އަވައްޓެރި ސްރީލަންކާއަށް މިހާރު ކުރަމުންދާ މޫސުމީ ވިއްސާރަ އާއި އެރި ތޫފާން ދިތުވާގެ ސަބަބުން ހާލުގައި ޖެހުނު ފަރާތްތަކަށް އެހީވުމަށް އިންޑިއާއިން އަވަސް ފިޔަވަޅުތަކެއް އަޅައިފިއެވެ.

އިންޑިއާއިން އެޅި އަވަސްފިޔަވަޅުތަކުގެ ތެރެއިން އެންމެ މުހިންމު ފިޔަވަޅެއްގެ ގޮތުން އެޤައުމުން ވަނީ ކޮލަމްބޯއަށް 12 ޓަނުގެ އެހީގެ ތަކެތި ފޮނުވާފައެވެ. މިކަމާ ގުޅޭގޮތުން އިންޑިއާގެ އެކްސްޓަރނަލް މިނިސްޓަރު ޖަޔަ ޝަންކަރު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، މިލިޓަރީ އެއާ ފްލީޓް C-130 ގައި ލަންކާއަށް އިންސާނީ އެހީތެރިކަން ފޯރުކޮށްދެވިފައިވާކަމަށެވެ. އިންޑިއާއިން ފޮނުވި ތަކެތީގެ ތެރޭގައި ހިެމނެނީ ބްލޭންކެޓާއި، ސަތަރި، ހައިޖީން ކިޓް، އަދި ކެއިން ބުއިމަށް ބޭނުންކުރާ ތަކެއްޗެވެ. 

ޖަޔަ ޝަންކަރު ވިދާޅުވީ އޮޕަރޭޝަން ސާގަރު ބަންދުގެ ދަށުން އަވައްޓެރި ސްރީލަންކާއަށް އެހީވުމަށް ފަށާފައިވާ އޮޕަރޭޝަނުގެ ދަށުން އެޤައުމަށް އެކިއެކި އެހީތައް ވަމުންދާނޭކަމަށެވެ. 

ސްރީލަންކާއަށް ކުރަމުންދާ ވިއްސާރާގައި އެންމެބޮޑު ގެއްލުމެއް ލިބިފައިވަނީ ކޯރުތައް ފުރި ބަންޑުންވުމުގފެ ސަބަބުންނެވެ. އެގޮތުން ބިންތިރި ގިަނ އަވަށްތަކެއް ފެނު އަޑީގައި އޮތްއިރު، ބިންގަނޑު ކަނޑައިގެން ދިއުމުގެ ނުރައްކާތެރި ގިނަ ހާދިސާތަކެއްވެސް ވަނީ ހިނގާފައެވެ. މިފަހަރު ކުރިމަތިވި ކާރިސާއަކީ މި ފަހުގެ ތާރީހެއްގައިވެސް އެޤައުމަށް ކުރިމަތިވި އެންމެ ގެއްލުންބޮޑު ފަހަރުކަމަށް އެޤައުމުގެ ކަމާބެހޭ އިދާރާތަކުން ބުނެއެވެ.