މިދިޔަ ސަރުކާރުގައި ށ. މިލަންދޫގައި ޤާއިމްކުރަމުންދިޔަ ފެނަކައިގެ އައު އިންޖީނުގޭގެ މަސައްކަތުގައި އުޅުނު މުވައްޒަފުންނަށް ކެއިން ބުއިން ފޯރުކޮށްދިނުމުގައި އުޅުނު ފަރާތަށް، އެ ބިލުތަކަށްވާ މިލިއަނެއްހާ ރުފިޔާ ދެއްކުމަށް ސިވިލް ކޯޓުން ޙުކުމްކޮށްފިއެވެ

2022 ވަނަ އަހަރުގެ ސެޕްޓެމްބަރު މަހުގެ ތެރޭގައި ފެނަކައިން އާރްޑީއެން އިންވެސްޓްމެންޓް ނަމަކަށް މިޔާ ކުންފުންޏަކާއެކު، ށ. މިލަންދޫގައި ޤާއިމްކުރަމުންދިޔަ ފެނަކައިގެ އައު އިންޖީނުގޭގެ މަސައްކަތުގައި އުޅުނު މުވައްޒަފުންނަށް ކެއިން ބުއިން ފޯރުކޮށްދިނުމުގައި ވަނީ ސޮއިކޮށްފައެވެ. އެހެން ނަމަވެސް އެ އެއްބަސްވުމާ އެއްގޮތަށް ފެނަކައިން އެ ޚިދުމަތްތަކަށް ފައިސާ ދައްކައިފައިނުވާ ކަމަށް ސިވިލް ކޯޓުގެ ޙުކުމުގައި ބުންޏެވެ.

އެގޮތުން އެ ޙުކުމުގައި ބުނީ، މިލަންދޫގައި ހިންގާ "ވުޑްލޭންޑް ރެސްޓޯރަންޓް" އިން ދީފައިވާ ޚިދުމަތަށް ފެނަކައިން ނުދައްކާހުރި ފައިސާގެ އަދަދު 937,300ރ އަށް އަރާ ކަމަށާއި، އެ ފައިސާ 10 ދުވަހުގެ ތެރޭގައި އެ ރެސްޓޯރަން ހިންގާ އާރްޑީއެން އިންވެސްޓްމެންޓަށް ދެއްކުމަށެވެ.

ސިވިލް ކޯޓުން އެ ޙުކުމް އިއްވި ނަމަވެސް، އެ ޙުކުމް އިއްވައިފައިވަނީ ފެނަކައިގެ ޣައިރު ހާޒިރުގައިކަން ފާހަގަކުރެވެއެވެ. އެގޮތުން ފެނަކައިގެ ޣައިރު ހާޒިރުގައި މައްސަލަ ނިންމާފައިވަނީ މައްސަލައިގެ ލިޔެކިޔުންތަކާއި ހަވާލުވުމަށްފަހު ކަނޑައެޅިފައިވާ މުއްދަތުގެ ތެރޭގައި ފެނަކައިން ދަޢުވާއަށް ޖަވާބުދީފައި ނުވާތީކަމަށް އެ ޙުކުމުގައި ބުނެފައިވެއެވެ.

މިދިޔަ ސަރުކާރު ނިމުނުއިރު ފެނަކަ ވަނީ ވަރަށް ބޮޑަށް ދަރަނިވެރިވެފައެވެ. އެގޮތުން ފެނަކައަށް ސިޔާސީ މުވައްޒަފުން ނަގައި، އިންތިހާބުތަކާ ދިމާކޮށް ގިނަ އަދަދެއްގެ މުވައްޒަފުން ނެގި ގިނަ މައްސަލަތަކެއް ވަނީ ފެންމަތިވެފައެވެ.