ހުޅުމާލޭ ފޭސް ތިނަކުން ހިއްކަންޖެހޭ ބިމުގެ 63.5 އިންސައްތަ ހިއްކާ ނިމިފައިވާކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް، އެމްއޭސީއެލުން ބުނެފިއެވެ.
އެމްއޭސީއެލުން އެކްސްގައި ކުރި ޕޯސްޓެއްގައި ބުނެފައިވަނީ، ފޭސް ތިނެއްގެ ބިން ހިއްކުމުގެ މަސައްކަތް ކަނޑައެޅިފައިވާ ތާވަލާއެއްގޮތަށް ވަރަށްބާރަށް ކުރިއަށްދާކަމަށެވެ. އެގޮތުން މިއަދާ ހަމަޔަށް އާއިރު 40 ހެކްޓަރުގެ ބިން ހިއްކައި ނިމިފައިވާކަމަށް އެމްއޭސީއެލުން ބުންޏެވެ. ފޭސް ތިނަކުން ހިއްކުމަށް ނިންމާފައިވަނީ 63 ހެކްޓަރެވެ.
ފޭސް ތިނަކުން ހިއްކި ސަރަހައްދު... ފޮޓޯ: އެމްއޭސީއެލް
ހުޅުމާލެ ފޭސް 3 ގެ ބިން ހިއްކުމުގެ މަސައްކަތް ފަށާފައިވަނީ މިއަހަރުގެ ސެޕްޓެމްބަރުމަހުގެ 24 ވަނަ ދުވަހުއެވެ. މި މަސައްކަތް މެދުކެނޑިފައި އޮތުމަށްފަހު އެންމެފަހުން މި މަސައްކަތް ފަށާފައިވަނީ މިދިޔަ ނޮވެމްބަރުމަހުގެ 10 ވަނަ ދުވަހުއެވެ.
ފޭސް ތިނެއްގެ ބިން ހިއްކުމުގެ މަސައްކަތް އަވަސްކުރުމަށް ސަރުކާރުން ވަނީ ބިންހިއްކުމުގައި ދުނިޔޭގެ އެންމެ މަޝްހޫރު އެއްކުންފުނި، ނެދަލޭންޑްސްގެ ބޮސްކާލިސްގެ ޑްރެޖަރެއް ގެނެސްފައެވެ. އެއީ 22,000 ސީބީއެމްގެ ޑްރެޖަރެކެވެ. ސަރުކާރުގެ އަމާޒަކީ މިއަހަރު ނިމުމުގެ ކުރިން ފޭސް ތިނެއްގެ ބިން ހިއްކުމުގެ މަސައްކަތް ނިންމައި މިއަހަރުގެ ތެރޭގައި އެތަނުން ގޯތި ދޫކޮށް ނިންމުމެވެ.
Advertisement
This content is created and paid for by advertisers and does not involve Voice Journalists
