ޓޮޓެންހަމް ހޮޓްސްޕާސް އިން ހެރީ ކޭންގެ ގޯލުން ފުލަމް ގެ މައްޗަށް ކުރިހޯދައިފިއެވެ.

ޓޮޓެންހަމްގެ ދަނޑުގައި ކުޅުނު މި މެޗު އެ ޓީމުން ކާމިޔާބު ކޮށްފައިވަނީ 1-2 ގެ ނަތީޖާއަކުންނެވެ.

މި މޮޅާއި އެކު ޓޮޓެންހަމް ވަނީ އެ ޓީމުން މި ސީޒަނުގެ ލީގުގައި ކުޅުނު 6 މެޗުގެ ތެރެއިން ހަތަރު މެޗު ކާމިޔާބު ކޮށް ދެ މެޗު އެއްވަރު ކޮށްފައެވެ.

މެޗަށްފަހު ވާހަކަ ދައްކަމުން ޓޮޓެންހަމްގެ ކޯޗު ކޮންޓޭ ބުނެފައިވަނީ އޭނާގެ ޓީމުގެ ކުޅުމާއި މެދު ހިންހަމަ ޖެހޭކަމަށާއި ވަކިން ހާއްސަކޮށް މި ސީޒަނަށް އެ ޓީމާއި ގުޅުނު ރިޗާލިސަންގެ ގުޅުން ފާހަގަ ކޮށްލެވޭ ކަމަށެވެ. ނަމަވެސް މިދިޔަ އަހަރު ދެވަނައަށް ލީގުގައި އެންމެ ގިނަ ގޯލު ޖެހި އެ ޓީމުގެ ތަރި ސަން މި ސީޒަނުގައި ގޯލު ޖެހުމަށް ނުކުޅެދިފައިވާ މައްސަލަވެސް އޭނާ ވަނީ ފާހަގަ ކޮށްފައެވެ.

މި މެޗުގައި އެންމެ ފުރަތަ ގޯލު ޖަހާ ލީޑު ނެގީވެސް ޓޮޓެންހަމްއިންނެވެ. މެޗުގެ 40 ވަނަ މިނަޓުގައި އެ ޓީމަށް މި ގޯލު ޖަހައިދީފައިވަނީ ހޮއިބިއާއެވެ. މެޗުގެ ދެވަނަ ހާފުގައި އެ ޓީމަށް ލީޑު ފުޅާ ކޮށްދިނީ އެ ޓީމުގެ ކެޕްޓަން ހެރީ ކޭންއެވެ. މި ގޯލަށްފަހު ފުލަމްއިން ވަނީ ކުޅުން ރަނގަޅުކޮށް ގޯލެއް ކާމިޔާބު ކޮށްފައެވެ. މެޗުގެ 83 ވަަނަ މިނެޓުގައި އެ ގޯލު ޖަހައިދީފައިވަނީ މިޓްރޮވިޗް އެވެ.

ޓޮޓެންހަމްގެ ރިޗާލިސަން އިތުރު ގޯލެއް ޖެހި ނަމަވެސް ވީއޭއާރުން ވަނީ އެއީ އޮފްސައިޑު ގޯލެއްގެ ގޮތުގައި ނިންމާފައެވެ.

އެ ޓީމުން ދެން ލީގުގައި ޗެމްޕިއަން ސިޓީއާއި ދެކޮޅަށް ނިކުންނަ އިރު އޭގެ ކުރިން ޗެމްޕިއަންސް ލީގުގައި އެ ޓޮޓެންހަމްއިން ފްރާންސްގެ މާސޭއާއި ދެކޮޅަށް ނިކުންނާނެއެވެ.

ރޭ ޕްރިމިއާ ލީގުގައި ބޯންމައުތުން 3-2 އިން ނޮޓިންހަމް ބަލިކުރިއިރު، ބްރެންޓްފޯޑުން ވަނީ 5-2 ބޮޑު ނަތީޖާއަކުން ލީޑްސް ބަލިކޮށްފައެވެ. މީގެ އިތުރުން 1-0 ގެ ނަތީޖާއަކުން ވުލްވްސް އިން ސައުތެމްޓަން ބަލިކުރި އިރު، ނިއުކާސަލް އާއި ކްރިސްޓަލް ޕެލެސް 0-0 އިން ވަނީ އެއްވަރު ވެފައެވެ.