ހުޅުމާލޭ ފޭސް އެކެއްގެ އިމާރާތެއްގެ ތެރޭގައި މަސްތުގެ ހާލަތުގައި ތިބިކަމަށް ބެލެވޭ އަންހެނަކާއި ފިރިހެނަކު މިއަދު ފުލުހުންގެ ބެލުމުގެ ދަށަށް ގެންގޮސްފިއެވެ.

ސޮޗަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި އެ ދެ މީހުން ކައިރީ ޓްރެފިކް ޕޮލިސް އޮފިސަރަކު ހުރިނަމަވެސް އެމީހުންގެ އަމަލުތައް ހުރީ އާއްމު އިޖުތިމާއީ މިންގަނޑުން ބޭރުވާ ފަދަ ގޮތަކަށެވެ. އެގޮތުން އޮފިސަރު ހުރިނަމަވެސް ފިރިހެން މީހާ ދިޔައީ އަންހެންކުއްޖާއާ ގާތްވެ އޭނާގެ ގައިގައި އަތްލަމުންނެވެ.

މަންޒަރުދުށް ބައެއް ފަރާތްތަކުން ވަނީ އެމީހުން އެތަނުގައި އަޑުގަދަކޮށް މާރާމާރީ ހިންގިކަމަށް ބުނެފައެވެ. އަދި އެވަގުތު އެތަނުގައި ހަތަރުވަރަކަށް މީހުން ތިބިކަމަށްވެސް އެމީހުން ބުންޏެވެ. ނަމަވެސް ވީޑިއޯއިން ފެންނަނީ ދެމީހެކެވެ.

މި މައްސަލައާ ގުޅިގެން ފުލުހުން ބުނީ، އެތަނަށް ފުލުހުން ގޮސް ބަލަންޖެހޭ ކަންކަން ބަލަމުން އަންނަކަމަށެވެ. އެތަނުން ބަނގުރާ ހުސްކުރި ފުޅިއެއް ފެނުނުކަމަށް ފުލުހުން ވަނީ ބުނެފައެވެ.

މި މައްސަލައާ ގުޅިގެން ފުލުހުންގެ ބެލުމުގެ ދަށަށް ހަތަރު މީހަކު ވަނީ ގެންގޮސްފައެވެ. އޭގެ ތެރޭގައި ހިމެނެނީ، އުމުރުން 26 އަހަރާއި 29 އަހަރުގެ ދެ އަންހެނުންނާއި އުމުރުން 34 އަހަރާއި 24 އަހަރުގެ ދެ ފިރިހެނުންނެވެ. މި އެންމެންނަކީވެސް ދިވެހިންނެވެ.