ރައްޔިތުންގެ މަޖިލީހުގެ ނައިބު ރައީސްގެ މަގާމަށް އޭދަފުށީ ދާއިރާގެ މެންބަރު އަހްމަދު ސަލީމް (ރެޑްވޭވް ސަލީމް) މިއަދު އިންތިހާބުކޮށްފިއެވެ.
މަޖިލީހުގެ މިއަދުގެ ޖަލްސާގައި މެންބަރުންގެ މެދުގައި ނެގި ސިއްރު ވޯޓުގައި ސަލީމް މި މަގާމަށް ހޮވިވަޑައިގެންނެވީ 62 މެންބަރުންގެ ވޯޓާއެކު ބޮޑު އަގުލަބިއްޔަތަކުންނެވެ.
ސަލީމްއާ ވާދަކުރެއްވީ އެމްޑީޕީއަށް ނިސްބަތްވެވަޑައިގަންނަވާ ވައިކަރަދޫ ދާއިރާގެ މެންބަރުން ހުސައިން ޒިޔާދު (ފިއްޓެ) އެވެ. ޒިޔާދު އަށް ލިބިވަޑައިގެންނެވީ 10 ވޯޓެވެ.
އަދި ބާތިލު 2 ވޯޓު ލާފައިވާތީ ޖުމްލާ ވޯޓު ގުނާފައި ވަނީ އެ ދެ ވޯޓު ނުހިމަނާ އެވެ.
މަޖިލީހުގެ މިއަދުގެ ޖަލްސާގައި ސަލީމް މަޖިލީހުގެ ނައިބު ރައީސްގެ މަގާމަށް ގެންނަން ހުށަހެޅީ ވެރިކަންކުރާ ޕީއެންސީގެ ޕީޖީ ލީޑަރު އިބްރާހިމް ފަލާހްއެވެ.
އެ މަގާމަށް ފިއްޓެ ގެންނަން ހުށަހެޅުއްވީ ހަނިމާދޫ ދާއިރާގެ އެމްޑީޕީގެ މެމްބަރު އަބްދުލްޣަފޫރު މޫސާ އެވެ.
މަޖިލީހުގެ ނާއިބް ރައީސްގެ މަގާމު ހުސްވީ އެމަގާމުގައި ހުންނެވި ދިއްގަރު ދާއިރާގެ މެންބަރު އަހުމަދު ނާޒިމް މަގާމުން އިސްތިއުފާ ދެއްވުމުންނެވެ. އޭނާ އިސްތިއުފާ ދެއްވީ އިތުބާރު ނެތްކަމުގެ މައްސަލައެއް އޭނާ ނިސްބަތްވެވަޑައިގަންނަވާ ޕީއެންސީން ހުށަހަޅައި މައްސަލަ ކުރިއަށް ގެންދަން ތައްޔާރުވެފައިވަނިކޮށެވެ.
Advertisement
This content is created and paid for by advertisers and does not involve Voice Journalists
