މަސްޖިދުލްއީމާން ހުޅުވަނީ, އެސްޖޭ މިސްކިތް ގަލަށް ވެފައި
ހުޅުމާލެ ފޭސް ދޭއް ގައި ބިނާކުރާ މިސްކިތް މަސްޖިދުލްއީމާން އަންނަ ހަފްތާގައި ހުޅުވަން ނިންމައިފި އެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް މިއަދު ވަނީ ހުޅުމާލެ ހިޔާ އަވަށުގެ ޓަވަރުތައް ކައިރީ ބިނާކޮށްފައިވާ ރީތި މިސްކިތް އަންނަ ހަފްތާގައި ހުޅުވަން ނިންމާފައިވާކަން ހާމަ ކުރައްވާފަ އެވެ. މިއީ ވަރަށް ރީތި މިސްކިތެކެވެ.
މަސްޖިދުލްއީމާން އަންނަ ހަފްތާގައި ހުޅުވަން ނިންމިއިރު ސަލާހުއްދީން ސްކޫލް ކައިރީ އެސްޖޭއިން ބިނާކުރަމުންދާ މިސްކިތްވެސް މި މަހު ނިންމަން ޖެހެ އެވެ. އެއީވެސް އެތައް މަސް ދުވަހެއް އިތުރުކޮށް ދީފައިވަ ތާރީހެކެވެ. ނަމަވެސް އެ މިސްކިތް ހުރީ ފާޑަކަށް "ގަލަށް" ވެފަ އެވެ. މާބޮޑު ކުރިއެރުމެއް މިދިޔަ އަށެއްކަ މަސް ދުވަހު ނުފެނުނެވެ.
އެސްޖޭ މިސްކިތް ނުނިންމާ އެ ކުންފުނިން އެ ސައިޓް އެހެން ބޭނުންތަަކަށް ގެންނަ މުދާ ބަަހައްޓާ ތަނަކަށް ހަދާފައިވާތީއާ މިސްކިތް ނުނިމި ދިގުލައިގެންދާތީ އާންމުން ފާޑުކިޔާތާ އެތައް ދުވަހެއް ވެއްޖެ އެވެ.
މިސްކިތްތައް އަޅަން ބިންގާ އެކަމުގެ މުގާބިލްގައި ވިޔަފާރި ފައިދާ ހޯދާ ކަމުގެ ތުހުމަތު އަބަދުވެސް އޮވެ އެވެ. ބައެއް ވިޔަފާރިވެރީން މިސްކިތް އެޅުމުގެ ނަމުގައި މިކަންކަން ކުރާތީ ސަރުކާރުން މިހާރު ވަނީ މިސްކިތް ބިނާކުރަން ދެން ހަވާލުކުރާނީ ވަކި ތާރީހެއްގައި ނިންމަން ކަނޑައަޅާ އެ ގޮތަށް އުސޫލު ހަދާފަ އެވެ.
އެގޮތުން މިސްކިތް އަޅަން އެދި ހުށަހަޅާ އަމިއްލަ ފަރާތްތަކަށް މިސްކިތް އަޅައި ނިންމުމަށް ދެ އަހަރަށް ވުރެ ގިނަ މުއްދަތު ނުދިނުމާއި ހަ މަސްދުވަހުގެ ތެރޭ މަސައްކަތް ފަށަން ލާޒިމުކުރުން ހިމެނެ އެވެ. އަދި މި މުއްދަތުގައި މަސައްކަތް ނުފަށައިފި ނަމަ ބިން އަތުލަން ވަނީ ހަމަޖައްސާފަ އެވެ. މިނިސްޓްރީން ބުނީ އެއްވެސް ބައެއްގެ އަމިއްލަ އިދާރީ މަސައްކަތްތަކެއް މިސްކިތުގައި ނުހިންގޭނެ ކަމަށާ އަމިއްލަ މުދާ ގުދަން ކުރުން ފަދަ ކަންކަން ވެސް ނުކުރެވޭނެ ކަމަށެވެ.
މިސްކިތް ބިނާކުރުމަށް ފަހު ސަރުކާރާ ހަވާލުކުރުމާއި މިސްކިތް އެޅުމަށް ބޭނުންވާ ފައިސާ ހުރިކަމުގެ ނުވަތަ މަސައްކަތް ފަށާއިރު ބޮޑު ބައެއް ހުރިކަމާއި ނިންމަން ބޭނުންވާ ފައިސާ ލިބޭނެކަން ކަށަވަރުކުރާނެ އެވެ.
ހުޅުމާލޭ ފޭސް ދޭއްގައި އެސްޖޭއިން ބިނާކުރަމުންދާ މިސްކިތުގެ މަސައްކަތުގެ އެއްބަސްވުމުގައި ސޮއިކޮށްފައިވަނީ، 2022 ވަނަ އަހަރުގެ ޖެނުއަރީމަހުގެ ތެރޭގައެވެ. އެސްޖޭއިން އެ މިސްކިތް ނިންމާގޮތަށް އޮތީ އަހަރުދުވަހުގެ ތެރޭގައެވެ.
Advertisement
This content is created and paid for by advertisers and does not involve Voice Journalists
