ކަފިހި ހުރަސްމަތިން މަގު ހުރަސްކުރަނިކޮށް، މީހެއްގެ ގައިގައި ކާރުން ޖެހުމުން، މަޑުނުކޮށް ފިލައިގެން ދިޔަ ޑްރައިވަރަކު ފުލުހުން ހައްޔަރުކޮށްފިއެވެ.
މިދިޔަ އާދިއްތަ ދުވަހުގެ ރޭ ހިނގި މި ޙާދިސާގައި ހައްޔަރުކޮށްފައިވަނީ ޕްރައިވެޓް އެ ކާރު ދުއްވަން އިން ފުވައްމުލަކަށް ނިސްބަތްވާ އެރަށު ދަޑިމަގު، ނައިސް، 57 އަހަރުގެ ޚާލިދު އަބްދުﷲ ޢަލީއެވެ. ހުޅުމާލޭގެ ދެވަނަ ފިޔަވަހީގައި ހުންނަ އެމްއޭސީއެލް ޓަވަރު ކައިރިން ހިނގި މި ޙާދިސާގެ ސަބަބުން އޭނާ ހައްޔަރުކޮށްފައިވަނީ އެ ސަރަހައްދުގައި ހުރި ސީސީޓީވީ ފުޓޭޖު ބަލައި، ކޯޓު އަމުރެއްގެ ދަށުން އިއްޔެއެވެ.
އެ މައްސަލައިގައި އަނިޔާވި 63 އަހަރުގެ މީހާގެ އެއްފައިގެ ކަށިމަތި ވަނީ ބިންދައިގެން ގޮސްފައެވެ. އެކްސިޑެންޓްގައި އަނިޔާވި މީހާއަށް ފަރުވާދީފައިވަނީ އެމްބިއުލާންސްގައި ޓްރީޓޮޕަށް ގެންގޮސް އެ ހޮސްޕިޓަލުންނެވެ.
އެ މައްސަލައިގައި ޑްރައިވަރުގެ ލައިސަންސް ވަނީ ހިފަހައްޓާފައެވެ. އަދި އެ މައްސަލަ ފުލުހުން ގެންދަނީ ތަހުގީގުކުރަމުންނެވެ.
Advertisement
This content is created and paid for by advertisers and does not involve Voice Journalists
