ބީއެމްއެލްގެ ކޯޕަރޭޓް ނިންމުމާއެކު މޯލްޑިވްސް ސްޓޮކް އެކްސްޗޭންގެ މާކެޓް ކެޕިޓަލައިޒޭޝަން ރެކޯޑް އަދަދަކަށް މައްޗަށް ހިނގައްޖެއެވެ.

ބީއެމްއެލުން ވަނީ މިފަހުން ބޭއްވި އެކުންފުނީގެ މިދިޔަ އަހަރުގެ އަހަރި އާއްމު ޖަލްސާގައި ހިއްސާދާރުން ބޯނަސް ހިއްސާ ދޫކުރުމަށާއި ޝެއަރ ސްޕްލިޓް (ހިއްސާ ބައިކުރުން) ފާސްކޮށްފައެވެ. އެއާއެކު ހިއްސާގެ ބާޒާރުގައި އެކަމުގެ އެނގުންވެ، ރާއްޖޭގެ މާލީ ބާޒާރުގެ ތާރީޚުގައި ފާހަގަކޮށްލެވޭ ފަދަ ބޮޑު ބަދަލެއް ވަނީ އައިސްފައެވެ.

ބީއެމްއެލްގެ ބޯނަސް ހިއްސާ ދޫކުރުމަށް ނިންމައި ހިއްސާ ބައިކުރުމުގެ ކުރިން ހިއްސާގެ ބާޒާރުގައި މާކެޓް ކެޕިޓަލައިޒޭޝަން ހުރީ މާކެޓް ކެޕިޓަލައިޒޭޝަން ހުރީ ގާތްގަނޑަކަށް 33 ބިލިއަން ރުފިޔާގައެވެ. ނަމަވެސް، ބީއެމްއެލްގެ އަހަރީ އާންމު ޖަލްސާގައި ހިއްސާދާރުން ބޯނަސް ހިއްސާ ދޫކުރުމަށާއި ޝެއަރ ސްޕްލިޓް (ހިއްސާ ބައިކުރުން) ފާސްކުރުމާއެކު، މާކެޓް ކެޕިޓަލައިޒޭޝަން ވަނީ 62 ބިލިއަން ރުފިޔާއަށް އުފުލިފައެވެ. މާކެޓް އަގަށް އައި މި ބޮޑު ބަދަލަކީ މުޅިންހެން ބީއެމްއެލްގެ މި ނިންމުމާއި ގުޅިގެން އައި ބަދަލެއްކަން ފާހަގަކުރެވެއެވެ.

މިއާއެކު ބީއެމްއެލްގެ މާކެޓް ކެޕިޓަލައިޒޭޝަން ވަނީ 3.6 ބިލިއަން ރުފިޔާއިން 31.9 ބިލިއަން ރުފިޔާއަށް އަރާފައެވެ. މިއާއެކު އެ ބޭންކް ވެފައިވަނީ މޯލްޑިވްސް ސްޓޮކް އެކްސްޗޭންޖްގައި ލިސްޓުކޮށްފައިވާ އެންމެ ބޮޑު ކުންފުންޏަށެވެ.

މާކެޓަށް އައި މި ބަދަލު ބޮޑަށް ގުޅިފައިވަނީ ބީއެމްއެލްގެ ހިއްސާ ގަނެވިއްކުމަށް މަގުފަހިވެ، ލިކުއިޑިޓީ އިތުރުވުމާއެވެ. މިދިޔަ އަހަރު ބީއެމްއެލްގެ 50 ރުފިޔާގެ މޫނުމަތީ އަގުގެ ހިއްސާއެއްގެ އެވްރެޖް މާކެޓްގެ އަގު ހުރީ ގާތްގަނޑަކަށް 800 ރުފިޔާގައެވެ. ނަމަވެސް، ބޯނަސް އިޝޫ އާއި ޝެއަރ ސްޕްލިޓަށްފަހު، 5 ރުފިޔާގެ މޫނުމަތީ އަގުގެ ހިއްސާއެއްގެ މާކެޓް އަގު މިހާރު ވަނީ ގާތްގަނޑަކަށް 200 ރުފިޔާއަށް ތިރިވެފައެވެ. މިއީ، ނިސްބަތުން މިނިންމުމުގެ ކުރިން ގަނެވިއްކުމުގެ މުއާމަލާތްތަކުގެ އަގަށް ބަލއިފިނަމަ ގާތްގަނޑަކަށް %650 ގެ މާކެޓް އަގުގެ ކުރިއެރުމެކެވެ.

