މޯލްޑިވްސް ޒަކާތު ހައުސްއިން މަތީތައުލީމަށް ހާއްސަކޮށް ހުޅުވާލި ސްކޮލަރޝިޕްގެ މުއްދަތު މިއަދު އިތުރުކޮށްފިއެވެ.

ޒަކާތު ހައުސްއިން މިއަދު ބުނީ، ކުރިން ސްކޮލަރޝިޕަށް ކުރިމަތިލުމުގެ މުއްދަތު މިއަދުގެ ނިޔަލަށް އޮތްނަމަވެސް ސުންގަޑި މިހާރު އަންނަ އޮގަސްޓްމަހުގެ 16 ވަނަ ދުވަހުގެ ނިޔަލަށް އިތުރުކޮށްފައިވާކަމަށެވެ. އެހެންކަމުން މި ސްކޮލަރޝިޕަށް ކުރިމަތިލާން ބޭނުންވާ ފަރާތްތަކަށް އޮގަސްޓްމަހުގެ 16 ވާ 14:00 ގެ ކުރިން ހުށަހެޅުމަށް ޒަކާތު ހައުސްއިން އެދެއެވެ.

ޒަކާތު ހައުސްއިން ބުނީ މި ސްކޮލަރޝިޕު ޕުރޮގުރާމަކީ ރާއްޖެއާއި ރާއްޖޭން ބޭރުން މާސްޓަރސް (ލެވެލް 9)އާއި ޕީ.އެޗް.ޑީ (ލެވެލް 10)އަށް ކިޔަވަން ބޭނުންވާ ދިވެހި ދަރިވަރުންނަށް މާލީ އެހީތެރިކަން ފޯރުކޮށްދިނުމަށް ހުޅުވާލައިފައިވާ ފުރުޞަތެއް ކަމަށެވެ. މި ޕުރޮގުރާމުގެ ދަށުން ޖުމުލަ 40 ފުރުޞަތު ހުޅުވާލާފައިވާއިރު، އޭގެ ތެރޭގައި ހިމެނެނީ ރާއްޖޭގައި ކިޔެވުމަށް 10 ފުރުޞަތާއި ރާއްޖޭން ބޭރުގައި ކިޔެވުމަށް 20 ފުރުޞަތެވެ. މީގެ ތެރޭގައި ސައުދީ އަރަބިއްޔާއާއި މިޞްރުގައި މިހާރު ކިޔަވަމުންދާ ދަރިވަރުންނަށް ސްޓައިޕެންޑު ހިމެނޭ ގޮތަށް ދޭ 5 ފުރުޞަތާއި، އަންހެނުންގެ ޞިއްޙަތާ ގުޅުންހުރި ދާއިރާތަކުން އަންހެން ޑޮކްޓަރުން ތަމްރީނުކުރުމަށް ދޭ 5 ފުރުޞަތު ހިމެނެއެވެ.

ޒަކާތު ހައުސްއިން ބުނީ މި ސްކޮލަރޝިޕްގައި އިސްލާމީ ދާއިރާތަކުގެ ބޭރުން އެހެނިހެން ދާއިރާތަކުން ކިޔެވުމަށް އެދޭ ފަރާތްތަކަށް ޕުރޮޕޯސަލު ހުށަހެޅުމުގެ ފުރުޞަތު ވެސް ހުޅުވާލާފައިވާކަމަށެވެ. މި ގޮތަށް ހުށަހަޅާ އިރު، އެ ދާއިރާއަކުން ކިޔެވުމުން ދިވެހި އިސްލާމީ މުޖުތަމަޢުގެ ކުރިއެރުމަށާއި ތަރައްޤީއަށް ކުރާނެ ފައިދާ ސާފުކޮށް ބަޔާންކޮށްދޭންޖެހެއެވެ. 

ޒަކާތު ހައުސްއިން ބުނީ ސުންގަޑި އިތުރުކުރުމަށް ނިންމީ، ޝަރުތު ހަމަވާ ފަރާތްތަކުގެ ތެރެއިން މިހާތަނަށް ފޯމު ހުށަނާޅާ ތިބި ފަރާތްތަކަށް އިތުރު ފުރުސަތެއް ދިނުމަށް ކަމަށެވެ.