އެފް ސީ ބާސެލޯނާގެ ތަރި ޕިއޭ އެމެރިކް އޮބާމަޔަން ދިރިއުޅޭ ގެއިން ވައްކަން ކޮށްފިއެވެ.

އެ ސިޓީގެ ފުލުހުން ވަނީ މިކަން މީޑިއާ ތަކަށް ކަށަވަރު ކޮށްދީފައެވެ. އެގޮތުން  ބާސެލޯނާގެ ކައިރި އަވަށެއް ކަމަށްވާ ކަސްޓެލްޑެފެލްސްގައި ހުރި ގެއަކަށް ހަތިޔާރާއި އެކު ބަޔަކު ވަދެ އެގޭގައި ތިބި މީހުންނަށް ބިރުދައްކާ ވައްކަން ކޮށްފައިވާކަމަށް އެ އިދާރާއިން ވަނީ މައުލޫމާތު ދީފައެވެ. ނަމަވެސް ފުލުހުން ވަނީ ވައްކަން ކޮށްފައިވަނީ ކޮން ފަރާތެއްގެ ގެއަކުން ކަން ސިއްރުކޮށްފައެވެ.

މި މައްސަލައިގައި ބާސެލޯނާއިން ބުނެފައިވަނީ އޮބަމަޔާންގެ ގެއިން ވައްކަން ކޮށްފައިވާކަން ކަށަވަރުވެފައިވާ ކަމަށާއި ކުޅުންތެރިޔާގެ ހާލު ރަނގަޅު ކަމަށެވެ.

Advertisement

ސްޕެއިންގެ މީޑިއާ ތަކުން ރިޕޯޓުކޮށްފައިވާ ގޮތުގައި ބަޑި ހިފައިގެން ތިބި އެ މީހުން ވަދެ ބިރުދައްކާފައިވަނީ އޮބަމަޔަން އަދި އޭނާގެ އަންހެނުންނަށެވެ. ނަމަވެެސް މި މައްސަލައިގައި ވަގަށް ގެންގޮސްފައިވަނީ ކޮންކޮން ތަކެއްޗެއް ކަމާއި މިކަމާއި ގުޅިގެން އެއްވެސް މީހަކު ހައްޔަރުކޮށްފައިވާ ކަމުގެ މައުލޫމާތެއް ލިބިފައެއް ނުވެއެވެ.

މީގެ ކުރިން އިނގިރޭސި ވިލާތުގެ އާސެނަލްގެ ކެޕްޓަންކަން ކުރި އޮބަމަޔަން ގެ ގޭގައި ވައްކަމުގެ ހާދިސާ ހިނގާފައިވާއިރު ބާސެލޯނާ ދޫކޮށް އެނބުރި އިނގިރޭސި ވިލާތަށް އޭނާ ބަދަލުވާން އުޅޭ ކަމުގެ އަޑުތައް ވަނީ ފެތުރިފައެވެ.