2023 ވަނަ އަހަރުގެ ރިޔާސީ އިންތިޚާބަށް 120 މިލިއަން ރުފިޔާގެ ބަޖެޓެއް އިލެކްޝަން ކޮމިޝަނުން ކަނޑައަޅައިފިއެވެ. 

އިލެކްޝަން ކޮމިޝަނުން ބުނީ އެއީ އިންތިޚާބުގައި ދެ ބުރަށް ވޯޓުލާން ޖެހޭނެކަމަށް ލަފާކޮށް ކަނޑައަޅާފައިވާ ބަޖެޓެއްކަމަށެވެ. 

އެގޮތުން އިންތިޚާބުގެ ފުރަތަމަ ބުރަށް 95 މިލިއަން ރުފިޔާ އަދި ދެވަނަ ރައުންޑަކަށް ދާން ޖެހިއްޖެ ނަމަ 25 މިލިއަން ރުފިޔާ އަރާނެކަމަށް މިހާރަށް ކަނޑައަޅާފައިވާ ބަޖެޓުގައި ވަނީ ހިމަނާފައެވެ. 

Advertisement

އިންތިޚާބުގައި އެންމެ ބޮޑު ޚަރަދެއް ކުރަން ޖެހޭނީ ދަތުރުތަކަށްކަަން ފާހަގަކޮށް އީސީއިން ބުނީ އަތޮޅުތެރެއާއި ރާއްޖެއިން ބޭރަށް ކުރަން ޖެހޭ ދަތުރުތަކަށް ޚަރަދުކުރުމަށް ބަޖެޓުގައި ހިމަނާފައިވާނެކަމެވެ. 

ކުރިއަށް އޮތް ރިޔާސީ އިންތިޚާބަށް އިލެކްޝަން ކޮމިޝަނުން ތައްޔާރުކޮށްފައިވާ ބަޖެޓު މިހާރު ވަނީ ފިނޭންސް މިނިސްޓްރީއަށްވެސް ފޮނުވާފައެވެ. 

ރައީސުލް ޖުމްހޫރިއްޔާ އައްޔަން ކުރުމަށް ކޮންމެ ފަސް އަހަރަކުން އެއް އޮންނަ ރިޔާސީ އިންތިޚާބަކީ ރާއްޖޭގައި ބާއްވާ އެންމެ ބޮޑު އިންތިޚާބެވެ. 

ކުރިއަށް އޮތް ރިޔާސީ އިންތިޚާބަށް ތައްޔާރުވުމުގެ މަސައްކަތް މިހާރު ސިޔާސީ ޕާޓީތަކުން ވަނީ ފަށާފައެވެ. 

އެގޮތުން ވާދަވެރި ސިޔާސީ ޕާޓީ ޕްރޮގްރެސިވް ޕާޓީ އޮފް މޯލްޑިވްސް(ޕީޕީއެމް) އިން ވަނީ ކުރިއަށް އޮތް ރިޔާސީ އިންތިޚާބުގައި އެ ޕާޓީގެ ރިޔާސީ ޓިކެޓު ޕާޓީގެ ރައީސް އަދި ނިމިދިޔަ ދައުރުގައި ވެރިކަން ކުރެއްވި ރައީސް އަބްދުﷲ ޔާމީން އަބްދުލްގައްޔޫމަށް އަރުވާފައެވެ. އެމަނިކުފާނު ވަނީ ޓިކެޓު ގަބޫލުފުޅުވެސް ކުރައްވާފައެވެ.