މި އަހަރުގެ ތިމާވެށީގެ ދުވަހާ ދިމާކޮށް ފަސް މިލިއަން ގަސް އިންދުމުގެ ޕްރޮގްރާމް ފަށަން ނިންމަވައިފިއެވެ. ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ތިމާވެއްޓާ ބެހޭ ވަޒީރު ޠާރިގް އިބްރާހީމް ވިދާޅުވީ، މި ގަސް އިންދުމުގެ ޕްރޮގްރާމް އަންނަ މަހުގެ ފަސްވަނަ ދުވަހު ފަށާ، މީހުން ދިރިއުޅޭ ހުރިހާ ރަށަކާއި ރިސޯޓުތަކުގައި ވެސް ކުރިއަށް ގެންދާނެ ކަމަށެވެ.

މިއަދު ޠާލިބާނުންގެ މިނިސްޓްރީ އޮފް އިންޓިރިއަރ އެފެއާޒުން ބުނީ، އަފްޣާނިސްތާނުގެ އުތުރުގައި ބޯކޮށް ވާރޭވެހި އުދައެރުމުގެ ސަބަބުން 153 މީހުން މަރުވެފައިވާ ކަމަށެވެ. އަދި ބައެއް ނޫސްތަކުން ރިޕޯޓުކުރާ ގޮތުގައި، ފެން ބޮޑުވުމުގެ ސަބަބުން މިހާ ތަނަށް މަރުވި މީހުންގެ އަދަދު ވަނީ 160 އަށް އިތުރުވެފައެވެ. އަދި 117 މީހުން ވަނީ ޒަޚަމްވެފައިވާކަމަށްވެސް ލޯކަލް އޮފިޝަލުން ވިދާޅުވެއެވެ.

އެމްއެންޑީއެފްއިން ވިދާޅުވިގޮތުގައި ކުޑަކުދިންގެ ދުވަސް ފާހަގަކުރުމަށް މިރޭ 22:00 ގައި ހަވާއަރުވާނެއެވެ. ހަވާ އަރުވަން ހަމަޖެހިފައިވަނީ ކުޑަކުދިންގެ ދުވަހާ ގުޅިގެން ބާއްވާ "އުފާ ފެސްޓިވަލް" ނިންމާލުމުގެ ގޮތުން ހުޅުމާލޭ ސެންޓްރަލް ޕާކްގައެވެ. ސިފްކޯއިން ވިޔަފާރި އުސޫލުން ކުރިއަށްގެންދާ މި ހަރަކާތް ކުރިއަށް ގެންދަން ހަމަޖެހިފައިވަނީ 3 މިނެޓަށް ކަމަށްވެސް އެމްއެންޑިއެފުން ވިދާޅުވިއެވެ.

މިއަދު، ބަނގުރަލާއި މަސްތުވާތަކެތި ގެންގުޅެ ބޭނުންކުރި ކަމުގެ ތުހުމަތުގައި ހައްޔަރުކޮށްފައިވަނީ ހަ ދިވެހިންނެވެ. އެގޮތުން ހައްޔަރު ކޮށްފައިވަނީ ޢުމުރުން 19 އަހަރުގެ މީހަކާއި، 20 އަހަރުގެ ދެ މީހުންނާއި، 23 އަހަރުގެ މީހަކާއި، 25 އަހަރުގެ މީހެއްގެ އިތުރުން 28 އަހަރުގެ މީހެކެވެ. މީގެތެރެއިން 20 އަހަރުގެ އެކަކު ފިޔަވައި ދެން ތިބި އެންމެނަކީ ވެސް މަސްތުވާތަކެތީގެ ރިކޯޑު އޮންނަ މީހުންނެވެ. ހައްޔަރު ކުރި އެންމެންގެ ވެސް ކުޑަކަމުދާ ތަކެތި މަސްތުވާތަކެތީގެ ބާވަތަކަށް ވަނީ ޕޮޒިޓިވް ވެފައެވެ.

އިރުމަތީ ޤުދުސްގައި ހުންނަ އދ. ގެ މައި އޮފީހުގައި އިސްރާއީލުން ރޯކޮށްލުމާ ގުޅިގެން އެ އޮފީސް ވަގުތީ ގޮތުން ބަންދު ކޮށްފިއެވެ. ފަލަސްޠީނުގެ ޤުދުސްގައި ހުންނަ އެ އޮފީހުގެ ވެރިޔާ ފިލިޕް ލަޒާރިނީ ވިދާޅުވިގޮތުގައި، ފާއިތުވި ހަފްތާތަކުގައި ޔަހޫދީން ދިޔައީ އެ އޮފީހަށް އެކި ވަރުގެ ހަމަލާތައް ދެމުންނެވެ. އެގޮތުން އިއްޔެ އެ އޮފީހުގައި ދެ ފަހަރު އަލިފާން ރޯކޮށްލާފައިވާ ކަމަށްވެސް ފިލިޕް ލަޒާރިނީ ވިދާޅުވިއެވެ.

އިންޑިއާއިން ތަރައްޤީކުރަމުން އައި އުތުރުތިލަފަޅުގައި ކުރިން އިންޑިއާ ސިފައިން ތިބިކަން ލިޔެކިޔުންތަކުން ފެންނަކަމަށާއި، މިހާރު އެތަނުގައި އިންޑިއާ ސިފައިން ނެތްކަމަށް ދިފާއީ ވަޒީރު މުޙައްމަދު ޣައްސާން މައުމޫން ވިދާޅުވެއްޖެއެވެ.

ކުރީގެ ރައީސް އިބްރާހީމް މުހައްމަދު ޞާލިހުގެ ވެރިކަމުގައި، ސަރުކާރުގެ ހުއްދައަކާ ނުލައި ރާއްޖޭގައި ތިބި އިންޑިޔާ ސިފައިން، އެގައުމުން ހަދިޔާކުރި ހެލިކޮޕްޓަރ ދުއްވާފައިވާ ކަމަށް ދިފާޢީ ވަޒީރު ޣައްސާން މައުމޫން ވިދާޅުވެއްޖެއެވެ.

ދިވެހިރާއްޖޭގައި ތިބި ހުރިހާ އިންޑިއާ ސިފައިން ބޭލުމަށްފަހު، މިހާރު ރާއްޖެ ގެނެވިފައިވަނީ އިންޑިޔާގެ ހެލިކޮޕްޓަރު އުފެއްދި ކުންފުނީގެ މުވައްޒަފުން ކަމަށާ އެމީހުންގެ ސަބަބުން ދިވެހިރާއްޖޭގެ މިނިވަންކަމާއި އިސްތިގުލާލަށް ބުރޫ އަރާނެ ކަމަށް ގަބޫލު ނުކުރައްވާ ކަމަށް ޚާރިޒީ ވަޒީރު މޫސާ ޒަމީރު ވިދާޅުވެއްޖެއެވެ.