ތިމާވެއްޓަށް ލިބުނު ގެއްލުންތަކާއި އަދި އެ ގެއްލުންތަާ ގުޅިގެން ކުރެވުނު ޖޫރިމަނާގެ އެކި މައްސަލަތަކުގައި ދައުލަތަށް 930 މިލިއަނަށްވުރެ ގިނަ ރުފިޔާ ނުލިބި އެބަހުރިކަމަށް އޮޑިޓް ރިޕޯޓުން ހާމަވެއްޖެއެވެ.

އޮޑިޓަރ ޖެނެރަލް ނެރެފައިވާ މިނިސްޓްރީ އޮފް އެންވަޔަރަމަންޓް ކްލައިމެޓް ޗޭންޖު އެންޑް ޓެކްނޮލޮޖީގެ 2019، 2020 އަދި 2021 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓްގައި ބުނެފައިވަނީ، ތިމާވެއްޓަށް ލިބޭ ގެއްލުންތަކާއި ގުޅިގެން ކޮށްފައިވާ ޖޫރިމަނާތަކުގެ މައްސަލަތަކާ ގުޅިގެން 2024 ވަނަ އަހަރުގެ ސެޕްޓެމްބަރުމަހުގެ 16 ވަނަ ދުވަހުގެ ނިޔަލަށް 930،328،480 މިލިއަން ރުފިޔާ ނުލިބި ވާކަމަށެވެ.

އޮޑިޓް ރިޕޯޓްގައި މި މައްސަލަތަކުގެ ތަފްސީލު ގެނެސްދީފައި ނުވާއިރު، މިކަމާ ގުޅިގެން ދިން ލަފާގައި ވަނީ، ދައުލަތަށް ލިބެންޖެހޭ ފައިސާ ހޯދުމުގައި މާލިއްޔަތު ގަވާއިދުގައި ބަޔާންކޮށްފައިވާ އޮންނަ އުސޫލުގެ ތެރެއިން ދައުލަތަށް ލިބެންޖެހޭ ފައިސާ ހޯދުމުގެ ކަންކަން ކުރިއަށްގެންދިއުމަށް މިނިސްޓްރީއަށް އަންގާފައެވެ.

ތިމާވެއްޓަށް ލިބުނު ގެއްލުންތަކާއި އަދި ޖޫރިމަނާގެ ގޮތުގައި ބިލިއަނަކާ ގާތްކުރާ އަދަދަކަށް ފައިސާ ލިބެންޖެހޭކަން އޮޑިޓް ރިޕޯޓްގައި ފާަހގަކޮށްފައިވާއިރު، ރާއްޖޭގެ އެކި ސަރަހައްދުތަކުގެ ފަރަށް އަރާ ބޭރުގައުމުތަކުގެ ބޯޓުފަހަރުތައް ފުރައިގެންދާތީ ދައުވާ ނުކުރެވުމުގެ މައްސަލަ ވަރަށްބޮޑެވެ. މިކަން އޭޖީ އޮފީހުގެ ކައުންސެލް ޖެނެރަލް ވަނީ، 2024 ވަނަ އަހަރުގެ ތެރޭގައި ރައްޔިތުން މަޖިލީހުގެ އެންވަޔަރަމަންޓް އެންޑް ކްލައިމެޓް ޗޭންޖު ކޮމިޓީގައިވެސް ފާަހަގަކޮށްފައެވެ.

އޭޖީ އޮފީހުން ބުނެފައިވަނީ ފަރަށް އަރާ ބޭރުގެ ބޯޓުފަހަރު ދައުވާ ކުރުމުގެ ކުރިން ފުރައިގެންދާ މައްސަލަ ބޮޑުވެފައިވާކަމަށެވެ. އެހެންވުމުން ބޯޓުފަހަރު ފަރަށް އެރުމުން ދައުލަތަށް ހޯދަންޖެހޭ ފައިސާ ހޯދުމުގައި ތަކުލީފްތަކެއް ކުރިމަތިވާކަން އޭޖީ އޮފީހުން ވަނީ ފާހަގަކޮށްފައެވެ.

ބޯޓުފަހަރު ފަރަށް އެރުމުގެ މައްސަލާގައި މީގެ ކުރިން އީޕީއޭއިން ވަނީ ބޮޑެތި އަދަދުތަކުން އުޅަނދުފަހަރު ޖޫރިމަނާކޮށްފައެވެ. އެގޮތުން މިހާތަނަށް ބޯޓެއް އެންމެ ބޮޑުއަދަދަކުން ޖޫރިމަނާކުރި އެއް މައްސަލައަކީ މީގެ 4 އަހަރު ކުރިން ކ.އަތޮޅު ރަސްފަރީ ހުޅަނގުފަރާތު ފަރަށް ޕަނަމާގެ ބޯޓެއް އެރުމުން ކުރި ޖޫރިމަނާއެވެ. އެ މައްސަލާގައި ޕަނަމާގެ އެ ބޯޓު ވަނީ 900 މިލިއަން ރުފިޔާއިން ޖޫރިމަނާކޮށް ފައިސާ ދެއްކުމަށް އަންގާފައެވެ.