އުރީދޫ މޯލްޑިވްސްގެ މިދިޔަ އަހަރުގެ ވިޔަފާރީގެ ފައިދާއިން ހިއްސާއަކަށް 3.54 ރުފިޔާ ބެހުމަށް ނިންމައިފިއެވެ.

އުރީދޫއިން މިގޮތަށް ނިންމާފައިވަނީ މިދިޔަ ބުދަދުވަހުގެ ރޭ ބޭއްވި އެ ކުންފުނީގެ މިދިޔަ އަހަރުގެ އަހަރީ އާއްމު ޖަލްސާގައެވެ. އުރީދޫގެ އޭޖީއެމް ބާއްވާފައިވަނީ ހުޅުމާލޭގައި ހުންނަ އެކުންފުނީގެ ހެޑް އޮފީހުގައެވެ. ހިއްސާއަކަށް 3.54 ރުފިޔާ ބެހުމަށް ނިންމިއިރު، މިއީ ޑިރެކްޓަރުްނގެ ބޯޑުން ބެހުމަށް ފާސްކުރި އަދަދުކަން ފާހަގަކޮށްލެވެއެވެ.

އުރީދޫ އަހަރީ އާއްމުޖަލްސާގެ ތެރެއިން.. ފޮޓޯ: އުރީދޫ

އެ ޖަލްސާގައި އުރީދޫގެ ހިއްސާދާރުންގެ ތެރެއިން ޖުމްލަ 353 ހިއްސާދާރުން ބައިވެރިވިއިރު، 144 ހިއްސާދާރުން ޖަލްސާއަށް ދިޔަކަން ފާހަގަކޮށްލެވެއެވެ. އުރީދޫއިން ބުނީ 98 އިންސައްތަ ހިއްސާދާރުން ޖަލްސާގައި ތަމްސީލްކޮށްފައިވާއިރު، އެއީ ކުންފުނީގެ 144,202,029 ހިއްސާކަމަށެވެ.

މިދިޔަ އަހަރުގެ ވިޔަފާރީގެ ފައިދާއިން ހިއްސާގެ ފައިދާގެ ގޮތުގައި ހިއްސާއަކަށް 3.54 ރުފިޔާ ބެހުމަށް ނިންމިއިރު، ކުންފުނީގެ ބޯޑުގައި މެޖޯރިޓީ ހިއްސާދާރުން ތަމްސީލްކުރާ ޑިރެކްޓަރެއްގެ ގޮތުގައި ފާތިމަތު ސުލްތޯން އަލް-ކުވާރީ އިންތިހާބު ކޮށްފައިވާއިރު، ބޯޑު ޑިރެކްޓަރަކަށް ޢަބްދުﷲ އަލީ ވަނީ އިންތިހާބުކޮށްފައެވެ.

އުރީދޫގެ އެކްސްޓަރނަލް އޮޑިޓަރަކަށް ހަމަޖައްސާފައިވަނީ، ކޭޕީއެމްޖީއެވެ.