އިންޑިޔާއާއި ރާއްޖޭގެ ވިޔަފާރިވެރިންގެ ޚާއްސަ ބައްދަލުވުމެއް މިއަދު ރާއްޖޭގައި ފަށައިފިއެވެ.

ހޮޓެލް ޖެންގެ ބޯލްރޫމްގައި ކުރިއަށްދާ މި ބައްދަލުވުން ފައްޓަވައިދެއްވީ އިކޮނޮމިކް މިނިސްޓަރ ފައްޔާޒް އިސްމާާއީލެވެ

މި ބައްދަލުވުން ފެއްޓުމުގެ ރަސްމިއްޔާތުގައި ވާހަކަފުޅު ދައްކަވަމުން ފައްޔާޒް ވިދާޅުވީ ރާއްޖެއަކީ އިންވެސްޓަރުންނަށް ފަހި މާހައުލެއް އޮތް ތަނަކަށް ހަދަންޖެހޭނެކަމަށާއި އެކަން ހާސިލްކުރުމަށް ފޮރިން އިންވެސްޓްމެންޓް ގާނޫނަށް ބަދަލުތަކެއް ގެނައުމުގެ މަސައްކަތް ކުރަމުން އަންނަ ކަމަށެވެ.

މިއަދުގެ ރަަސްމިއްޔާތުގައި އިންޑިޔާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރުވެސް ވަނީ ވާހަކަފުޅު ދައްކަވާފައެވެ.

ސަންޖޭ ވިދާޅުވީ ދެގައުމުގެ ވިޔަފާރިވެރިން ގުޅުވާލަދޭ ފާލަމެއްގެ ގޮތުގައި ރާއްޖޭގައި ހުންނަ އިންޑިޔާގެ އެމްބަސީ ހަރަކާާތްތެރިވާނެކަމަށެވެ.

މި ބައްދަލުވުމަކީ ކޮންފެޑަރޭޝަން އޮފް އިންޑިއަން އިސްޑަސްޓްރީ (ސީއައިއައި) ގެ މެންބަރުންނާއެކު ރާއްޖޭގެ ވިޔަފާރިތައް ބައިވެރިކޮށްގެން ބާއްވާ ވަށްމޭޒު މަޝްވަރާއެވެ.