ކޮމަންވެލްތު ޕާލަމެންޓަރީ އެސޯސިއޭޝަން (ސީ.ޕީ.އޭ) އާއި ރައްޔިތުންގެ މަޖިލިސް ގުޅިގެން ބާއްވާ "ސީ.ޕީ.އޭ ސްމޯލް ބްރާންޗަސް ވޯކްޝޮޕް 2026" ދިވެހިރާއްޖޭގައި ބޭއްވުމަށް ހަމަޖެހިފައިވާކަން ރައްޔިތުންގެ މަޖިލީހުން އިއުލާންކޮށްފިއެވެ.

ރައްޔިތުންގެ މަޖިލީހުން މިކަން އިއުލާންކޮށްފައިވަނީ، މިއަދު ނެރުނު ނޫސްބަޔާނެއްގައެވެ. އެގޮތުން، މި ވޯކްޝޮޕް ކުރިއަށްދާނީ އެޕްރީލް 27 އިން 29 އަށް މާލޭގެ ހޮޓެލް ޖެންގައެވެ.

މި ވޯކްޝޮޕަކީ ކޮމަންވެލްތު ސެކްރެޓޭރިއަޓާއި، ކެނޭޑިއަން އޮޑިޓް އެންޑް އެކައުންޓަބިލިޓީ ފައުންޑޭޝަންގެ އިތުރުން މާލިއްޔަތާ ބެހޭ މާހިރުންގެ އެހީތެރިކަމާއެކު ބޭއްވޭ ވޯކްޝޮޕްއެކެވެ.

"ކުދި ޤައުމުތަކުގައި ވަރުގަދަ އަދި މިނިވަން ޤާނޫނު ހަދާ މަޖިލިސްތައް" ގެ ޝިއާރުގެ ދަށުން ބާއްވާ މި ވޯކްޝޮޕްގައި، ކޮމަންވެލްތުގެ ކުދި ޤައުމުތަކުގެ ޤާނޫނު ހަދާ މަޖިލިސްތަކުގެ ރައީސުންނާއި، މެންބަރުންނާއި، އިދާރީ އިސް މުވައްޒަފުންގެ އިތުރުން ހިންގުމުގެ ދާއިރާގެ މާހިރުން ބައިވެރިވަޑައިގަންނަވާނެ ކަމަށް ރައްޔިތުންގެ މަޖިލީހުން މައުލޫމާތުދެއެވެ.

އެގޮތުން، މީގެތެރޭގައި، ބެލީޒް ޤާނޫނު ހަދާ މަޖިލީހުގެ ރައީސް އަދި ސީޕީއޭ ސްމޯލް ބްރާންޗަސްގެ ރައީސް، ވެލެރީ ވުޑްސްއާއި، ސަމޮއާގެ ޤާނޫނު ހަދާ މަޖިލީހުގެ ރައީސް، އައުއަޕާއު މުލިޕޮލާ އަލޮއިތަފުއާ މުލިޕޮލާއާއި، ކޭމަން އައިލެންޑްސްގެ ޤާނޫނު ހަދާ މަޖިލީހުގެ ނައިބު ރައީސް، ޕަލީނާ މެކްގޮ-ލަމްސްޑެންއާއި، ސެއިންޓް ލޫސިއާގެ ޤާނޫނު ހަދާ މަޖިލީހުގެ ނައިބު ރައީސް، ޑީލް ލީ އަދި ސްރީލަންކާގެ ޖަސްޓިސް، މުރްދު ފެނާންޑޯ ހިމެނޭނެއެވެ.

ދިވެހިރާއްޖޭގެ ވަފުދުގައި އިސްކޮށް ހުންނަވާނީ ރައްޔިތުންގެ މަޖިލީހުގެ ނައިބު ރައީސް، އަޙްމަދު ނާޒިމްއެވެ. އަދި އެމަނިކުފާނަކީ ސީޕީއޭގެ އޭޝިއާ ސަރަހައްދުގެ ސަރަހައްދީ މަންދޫބެކެވެ. މީގެއިތުރުން، މިހާރު ސީޕީއޭ އޭޝިއާ ސަރަހައްދުގެ ރިޔާސަތު ބަލަހައްޓާ ގައުމަކީ ދިވެހިރާއްޖެއެވެ.

މިއީ، ކުދި ޤައުމުތަކުގެ މަޖިލިސްތަކުގެ މަސައްކަތުގެ ހަލުވިކަމާއި، ދެމެހެއްޓެނިވިކަމާއި، މިނިވަންކަން ހަރުދަނާކުރުމަށްޓަކައި ހިންގޭ މުހިންމު ވޯކްޝިޕެއްކަން ރައްޔިތުންގެ މަޖިލީހުން ވަނީ ބަޔާނުގައި ފާހަގަކޮށްފައެވެ. އެގޮތުން މި ވޯކްޝޮޕްގައި، މައިގަނޑު ގޮތެއްގައި އަލިއަޅުވާލާނީ ޑިމޮކްރެތިކް ހިންގުމެއްގެ އެންމެ މުހިންމު އަސާސަތައް ކަމަށްވާ، މުއައްސަސާތަކުގެ ހިންގުން ހަރުދަނާކުރުމާއި، ދައުލަތުގެ ބާރުތައް ވަކިވެފައި އޮތުމުގެ އުސޫލު ވަރުގަދަކުރުމުގެ އިތުރުން، ޒިންމާދާރުކުރުމާއި ފާރަވެރިވުމުގެ ނިޒާމުތައް އިތުރަށް ހަރުދަނާކުރުމުގެ މައްޗައްކަން ރައްޔިތުންގެ މަޖިލީހުން ބުނެއެވެ.

މި ވޯކްޝޮޕްގެ ތެރޭގައި، އެކި ދާއިރާތަކުގެ މާހިރުން ކުރަށްގެންދާ ސެޝަންތަކާއި، ތަޖުރިބާ ހިއްސާކުރުމާއި، ތަފާތު ކޭސް ސްޓަޑީތަކާއި، އަދި އަމަލީ ތަމްރީނުތައް ކުރިއަށްދާނެކަން ރައްޔިތުންގެ މަޖިލީހުން ބުނެއެވެ. 

ރައްޔިތުންގެ މަޖިލީހުން އިތުރަށް ބުނި ގޮތުގައި، ދިވެހިރާއްޖޭގައި މި ބައްދަލުވުން ބޭއްވުމަކީ، ޑިމޮކްރެޓިކް ހިންގުން ހަރުދަނާކުރުމަށް ރާއްޖެއިން ކުރާ މަސައްކަތާއި، ކޮމަންވެލްތުގެ ޤައުމުތަކުގެ މަޖިލިސްތަކުގެ މެދުގައި ރާއްޖެއިން އަދާކުރާ މުހިންމު ދައުރު ރަމްޒުކޮށްދޭ ކަމެކެވެ. އަދި މިއީ، ދުނިޔޭގެ ފެންވަރުގައި ވަރުގަދަ، މިނިވަން، އަދި ޒިންމާދާރު މަޖިލިސްތަކެއް ބިނާކުރުމަށް ކުރެވޭ މަސައްކަތުގައި ރާއްޖޭގެ ބައިވެރިވުން އިތުރުވެގެންދާނެ ކަމެއް ކަމަށެވެ/