ރާއްޖެއަށް ކުރަމުންދާ ވިއްސާރައިގައި ރ. އިނގުރައިދޫއަށް ބޯކޮށް ވާރޭވެހި ރަށުގެ ބޮޑު ސަރަޙައްދެއްގައި ފެންބޮޑުވެ ގެދޮރަށް ފެންވަދެ ބޮޑެތި ގެއްލުންތަކެއް ލިބިއްޖެއެވެ.
ވޭތުވެދިޔަ ދެ ދުވަހުވެސް އެ ރަށަށް ވިއްސާރަކޮށްފައިވާއިރު، ޙާލަތު އެންމެ ބޮޑަށް ގޯސްވެފައިވަނީ މިއަދު ފަތިހުން ފެށިގެން މެދުކެނޑުމެއްނެތި ކުރަމުންދާ ވިއްސާރާގައެވެ. ބޯކޮށް ވާރޭ ވެހުމުގެ ސަބަބުން ރަށުގެ މަގުތަކުގައި ފެންބޮޑުވެ ގިނަ ގެތަކަށް ވަނީ ފެންވަދެފައެވެ.
މަގުތަކުގަޔާއި ގޭބިސީތަކުގެ އިތުރުން ސަރުކާރުގެ އިދާރާތަކުގައި ފެންބޮޑުވެ މުދަލަށް ބޮޑެތި ގެއްލުންތަކެއް ލިބިފައިވާއިރު، މިކަމުގެ ސަބަބުން ދަތުރުފަތުރުކުރުމަށާއި، މިސްކިތްތަކާއި އެހެނިހެން ތަންތަނަށް ދިއުމަށް ދަތިވެ، ޢާންމުންގެ ދިރިއުޅުމަށް ވަނީ ބޮޑެތި ހުރަސްތަކެއް އެޅިފައެވެ.
އިނގުރައިދޫ ކައުންސިލްގެ އިސްނެގުމުގެ މަތިން، ރަށުގެ އެކި މުއައްސަސާތަކާއި ރައްޔިތުން ގުޅިގެން ފެންހިންދުމާއި ގެއްލުން ކުޑަކުރުމުގެ މަސައްކަތް ވަގުތުން ވަނީ ފަށާފައެވެ.
އެގޮތުން މަގުތަކުގައި ޖަމާވެފައިވާ ފެންގަނޑު ހިންދުމަށްޓަކައި 4 ޕަންޕު ބޭނުންކޮށްގެން މެދުކެނޑުމެއްނެތި މަސައްކަތް ކުރަމުންދާއިރު، ފެންވަންނަމުންދިޔަ އަދި ފެންވަނުމުގެ ނުރައްކާ އޮތް 15 ގެއެއްގެ ދޮރޯށިތަކުގައި ވެލިބަސްތާ ޖަހައިގެން ރައްކާތެރިކަމުގެ ފިޔަވަޅުތައް ވަނީ އަޅާފައެވެ.
ރައްކާތެރިވުމުގެ ގޮތުން ވެލިބަސްތާ ޖެހުން..
ކުރިއަށް އޮތް ވަގުތުތަކުގައިވެސް މޫސުން އިތުރަށް ގޯސްވެ، ވާރޭ ވެހޭނެކަމަށް ލަފާކުރެވޭތީ، އިތުރު ގެތަކަށް ފެންވަދެ ޙާލަތު އިތުރަށް ގޯސްވެދާނެކަމުގެ ކަންބޮޑުވުން އެބައޮތެވެ.
އެހެންކަމުން، މި ޙާލަތުން އަރައިގަތުމަށްޓަކައި އިތުރު ފެންހިންދާ ޕަންޕާއި، ކާރިސާތަކުން ރައްކާތެރިވުމަށް ބޭނުންވާ ސާމާނު ހޯދުމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) ގެ އަވަސް އެހީތެރިކަމަށް މިވަގުތު ބޭނުންވާކަމަށް އިނގުރައިދޫ ކައުންސިލުން ބުނެއެވެ.
Advertisement
This content is created and paid for by advertisers and does not involve Voice Journalists
