ކުށުގެ ވެށިން ހޯދާ ފައިސާ ބެލެހެއްޓުމުގައި މޯލްޑިވްސް ޕޮލިސް ސާވިސްއިން އެއްވެސް ކަހަލަ އުސޫލެއް ހަމަޖައްސާފައި ނުވާކަމަށް ދައުލަތުގެ އޮޑިޓަރ ޖެނެރަލް ވިދާޅުވެއްޖެއެވެ.

އޮޑިޓަރ ޖެނެރަލްގެ އޮފީހުން ނެރެފައިވާ ފުލުހުންގެ 2018، 2019 އަދި 2020 ވަނަ އަހަރުގެ ކޮމްޕްލަޔަންސް އޮޑިޓްގައި ބުނެފައިވަނީ، ދިވެހި ފުލުހުންގެ ހިދުމަތުގެ ފައިސާ އާއި ފައިސާގެ ގޮތުގައި ބެލެވޭ ތަކެތި ޗެކްކުރިއިރު، ކުށުގެ ވެށިން ނަގާ ފައިސާ ވަކި ތިޖޫރީއެއްގައި ބަލަހައްޓަމުން ގެންދާކަން ފާހަގަކުރެވިފައިވާ ކަމަށެވެ. 

މި ފައިސާގެ ތެރޭގައި އެތައް އަހަރެއްގެ ކުރީގެ ކޭސްތަކާއި ގުޅިގެން ނަގާފައިވާ ފައިސާ ހިމެނެއެވެ. އޮޑިޓް ރިޕޯޓްގައި ބުނެފައިވަނީ ތިޖޫރީގައި ހުރި ފައިސާގެ ތެރެއިން ބައެއް ފައިސާ ގިނަދުވަސްވުމުގެ ސަބަބުން ވީދި ބޭނުންނުކުރެވޭ ވަރަށް ހަލާކުވެފައިވާކަމަށެވެ. 

އޮޑިޓް ރިޕޯޓްގައި ބުނީ ކުށުގެ ވެށިން ނަގާ ފައިސާ ފުލުހުންގެ ތިޖޫރީގައި ބަހައްޓަމުންދާއިރު، ފައިސާ ކުށުެގ ވެށިން ހަވާލުވުމާއި، ފައިސާ އަތުލާފައިވާ ފަރާތަށް އަނބުރާ ދޭންޖެހޭ ހާލަތުގައި ފައިސާ އަނބުރާ ހަވާލުކުރުމާއި، ފައިސާ ދައުލަތަށް އަނބުރާ ނަގަންޖެހޭ ހާލަތުގައި އަނބުރާ ނެގުމަށް، ފައިސާ ތިޖޫރީއަށް ވެއްދުމާއި ދޫކުރުމުގައި އަމަލުކުރާނޭ ވަކި އުސޫލެއް ކަނޑައެޅިފައިނުވާކަމަށެވެ.

ރިޕޯޓްގައި ބުނީ މިގޮތަށް ގިނަ އަދަދެއްގެ ފައިސާ ބަލަހައްޓަމުންދާއިރު، ވަކި އުސޫލެއް ކަނޑައެޅުމަކީ މުހިންމު ކަމެއް ކަމަށާއި، 2022 ވަނަ އަހަރުގެ އޮަގަސްޓްމަހުގެ 23 ވަނަ ދުވަހާ ހަމަޔަށް 9 މިލިއަނަށްވުރެ ގިނަ ރުފިޔާ ހުރިކަމަށެވެ.

މިކަމާ ގުޅިގެން އޮޑިޓަރ ޖެނެރަލް ވަނީ ކުށުގެ ވެށިން ނެގޭ ފައިސާ ތިޖޫރީގައި ބެލެހެއްޓައި އަދި އެ ނަގަންޖެހޭ ހާލަތްތަކުގައި ނެގުމަށް އަމަލުކުރާނޭ ވަކި އުސޫލެއް ކަނޑައެޅުމަށް އަންގާފައެވެ.