މާލޭގައި ކުދިން ބައިތިއްބާ އެކޮމޮޑޭޝަނެއްގައި އުމުރުން 18 އަހަރުގެ އަންހެނަކު ނިޔާވި ހާދިސާއާ ގުޅިގެން ހަގީގަތެއް ނެތް ވާހަކަތައް ނުފަތުރަން އެދިއްޖެ އެވެ.
ފުލުހުން އެކަމަށް އެދިފައިވަނީ މީޑިއާތަކަށް ފޮނުވި ސްޓޭޓްމަންޓެއްގަ އެވެ. ރޭ ދަންވަރު, މަޖުދުއްދީން ދަނާލުގައި ނިޔާވެފައި އޮއްވާ ފެނުނީ ގދ. ތިނަދޫ, ދެނޫނު މަރިޔަމް ހާސިދާ އެވެ.
ހާސިދާ ނިޔާވި ހާދިސާއާ ގުޅިގެން ދިވެހި ފުލުހުންގެ ޚިދުމަތުން ދަނީ ތަހުގީގު ކުރަމުން ކަމަށާ މި މައްސަލައިގެ ވަށައިގެންވާ އެންމެހައި ކަންކަން ބަލައި، އަޅަންޖެހޭ ފިޔަވަޅުތައް އެޅުމަށްޓަކައި ކަމާބެހޭ އިދާރާތަކާ ގުޅިގެން އެ ހިދުމަތުން ދަނީ މަސައްކަތް ކުރަމުން ކަމަށްވެސް ބުންޏެވެ.
މި މައްސަލައާ ގުޅޭގޮތުން ސޯޝަލް މީޑިއާ އާއި އެނޫންވެސް ވަސީލަތްތަކުގައި ހަގީގަތާ ހިލާފު ވާހަކަތަކާއި، އަސާސެއް ނެތް ތުހުމަތުތަކުގެ އިތުރުން ވީޑިއޯ ފަދަ ތަކެތި ފަތުރަމުންދާކަން މި ޚިދުމަތަށް ވަނީ ފާހަގަކުރެވިފައި ކަމަށް ފުލުހުން ބުންޏެވެ. އަދި ބުނީ ސައްހަކަން ކަށަވަރުނުވާ މިފަދަ މައުލޫމާތު ފެތުރުމަކީ، މަރުހޫމްގެ އާއިލާއަށް ލިބޭ އިތުރު ހިތްދަތިކަމަކަށް ވުމުގެ އިތުރުން، ފުލުހުން ހިންގަމުންދާ ޖިނާއީ ތަހުގީގަށް ހުރަސްއެޅިދާނެ ކަމެއް ކަމަށެވެ.
އެހެންކަމުން، ސައްހަކަން ކަށަވަރުނުކުރެވޭ މި ފަދަ މައުލޫމާތު ނުފެތުރުމަށް އެންމެހައި ފަރާތްތަކަށް ވަނީ އިލްތިމާސް ކޮށްފަ އެވެ.
ހާސިދާގެ ޖަނާޒާ މިރޭ އިޝާ ނަމާދަށް ފަހު އާ ސަހަރާގައި އޮންނާނެ ކަމަށް އާއިލާ އިން ވަނީ ބުނެފަ އެވެ.
Advertisement
This content is created and paid for by advertisers and does not involve Voice Journalists
