ޑޮލަރުގެ އަގު ތިރިކުރަން ބޭނުންނަމަ ސަރުކާރުން މަޝްރޫޢުތަކަށް ކުރާ ހޭދަ ހުއްޓާލަންޖެހޭކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ޑޮލަރުގެ އަގު ބޮޑުވަމުންދާ މައްސަލާގައި ރައީސް ނަޝީދު މިއަދު އެކްސްގައި ކުރެއްވި ޕޯސްޓެއްގައި ވަނީ ޑޮލަރު ލިބުން ދަތިވެފައި އޮތް މައްސަލާގައި ދެން ކަންތައް ކުރެވިދާނެ ގޮތެއް ހާމަކުރައްވާފައެވެ. ރައީސް ނަޝީދު ވިދާޅުވީ، ޑޮލަރުގެ އަގު ތިރި ނުވަނީސް ސަރުކާރުން އަސާސީ ހިދުމަތްތަކަށް ކުރާ ހަރަދު ފިޔަވައި ދެން އެއްވެސް ހަރަދެއް ކުރުން ރަނގަޅު ނޫންކަމަށް ވިދާޅުވެފައެވެ. 

ނަޝީދު ވިދާޅުވީ، އުމްރާނީ ހުރިހާ މަޝްރޫޢުތަކެއް މިހިނދަށް ހުއްޓާލަންޖެހޭ ކަމަށެވެ. އެގޮތުން މިވަގުތަށް އެންމެ ރަނގަޅީ ރަށްރަށުގައި ކުރިއަށްދާ އެފަދަ މަސައްކަތްތައް ރަށު ކައުންސިލާ ހަވާލުކޮށް، ކައުންސިލުން ކްރޮސް ސަބްސިޑީ އުސޫލުން އަގުދައްކައިގެން އެ މަސައްކަތްކުރިއަށް ގެންދިއުން ކަމަށެވެ. އޭރުން އެ މަސައްކަތްތައް ނިމިގެންދާނޭކަން ރައީސް ނަޝީދު ފާހަގަކުރެއްވިއެވެ.

ޑޮލަރުގެ މައްސަލާގައި ރައީސް ނަޝީދު އަނެއްކާވެސް ވާހަކަދައްކަވާފައިވާއިރު، މި މައްސަލާގައި މީގެ ކުރިން އެމަނިކްފާނު ވަނީ، ރާއްޖެއަށް އެންމެ ރަނގަޅުވާނީ އެމެރިކާ ޑޮލަރު ރޭޓް ކަނޑައަޅަން ބާޒާރުގެ އަގަށް ދޫކޮށްލުންކަމަށް ވިދާޅުވެފައެވެ. އެގޮތުން ޑޮލަރުގެ ހަމަ އަގަކީ ބާޒާރުގެ ތަބީއަތުން ކަނޑައެޅޭ ހަމަ އަގަށް ހެދުމަކީ އެންމެ ރަނގަޅު ގޮތްކަމަށް ނަޝީދު ވަނީ ވިދާޅުވެފައެވެ.

ފަހުގެ ތާރީހެއްގައި ޑޮލަރު ގަނެވިއްކާ ރަސްމީ ރޭޓަށް އެންމެ ފުރަތަމަ ބަދަލުގެނެސްފައިވަނީ ރައީސް ނަޝީދުގެ ވެރިކަމުގައި 2011 ވަނަ އަހަރުގެ އޭޕްރިލްމަހުގެ ފުރަތަމަ ހަފްތާގައެވެ. އޭރު ޑޮލަރުގެ ރަސްމީ ރޭޓް ކަމަށްވާ 12.80 ގައި ހުރި އަގު ވަނީ 15.42 އާއި 10.28 އާ ދެމެދުގެ އަގަކަށް ދޫކޮށްލާފައެވެ.

ނަމަވެސް އޭގެ ފަހުން މިއަދާހަމަޔަށް އާއިރުވެސް ޑޮލަރުގެ އަގު ދަށަށްގޮސްފައިނުވާކަން ފާހަގަކޮށްލެވެއެވެ. 

ރާއްޖެއަށް ކުރިމަތިވެފައިވާ ބޭރު ފައިސާގެ ދަތިކަމަށް ހައްލު ހޯދުމަށް އެމްއެމްއޭއިން މިދިޔަ އަހަރު ވަނީ ބޭރު ފައިސާގެ ގާނޫނެއް ވުޖޫދަށް ގެނެސް އެއަށް އަމަލުކުރަން ފަށާފައެވެ. އެ ޤާނޫނުގެ ދަށުން ބޭރު ފައިސާއިން އާމްދަނީ ލިބޭ ވިޔަފާރިތަކުގެ އާމްދަނީ ރާއްޖޭގެ ބޭންކުތަކަށް ޖަމާކުރުން ލާޒިމުކޮށް އެ އާމްދަނީން ވަކި މިންވަރެއް ބޭންކުތަކަށް މާރުކުރުން ވަނީ ލާޒިމްކޮށްފައެވެ.

ބޭރުފައިސާގެ ޤާނޫނަށް ގެނައި ބަދަލުތައް ތަންފީޒުކުރަން ފެށުމާއެކު މިހާރު ބޭންކުތަކަށް ޑޮލަރު ލިބޭ މިންވަރު އިތުރުވަމުން އަންނަކަމަށް މަރުކަޒީ ބޭންކުން ވަނީ ބުނެފައެވެ.