މާލެ އަދި ހުޅުމާލޭގެ މަގުތަކުގައި އާންމު ދަތުރު ފަތުރަށާއި ހިނގާބިނގާވެ އުޅުމަށް ދަތިވާގޮތަށް ޕާކްކޮށްފައި ހުންނަ އުޅަނދުތައް ޓޯވކުރުމަށާއި މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް ފުލުހުން ކުރަމުންގެންދާ މަސައްކަތުގެ ތެރެއިން ޑިސެންބަރު 18 އަދި 19 ވަނަ ދުވަހު މާލެއާއި ހުޅުމާލެއިން ޖުމުލަ 37 އުޅަނދެއް ޓޯވ ކޮށްފައިވާކަމަށް ފުލުހުން މައުލޫމާތުދީފިއެވެ.
ފުލުހުން މިއަދު އެކްސް ގައި ހިއްސާކުރި މައުލޫމާތުތަކުގައި ވާގޮުތުން 48 ގަޑިއިރުގެ ތެރޭގައި ހުޅުމާލެއިން 28 އުޅަނދު ވަނީ ޓޯވ ކުރެވިފައެވެ. މި ހުރިހާ އުޅަނދަކީވެސް ދެފުރޮޅުލީ އުޅަނދެވެ. މީގެތެރެއިން 18 ދެ ފުރޮޅުލީ އުޅަނދު ޓޯވ ކޮށްފައިވަނީ ގަވައިދާއި ހިލާފަށް ޕާކުކޮށްފައި ހުރުމުގެ ސަބަބުންނެވެ. އަދި 9 އުޅަނދު ޓޯވކޮށްފައިވަނީ ލައިސަންސް ނެތި ދުއްވުމުގެ ސަބަބުންނެވެ. އަނެއް 1 އުޅަނދު ޓޯވ ކޮށްފައިވަނީ ނުރައްކާތެރިގޮތަށް ދުއްވައިގެންނެވެ.
މީގެ ތެރެއިން 14 އުޅަނދެއް ވަނީ ޖޫރިމަނާ ކުރެވިފައެވެ.
ޑިސެންބަރު 18 އަދި 19 ވަނަ ދުވަހުގެ 48 ގަޑިއިރުގެ ތެރެގައި މާލެއިން ޓޯވ ކޮށްފައިވަނީ 9 އުޅަނދެކެވެ. އެއީ ވެސް ހުސް ދެފުރޮޅުލީ އުޅަނދެވެ.
އުޅަނދުތައް ޕާކުކުރާއިރު އާންމު ދަތުރު ފަތުރަށާއި ހިނގާބިނގާވެ އުޅުމަށް ދަތި ނުވާގޮތަށް ޕާކްކުރުމަށް ފުލުހުން އިލްތިމާޒްކުރެއެވެ.
Advertisement
This content is created and paid for by advertisers and does not involve Voice Journalists
