސް މައްސަލައެއްގެ ގޮތުގައި ބަލާނެ ކަމެއް.
ރައީސް ޑރ. މުޙައްމަދު މުޢިއްޒު
ރައީސް ވިދާޅުވީ، ކޮންސްޓްރަކްޝަން މިނިސްޓްރީ އާއި ކައުންސިލާ ގުޅިގެން ބަލަންޖެހޭ ކަންކަން ބެލުމަށްފަހު މި އަންނަ ތެރޭގައި އެ މަޝްރޫއުގެ މަސައްކަތް ކުރިޔަށްގެންދަވާނެ ކަމަށެވެ.
މީގެ އިތުރުން ވެސް ރައީސް ވަނީ އެ ރަށުގެ ތަރައްގީގެ ގިނަ މަޝްރޫއުތަކާ ގުޅޭ މައުލޫމާތު އެ ރަށުގެ ރައްޔިތުންނަށް ދެއްވާފައެވެ. އެގޮތުން މި އަހަރު ގިނަ މަޝްރޫއުތަކެއްގެ ޢަމަލީ ގޮތުން މަސައްކަތްތައް ފެށިފައިވާކަން ރައީސް ފާހަގަކުރެއްވައި، ސިއްޚީ މަރުކަޒުގެ އައު އިމާރާތާއި، އެ މަރުކަޒަށް އިތުރު ނަރުހެއް ހޯދުމާއި، އެ މަރުކަޒު 16 ގަޑިއިރަށް ހުޅުވޭނެ ފަދަ ގޮތަކަށް ޚިދުމަތްތައް ބަދަލުކުރެވޭނެ ކަމަށް ރައީސް ވިދާޅުވިއެވެ.
އަދި އެރަށަކީ އެތްލީޓުން ގިނަ ރަށަކަށްވުމުން އެ ރަށުގައި ފުޓްބޯޅަ ދަނޑު ޤާއިމްކުރާއިރު، ވަށައިގެން ޓްރެކެއް އަޅުއްވައިދެއްވާނެ ކަމަށް ވެސް ރައީސް ވިދާޅުވިއެވެ. ހަމައެއާއެކު ޔޫތް ސެންޓަރެއް ޤާއިމްކޮށްދެއްވައި، ވޮލީ ކޯޓެއް ވެސް އަޅުއްވައި ދެއްވާނެ ކަމަށް ވެސް ރައީސް ވިދާޅުވިއެވެ.
އަދި އެ ރަށުގެ ސްކޫލަށް ބޭނުންވާ މަލްޓި ޕާޕޯސް ހޯލެއް ޤާއިމްކުރުމަކީ އެމަނިކުފާނުގެ ރިޔާސީ ވަޢުދުފުޅެއް ކަމަށާއި، އެއާއެކު އެ ސްކޫލަށް އިތުރުކުރެވޭ ކްލާސްރޫމުތަކުގެ ޢަމަލީ މަސައްކަތްތައް މި އަހަރު ފައްޓަވައިދެއްވާނެ ކަމަށް ވެސް ރައީސް ވިދާޅުވިއެވެ.
ދަރަނބޫދޫގެ ތަރައްގީގެ ގިނަ މަޝްރޫއުތަކެއްގެ އަދާހަމަ ރައީސް މިއަދު ދެއްވިއިރު، މިއަދު ވަނީ ބޭންކް އޮފް މޯލްޑިވްސް (ބީއެމްއެލް) އޭޓީއެމްގެ ހިދުމަތް ވެސް ރަސްމީކޮށް ފަށައިފައެވެ. ހިދުމަތް ރަސްމީކޮށް ފައްޓަވައި ދެއްވީ ވެސް ރައީސްއެވެ.
އަދި ދަރަނބޫދޫ ސިއްހީ މަރުކަޒަށް އިތުރު ކުރެވޭ އާ އިމާރާތުގެ އަމަލީ މަސައްކަތް ވެސް މިއަދު ފަށައިފައިވާއިރު، އިމާރާޓުގެ އަމަލީ މަސައްކަތް ނުވަތަ އިމާރާތުގެ ބިންގާ އަޅުއްވައި ދެއްވީ ހެލްތް މިނިސްޓަރު، އަބްދުﷲ ނާޒިމްއެވެ.
Advertisement
This content is created and paid for by advertisers and does not involve Voice Journalists
