އަންނަ ބްރާސްފަތިދުވަހުގެ އެމްޑީޕީގެ މުޒާހަރާ ކުރިއަށްގެންދަން ބޭނުންވަނީ މާލެ ތެރޭގައި ރައްޔިތުންނަށް މުޒާހަރާގެ އަޑު އިވޭހިސާބުގައިކަމަށް އެމްޑީޕީން ބުނެފިއެވެ.

އެމްޑީޕީން ކުރިއަށްގެންދިއުމަށް ނިންމާފައިވާ މުޒާހަރާއާ ގުޅޭގޮތުން އެޕާޓީގެ ފަރާތުން މިއަދު ފުލުހުންގެ މަރުކަޒު ކައިރީ ނޫސްވެރިންނަށް މައުލޫމާތު ހިއްސާކުރަމުން އެމްޑީޕީ ސަރުކާރުގެ ފުރަތަމަ ޑިފެންސް މިނިސްޓަރު އަމީން ފައިސަލް ވިދާޅުވީ، ބޭނުން ވަނީ މަޖީދީމަގުން މުޒާހަރާ ކުރިއަށްގެންދަން ކަމަށެވެ.

އެމްޑީޕީން މުޒާހަރާ ކުރިއަށްގެންދަނީ ޤާނޫނީ އިމުގެ ތެރެއިން ހިޔާލްފާޅުކުރުމުގެ މިނިވަންކަމުގެ ދަށުންކަން ފާހަގަކުރައްވަމުން އަމީން ފައިސަލް ވިދާޅުވީ، މާލެ ވަށައިެގންވާ މަގުގައި މުޒާހަރާ ކުރުމުން އަޑުއިވޭނީ ހަމައެކަނި މުޒާހަރާގެ ބައިވެރިންނަށް ކަމަށެވެ. އޭގެ ބަދަލުގައި މަޖީދީމަގުން މުޒާހަރާ ކުރިއަށް ގެންގޮސްފިނަމަ ފާޅުކުރާ ޝުއޫރުގެ އަގު ރައްޔިތުންނަށް އިވޭނޭކަމަށާއި، ބޭނުމަކީ ވީހާވެސް ގިނަބަޔަކަށް ކަންބޮޑުވުންތައް އަޑުއިއްވުންކަމަށެވެ. 

އެމްޑީޕީން ބުނީ އެޕާޓީން އުޅެނީ ރީތި ހިނގާލުމެއް ބާއްވަން ނޫންކަމަށާއި، މިއީ ވަކި މަގްސަދެއް ހާސިލްކުރުމަށް ބައްވާ ކަންބޮޑުވުންތައް ހިއްސާކުރުމަށް ބާއްވާ މުޒާހަރާއެއް ކަމަށެވެ. އެގޮތުން މުޒާހަރާ ކުރިއަށްގެންދަން މަޖީދީމަގު ނޫން އެހެންމަގެއް ހިޔާރުކުރެވެން ނެތްކަމަށް އެޕާޓީން ވަނީ ބުނެފައެވެ.

ބާޒާރުގައި ތަކެތޫގެ އަގުތައް މައްޗަށްދާކަމަށް ބުނެ، އެމްޑީޕީން ބާއްވާ "ދަތިވެއްޖެ" މުޒާހަރާ ފެށުމަށް ހަމަޖައްސާފައިވަނީ އޮގަސްޓް 13 ވާ ބްރާސްފަތި ދުވަހުގެ ރޭ 20:30 ގައި ޒުވާނުންގެ މަރުކަޒު ސަރަހައްދުންނެވެ.