ބީއެމްއެލުން ބުނީ މި ބަދަލުގެ ސަބަބުން މިވަގުތު ދެ ނަތީޖާއެއް ފެނިގެންދިޔަ ކަމަށެވެ. ފުރަތަމަ ކަމެއްގެ ގޮތުގައި ފާހަގަކޮށްފައިވަނީ، މިހާރު ތިބި ހިއްސާދާރުން މާކެޓްގައި ހަރަކާތްތެރިވުމަށް ހިތްވަރު ލިބި، ހިއްސާ ވިއްކުމުގެ ހަރަކާތްތައް އިތުރުވުމެވެ. ދެވަނަ އަދި ކަމަކީ، އާ އިންވެސްޓަރުންނަށް، ހާއްސަކޮށް ޒުވާނުންނަށް، މާކެޓަށް ވަނުމަށް އޮތް ހުރަސްތައް ކުޑަވެ، ގިނަ ބަޔަކަށް މާކެޓްގައި ބައިވެރިވުމުގެ ފުރުސަތު ހުޅުވިގެންދިއުމެވެ.

މިކަމާ ގުޅިގެން މޯލްޑިވްސް ސްޓޮކް އެކްސްޗޭންޖުން ބުނީ، ހިއްސާގެ ބާޒާރުގައި ދިގުމުއްދަތަކަށް އިންވެސްޓްކޮށްގެން ތިބި ފަރާތްތަކަށްބޮޑު ފައިދާއެއް ލިބިގެންދާނޭކަމަށެވެ. ހަމައެއާއެކު، މީގެ ސަބަބުން ޒުވާނުންނާއި މުޅިން އަލަށް އިންވެސްޓްކުރާ ފަރާތްތަކަށް މާކެޓަށް ވަދެ، ކުންފުނީގެ މުސްތަގުބަލުގެ ކުރިއެރުމުގައި ބައިވެރިވުމުގެ ފުރުސަތު ލިބިގެންދާނޭކަމަށްވެސް ސްޓޮކް އެކްސްޗޭންޖުން ވަނީ ބުނެފައެވެ.

މިއީ ލިސްޓުކޮށްފައިވާ އެހެން ކުންފުނިތަކަށްވެސް ލިބިގެންދިޔަ މުހިންމު ސިގްނަލެއްކަމަށް ސްޓޮކް އެކްސްޗޭންޖުން ވަނީ ފާހަގަކޮށްފައެވެ. އެގޮތުން މިހާރު ޕްރައިސް-ޓު-ބުކް ރޭޝިއޯ ގާތްގަނޑަކަށް 0.66 ގައި ހުރި އަދި ގާތްގަނޑަކަށް %4 ގެ ޑިވިޑެންޑް ޔީލްޑެއް ލިބޭ އެސްޓީއޯ ފަދަ ކުންފުނިތަކަށްވެސް މިފަދަ ފިޔަވަޅުތަކެއް އެޅުމުން ފައިދާ ކުރާނެއެވެ. ދޫކޮށްފައިވާ ހިއްސާގެ އަދަދު ނިސްބަތުން މަދު އެސްޓީއޯއަށްވެސް، ރަނގަޅަށް ރޭވިފައިވާ ޝެއަރ ސްޕްލިޓެއް މެދުވެރިކޮށް ލިކުއިޑިޓީ އިތުރުކޮށް، އިންވެސްޓަރުންގެ ބައިވެރިވުން އިތުރުކުރުމުގެ ފުރުސަތު އޮތްކަމަށް ސްޓޮކް އެކްސްޗޭންޖުން ފާހަގަކުރެއެވެ.