ދިވެހި ނެވިން ރާއްޖޭގެ ސަރަހައްދު ކަނޑައަޅަނީ ފޯޅަވެއްސާއެކުގައި ކަމަށާއި އެއީ ރާއްޖޭގެ ބައެއް ނޫން ކަމަށް ބުނެވޭކަށް ނެތް ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) ގައި މިހާރު ކުރިއަށްދާ އަޑުއެހުންތަކުގައި ރާއްޖޭން އިމުގެ މައްސަލާގައި ސިޔާސަތު ބަދަލުކޮށް، އިމުގެ ބައެއް މޮރިޝަސްއަށް ދޫކޮށްލަން ނިންމީ ކަމަށް ތުހުމަތުވާން ފެށުމާއެކު، ސަރުކާރު ތެރެއިންނާއި ބޭރުން ބައެއް ސިޔާސީ ފަރާތްތަކުން ގެންދަނީ އެކަމަށް ފާޑު ވިދާޅުވަމުން އަންނަ އިރު، އދގައި ރާއްޖެއިން ތާއީދު ކުރާނެ ކަމަށް ރާއްޖެއިން ވަނީ ހާމަކޮށްފައެވެ.

އެކަމަށް ފާޑު ވިދާޅުވަމުން ނަޝީދު މިއަދު ކުރެއްވި ޓުވީޓެއްގައި ވިދާޅުވީ، މިވަގުތު ފޯޅަވައްސަކީ އެއްވެސް ގައުމެއްގެ ތަނެއް ނޫން ކަމަށެވެ. އެތަން މިވަގުތު ބަލަހައްޓަނީ އިނގިރޭސިން ކަމަށާއި އެކަމަކު، އެއީ ރާއްޖޭގެ ތަނެއް ނޫން ކަމަށް ބުނެވޭނެ އެއްވެސް ޖާގައެއް ނެތް ކަމަށްވެސް ނަޝީދު ވިދާޅުވިއެވެ.

"1560 ވަނަ އަހަރު 9 ވަނަ ހަސަން ރަސްގެފާނުގެ ސިޓީއެއްގައި އެރަދުން ބަޔާންކުރައްވަނީ ފޯޅަވަހީގެ ހަތް ރަށް އެއީ ރާއްޖޭގެ ރަށްރަށް ގޮތުގައި" އެމަނިކުފާނުގެ ޓުވީޓުގައި ވިދާޅުވިއެވެ.

އިހުޒަމާނުގައި ފޯޅަވައްސަކީ މީހުން ދިރިއުޅުނު ތިއާގި ރަށެއްކަން ފާހަގަކުރައްވާ ރައީސް ނަޝީދު ވިދާޅުވީ 1500 އަހަރުތަކަށް ފަހުން ކުރަހަމުން އައި ގިނަ ރާއްޖޭގެ ޗާޓުތަކުގައި އައްޑޫގެ ދެކުނުންވާ އަތޮޅަކީ ފޯޅަވަހި ކަމަށެވެ.

މިގޮތުން، ދިވެހި ނެވިން ރާއްޖޭގެ ސަރަހައްދު ބަޔާން ކުރަނީ ފޯޅަވައްސާއެކުގައި ކަމަށް އެމަނިކުފާނު ވިދާޅުވިއެވެ. އަދި ފޯޅަވައްސަކީ ރާއްޖޭގެ ތަނެއް ކަމަށް ބުނުމަށް ކިތަންމެ ތާރީހީ އަދި ސަގާފީ ހެކިތައް އެބަހުރި ކަމަށްވެސް އެމަނިކުފާނު ވިދާޅުވިއެވެ.