މިހާރު ކުރިއަށްދާ ދިވެހި ޕްރިމިއާ ލީގުގެ ކޮލިފިކޭޝަންގައި ކްލަބް ޓީނޭޖުން ދަ ގްރާންޑޭ މޮޅުވިޔަ ނުދީ ހިފަހައްޓާ ޕްރިމިއާ ލީގުގެ އުންމީދު އާކޮށްފިއެވެ.
ކޮލިފިކޭޝަންގެ ދެވަނަ މެޗުގައި ޓީނޭޖް އާއި ދަ ގްރާންޑޭ ކުޅުނު މެޗު އެއްވަރުވީ 2-2 ގެ ނަތީޖާއަކުންނެވެ. ގަލޮޅު ދަނޑުގައި ކުޅެވުނު މި މެޗު ފެށުމުގެ ކުރިން ބޯކޮށް ވާރޭ ވެހުމުގެ ސަބަބުން ދަނޑުގެ ހާލަތަށް އައި ބަދަލާއި އެކު ދެ ޓީމަށްވެސް ވަނީ މެޗުގެ ކުރީ ރަނގަޅު ކުޅުމެއް ދެއްކުމަށް ދަތި ވެފައެވެ.
މެޗުގެ ފުރަތަމަ ގޯލު ފެނިގެން ގޮސްފައިވަނީ މެޗުގެ 39 ވަނަ މިނަޓުގައެވެ. މި ގޯލު ޑަ ގްރާންޑޭ އަށް ކާމިޔާބު ކޮށްދީ މެޗުގެ ލީޑު އެ ޓީމަށް ނަގައިދިނީ އާޖެންޓީނާގެ ފޯވާޑް ހޫގޯ ރެޓަމާލް އެވެ. ހަމަހަމަ ކުޅުމެއް ފެނިގެން ދިޔަ މެޗުގެ ފުރަތަމަ ހާފު ނިމުމުގެ ކުރިން ޓިނޭޖަށް ވަނީ ނަތީޖާ ހަމަހަމަ ކުރުމަށް ފުރުސަތު ތަކެއް ލިބިފައެވެ. ނަމަވެސް އެ ފުރުސަތު ތަކުގެ ބޭނުން ނުހިފި ފުރަތަމަ ހާފު ނިމިގެން ގޮސްފައިވަނީ 1-0 އިން ދަ ގްރާންޑޭ ކުރީގަ އޮވެގެންނެވެ.
ދެވަނަ ހާފުގެ ކުރީ ކޮޅު ދަ ގްރާންޑޭ އިން ވަނީ ރަނގަޅު ކުޅުމެއް ދައްކާ ލީޑު ފުޅާ ކޮށްފައެވެ. އެގޮތުން މެޗުގެ 62 ވަނަ މިނަޓުގައި އެ ޓީމުގެ ދެވަނަ ގޯލު ކާމިޔާބު ކޮށްދިނީ އުސާމާގެ އެހީތެރި ކަމާއި އެކު ޝާހިރު އެވެ. ނަމަވެސް ދެ ގޯލުގެ ލީޑުގައި ދަ ގްރާންޑޭއަށް އޮވެ ވުނީ މިނަޓެއް ވަންދެންނެވެ. މެޗުގެ 63 ވަނަ މިނަޓުގައި ޓީނޭޖަށް މި ގޯލު ކާމިޔާބު ކޮށްދިނީ ބަދަލު ކުޅުންތެރިއެއް ގޮތުގައި ކުޅެން ނިކުތް ބަހުޖަތު އަބްދުލް އަޒީޒް އެވެ.
މި ގޯލާއި އެކު މެޗުގެ އޮއެވަރު ވަނީ ޓީނޭޖު ކޮޅަށް ބަދަލު ވެފައެވެ. އެގޮތުން ފުލުފުލުން ހަމަލާ ތަކެއް އުފައްދަމުން ގޮސް މެޗުގެ 85 ވަނަ މިނަޓުގައި ޓީނޭޖަށް ވަނީ ޕެނަލްޓީއެއްވެސް ލިބިފައެވެ. ނަމަވެސް ޓީނޭޖްގެ އަފީފީ ފޮނުވާލި ބޯޅަ ދިޔައީ ހުރަސް ދަނޑި މަތިން ބޭރަށެވެ. ޕެނަލްޓީ ނާކާމިޔާބު ވީނަމަވެސް އަފީފީ ވަނީ ހިއްވަރުކޮށް މެޗުގެ އިތުރު ވަގުތުގައި ޓީނޭޖަށް ނަތީޖާ އެއްވަރު ކޮށްދީފައެވެ.
ލީގު އުސޫލުން ކުރިއަށްދާ ޕްރިމިއާ ލީގުގެ ކޮލިފިކޭޝަންގެ ތާވަލުގެ ކުރީގައި މިހާރު އޮތީ ފުރަތަމަ މެޗު ކާމިޔާބު ކުރި ސަސް އެވެ. ފުލުގައި ދެވަނަ ޑިވިޝަންގެ ޗެމްޕިއަން ބުރު އޮތް އިރު ދަ ގްރާންޑޭ އަދި ޓީނޭޖު އޮތީ ޕޮއިންޓުގެ ގޮތުން އެއްވަރު ވެފައެވެ. ކޮލިފިކޭޝަންގެ ދެން އަންނަ ހޮނިހިރު ދުވަހު ޓީނޭޖާއި ސަސް ބައްދަލު ކުރާއިރު އެރޭ ދަ ގްރާންޑޭ ނިކުންނާނީ ބުރާއި ދެކޮޅަށެވެ.
Advertisement
This content is created and paid for by advertisers and does not involve Voice Journalists
