ނަސަންދުރައިން ފެށިގެން އިއްޒުއްދީން ފާލަމާ ހަމަޔަށް ބޮޑުތަކުރުފާނުމަގު ބޭނުންކުރަން ހުޅުމާލާއިރު، އެ ސަރަހައްދުގެ ޕާކިންނަށް ވަރަށްބޮޑު ލުއިފަސޭހަކަމެއް ލިބިގެންދާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
މާލޭގެ ބޮޑުތަކުރުފާނުމަގު މިހާރު ތަރައްޤީކުރަމުންދާ ސަރަހައްދަކީ ބާޒާރުމަތި ސަރަހައްދު ނަގާފައި ކާރޫބާރޫ އެންމެބޮޑު އެއް ސަރަހައްދެވެ. މި ސަރަހައްދު ތަރައްޤީކުރުމަށް އެމްޓީސީސީން ކުރަމުންގެންދާ މަސައްކަތުގެ ބޮޑު ބައެއް މިހާރު ވަނީ ނިމިފައެވެ. އެތަން ތަރައްޤީކުރުމަށް ފަށާފައިވާ މަސައްކަތްތަކާ ގުޅޭގޮތުން "ދަ ޕަލްސް" ޕޮޑްކާސްޓް ސިލްސިލާގެ 4 ވަނަ އެޕިސޯޑުގައި ވާހަކަފުޅުދައްކަވަމުން ރައީސް ޑރ.މުހައްމަދު މުއިއްޒު ވިދާޅުވީ، އިއްޒުއްދީން ފާލަމާ ހަމައިން ނަސަންދުރަ ސަރަހައްދާ ހަމަޔަށް ތައްރައްޤީކޮށް ނިމޭއިރު، އެ ސަރަހައްދުމަގު ތޮއްޖެހުމުގެ މައްސަލައަށް އެދެވޭފަދަ ހައްލެއް ލިބިގެންދާނޭކަމަށެވެ.
ރައީސް ވިދާޅުވީ، އެންމެބޮޑު އެއް ހައްލެއް ލިބިގެންދާނީ އެ ސަރަހައްދުގެ ޕާކްކުރުމުގެ މައްސަލައަށް ކަމަށެވެ. މީގެ ކުރިން މަގުގެ ދެފާރާތުގައި ޕާކްކުރުމާ ގުޅިގެން މަގު ތޮއްޖެހުމުގެ މައްސަލަ ކުރިމަތިވާކަން ފާހަގަކުރައްވަމުން ރައީސް ވިދާޅުވީ، އެ ސަރަހައްދުގެ ހިއްކާފައި އޮތް ޖާގައިން ޕާކްކުރުމަށް ޖާގަ ކަނޑައެޅިފައިވާކަމަށެވެ. އެގޮތުން 500 ސައިކަލް ޕާކްކުރުމުގެ ޖާގަ އޮންނާނޭކަމަށް ރައީސް ވިދާޅުވިއެވެ.
އިއްޒުއްދީން ފާލަމުން ނަސަންދުރައާ ހަމައަށް މިހާރު މިބައި ނިމެނީ. ނިމުނީމަ ދެން ވަރަށް ބޮޑަށް ފަސޭހަވެގެންދާނެ. ދެން އެއާއެކީގަ އަޅުގަނޑުމެން މި ނިންމާ ބައިގަ ކުރީގަ ޕާކްކުރި ކުރުން، މި ބަދަލުކުރަނީ ބޭރުން ހިއްކި ބަޔަށް
ރައީސް ޑރ.މުއިއްޒު
ރައީސް ވިދާޅުވީ ބޮޑުތަކުރުފާނުމަގު މިހާރު ތަރައްޤީކުރަމުންދާ ސަރަހައްދުގެ މަސައްކަތް ނިމުމާއެކު ދެން މަސައްކަތް ފެށޭނީ އެމްޕީއެލް ސަރަަހައްދުން ފެށިގެން ރަސްފަންނާ ދެމެދު އޮތް ސަރަހައްދު ކަމަށެވެ. މިއީ އެންމެބޮޑަށް މަގުގެ ގާތައް ހަލާކުވެފައި އޮތް ސަރަހައްދުކަން ފާހަގަކުރައްވަމުން ރައީސް ވިދާޅުވީ، މާލެ ވަށައި ތަރައްޤީކުރުމަށް ހަމަޖެހިފައިވާ ސަރައްދުގެ މަސައްކަތްތައް ނިމުމުން މާލެތެރޭގެ މަގުތަކުގެ ޓްރެފިކަށްވެސް ލުއިކަމެއް އަންނާނޭކަމަށެވެ.
ނަސަންދުރަ ހިމެނޭ ބޭރުމަގު ސަރަހައްދަކީ ބާޒާރުމަތި ނަގާފައި ބޮޑުތަކުރުފާނުމަގުގައި ދެން އެންމެ ބާރުބޮޑު ސަރަހައްދެވެ. މި ސަރަހައްދު މާލެ އަންނަ މީހުން ފޭބުމަށް ބޭނުންކުރުމުގެ އިތުރުން ގިނަ އޮފީސް އިމާރާތްތަކެއްވެސް ހުރެއެވެ.
މާލެ ވަށައިގެންވާ ބޮޑުތަކުރުފާނުމަގު ފުޅާކޮށް ތަރައްޤީކުރުމުގެ މަސައްކަތް ހަވާލުކޮށްފައިވަނީ އެމްޓީސީސިއާ އެވެ. މި މަސައްކަތްތަކުގެ ދަށުން އެންމެފުރަތަމަ މަސައްކަތް ކުރިއަށްގެންގޮސްފައިވަނީ ބާޒާރުމަތީ ސަރަހައްދެވެ. އެތަނުގެ މަސައްކަތް ނިންމައި މިދިޔަ ރޯދަމަސް ފެށުނުއިރު ވަނީ ތަރައްޤީކުރި ސަރަހައްދު އާއްމުކޮށް ބޭނުންކުރަން ފަށާފައެވެ. އެ ސަރަހައްދު މަގު ފުޅާކުރުމާއެކު ބާޒާރުމަތީ މަގު ތޮއްޖެހުމުގެ މަސައްލައަށް ވަނީ ހައްލެއް ލިބިގެންގޮސްފައެވެ.
Advertisement
This content is created and paid for by advertisers and does not involve Voice Journalists
