ހުޅުމާލެ ފޭސް ދޭއްގެ ރައްޔިތުންނާއި ބައްދަލްކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ބޭއްވެވި ބައްދަލްވުން ހަ ގަޑިއިރަށް ވުރެ ވެސް ދިގު ދެމިގެން ހިނގައްޖެ އެވެ.
މާލޭގެ ހުރިހާ އަވަށްތަކެއްގެ ރައްޔިތުންނާއި ވަކިވަކީން ބައްދަލްކުރެއްވުމަށް ފެއްޓެވި ސިލްސިލާ ބައްދަލްވުމުންތަކުގެ ތެރެއިން މިރޭ އޮތީ ހުޅުމާލެ ފޭސް ދޭއްގެ ރައްޔިތުންނާއި ބައްދަލްކުރެއްވުމެވެ. ހުޅުމާލެ ފޭސް ދޭއް, ސޮލާހުއްދީން ސުކޫލުގައި އޮތް ބައްދަލްވުން ފެށީ މިރޭ 9:00 ގަ އެވެ.
މިރޭގެ ބައްދަލްވުމުގައި ރައްޔިތަކު ރައީސާއި ވާހަކަ ދައްކަވަނީ --
ފުރަތަމަ އޮތީ ޖަލްސާ ތައާރަފު ކުރުމަށް ފަހު ބައްދަލްވުން ފެށުމުގެ ގޮތުން ރައީސުލްޖުމްހޫރިއްޔާ ބަސްފުޅެއް ވިދާޅުވުމެވެ. އެހެން ބައްދަލްވުންތަކެކޭ އެއްގޮތަށް ރައީސް ވާހަކަފުޅު ގެންދެވީ ވަަރަށް ކުރުކޮށް ދެ މިނެޓެއްހާއިރަށެވެ. އޭގެ ފަހުން މެންދަމު 12 ޖަހަން ވަރަށް ގާތްވުމާއި ހަމައަށް ރައްޔިތުންނަށް ވާހަކަ ދެއްކުމަށް ފުރުސަތު ދެއްވި އެވެ. އެ ފުރުސަތުގައި ވަރަށް ގިނަ ރައްޔިތުން ވާހަކަ ދެއްކި އެވެ.
އަދި ފަނަރަ ވަރަކަށް މިނެޓް ވަންދެން ރައީސް ވަނީ ރައްޔިތުންގެ ކަންބޮޑުވުންތަކާއި ގުޅޭގޮތުން ވާހަކަ ދައްކަވާފަ އެވެ. އޭގެ ފަހުން ވަކިވަކިން ރައްޔިތުންނާއި ބައްދަލު ކުރައްވަން ފެއްޓެވި އެވެ. މެންދަމު 12:00 ޖެހިއިރު ފެއްޓެވި ބައްދަލްކުރެވުންތައް ނިންމާލީ މެންދަމު 3:20 ގަ އެވެ.
މިރޭގެ ބައްދަލްވުމުގައި ރައްޔިތަކު ރައީސާއި ވާހަކަ ދައްކަވަނީ --
ވަރަށް ގިނަ ރައްޔިތުން ވަނީ އެ ތިން ގަޑިއިރާއި 20 މިނެޓް އިރުގެ ތެރޭގައި ރައީސްއާ ވަކީން ބައްދަލު ކުރައްވާފަ އެެވެ. އަދި ވަރަށް ގިނަ ރައްޔިތުން ވަނީ ސިޓީތަކާއި ނޯޓްތައް ރައީސަށް އަރުވާފަ އެވެ. އެ ހުރިހާ ސިޓީތަކާއި ނޯޓްތަކާއި ހަވާލުވެވަޑައިގަތެވެ. އަދި ސީދާ ރައީސާއި ވަކީން ވާހަކަ ދެއްކުމަށް ހުރިހާ ރައްޔިތުންނަށް ފުރުސަތު ދެއްވި އެވެ.
މިއީ އަވަށު ބައްދަލްވުންތަކުގެ ތެރެއިން އެންމެ ދިގު ބައްދަލުވުމެވެ. އަދި ރައީސަކު މިފަދަ ގޮތަކަށް ބޭއްވެވި އެންމެ ދިގު ބައްދަލްވުންވެސް މެ އެވެ.
Advertisement
This content is created and paid for by advertisers and does not involve Voice Journalists
