ޅ.ނައިފަރު ފަތިސް ޖަމްޢިއްޔާއިން އިސްނަގައިގެން ކުރިއަށްގެންދާ ކާމިޔާބު ޕްރޮގްރާމް "ވިޔަނަ ކޭމްޕް" ގެ 2026 ވަނަ އަހަރުގެ އެޑިޝަން، ނ. މާފަރުގައި ބޭއްވުމަށް ނިންމައިފިއެވެ.

މިއަހަރުގެ ކޭމްޕް ކުރިއަށް ގެންދިއުމަށް ހަމަޖެހިފައިވަނީ 06-08 އޯގަސްޓު 2026 އަށް ސޮސައިޓީ ފޯރ މާފަރު ޑިވެލޮޕްމަންޓާއި ގުޅިގެންނެވެ.

މި ޕްރޮގްރާމްގެ އެންމެ މުހިންމު އެއް އަމާޒަކީ ދީނީ ޢިލްމުވެރިންނާއި ތަޖުރިބާކާރު ފެސިލިޓޭޓަރުންގެ އެހީތެރިކަމާއެކު، މުޖުތަމަޢުއަށް ފައިދާހުރި ދީނީ އަދި ދުނިޔަވީ ލީޑަރޝިޕް ހުރި ޝަޚުޞިއްޔަތުތަކެއް އުފެއްދުމެވެ. އަދި ހަމައެހެންމެ، މިއީ ކުށުގެވެށިން ސަލާމަތްވެ އިސްލާޙުވެ އަލުން މުޖްތަމަޢުއަށް ނުކުންނަން ބޭނުންވާ ފަރާތްތަކަށްވެސް އަމާޒުކުރެވޭ ޕްރޮގްރާމެކެވެ. 

މިޕްރޮގްރާމްގެ ތެރެއިން އަމިއްލަ ނަފުސު އިސްލާހުކޮށް އަދި އެގޮތުގައި ދެމިހުރުމަށް ބޭނުންވާނެ ނަފުސުގެ އަގުތަކާއި، ލިޑަރޝިޕްއާއި ފޮލޯވަރޝިޕްގެ މުހިންމު ހުނަރުތަކާއި، އިމޯޝަނަލް އިންޓެލިޖެންސާއި، ތަފާތު މިޒާޖުގެ ތަފާތު ވިސްނުމުގެ މީހުން ދެނިގަނެ އެމީހުންނާއި މުޢާމަލާތްކުރުމުގައި ޢަމަލުކުރަންޖެހޭ ގޮތްތަކާއި، މުޖްތަމަޢު އިސްލާޙުކުރުމުގައި ފަރުދީ ޒިންމާފަދަ މުހިންމު ދާއިރާތަކުން ބައިވެރިންނަށް މަޢުލޫމާތު ފޯރުކޮށްދެވިގެން ދާނެކަމަށް ފަތިސް ޖަމްޢިއްޔާއިން މަޢުލޫމާތު ދެއްވައެވެ.

ޖުމްލަ 03 ދުވަހުގެ މުއްދަތަށް ކުރިއަށް ގެންދެވޭ މިކޭމްޕްގައި މުޅި ޖުމްލަ 18ބައިވެރިންނާއި 8 ފެސިލިޓޭޓަރުން ބައިވެރިވާ ގޮތަށް ވަނީ ހަމަޖެހިފައެވެ. މީގެ އިތުރުން މިކޭމްޕް އިތުރަށް ފުރިހަމަކުރުމަށްޓަކައި ކޭޕްމް ބާއްވާ ރަށުގެ އެކިއެކި ފަރާތްތަކުންވެސް ކޭމްޕްގެ ހަރަކާތްތަކުގައި ބައިވެރިވާނެއެވެ. މިއާއިއެކު ތަފާތު އެކި ޕްރޮގްރާމްތައް ކޭމްޕް ބާއްވާ ރަށުގެ ރައްޔިތުންނަށް އަމާޒުކޮށްވެސް ހިންގުމަށް ހަމަޖެހިފާވަކަށް ފަތިސް ޖަމްޢިއްޔާއިން މަޢުލޫމާތު ދެއްވައެވެ.

ޖުމްލަ ގޮތެއްގައި މިކޭމްޕްގައި ކުރިއަށް ގެންދާ ޙަރަކާތްތަކުގެ ތެރޭގައި ދީނީ ޢިލްމީވޯކްޝޮޕާއި، ދީނީ ދަރުސްތައް، ތަރުބަވީ ސެޝަންތައް، ދަރިވަރުންނަށް އަމާޒުކޮށް ހިންގޭ ސްޓަޑީ ކޭމްޕް ތަކާއި ސްކިލް ޑިވެލޮމްޕެންޓް ޕްރޮގްރާމްތައް، ޕްރޮފެޝަނަލް ޑިވެލޮޕްމެންޓް ސެޝަންތަކާއި ޓީމް ބިލްޑިންގ ހަރަކާތްތަކުގެ އިތުރުން ކުޅިވަރު ޙަރަކާތްތައްވެސް ހިމެނޭކަމަށް ފަތިސް ޖަމްޢިއްޔާއިން މަޢުލޫމާތު ދެއެވެ.

ވިޔަނަ ކޭމްޕް އެންމެ ފުރަތަމަ ބޭއްވިފައިވަނީ 2022 ވަނަ އަހަރު އުންމީދު ޖަމްޢިއްޔާއާއި ގުޅިގެން ރ. މީދޫގައެވެ. އަދި އޭގެފަހުން 2023 ވަނަ އަހަރު ލެންޓާން ޖަމްޢިއްޔާއާއި ގުޅިގެން ރ.ހުޅުދުއްފާރުގައި ކޭމްޕް ކުރިއަށް ގެންދެވިފައިވެއެވެ. 2024 ވަނަ އަހަރު އާރުލާ ސްޕޯޓްސް އެކަޑަމީއާއި ގުޅިގެން ށ.ފޯކައިދޫގައި މިކޭމްޕް ކުރިއަށް ގެންދެވުނުއިރު، 2025 ވަނަ އަހަރު މިކޭމްޕް ކުރިއަށް ގެންދިވިފައިވާނީ ސްމައިލް ޖަމްޢިއްޔާއާއި ގުޅިގެން ރ.ކިނޮޅޮހުގައެވެ. މިއީ މިޕްރޮގްރާމް މެދުކެނޑުމެއް ނެތި ކުރިއަށް ގެންދާތާ 5 ވަނަ އަހަރެވެ.