ފަހުން މާފުށި ޖަލުގައި ދާދިފަހުން ހިންގި އޮޕަރޭޝަނާއި ބޭންކް އޮފް މޯލްޑިވްސް އިން ސެކިޔުރިޓީ ވަރުގަދަކޮށް އެޅި ހަރުކަށި ފިޔަވަޅާއި އެކު ސްކޭމްގެ މައްސަލަތައް މަދުވެފައިވާ ކަމަށް ފުލުހުން ބުނެފިއެވެ.

ރޭ ރާއްޖެޓީވީ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ފުލުހުންގެ ޗީފް އިންސްޕެކްޓާ އޮފް ޕޮލިސް ރަޖްނީ ޝުއައިބު ވިދާޅުވީ ސްކޭމްގެ މައްސަލަތައް އަދިވެސް ހުށަހަޅާ ކަމަށާއި އެހެން ނަމަވެސް އެފަދަ މައްސަލަތައް ހުށަހަޅާ އަދަދު މަދުވެފައިވާ ކަމަށެވެ.

"ސްކޭމްގެ މައްސަލަތައް ވެސްް ހަމަ ހުށަހެޅޭ ، އެހެން ނަމަވެސް ދާދި ފަހުން އަޅުގަނޑުމެން ޖަލުގައި މި ހިންގި އޮޕަރޭޝަނާއި އަދި ބޭންކުގެ ސެކިއުރިޓީ އަށް ގެނެވުނު ބަދަލުތަކާ ގުޅިގެން، ސްކޭމްގެ މައްސަލަތައް ހުށަހެޅޭ އަދަދުތައް މަދުވާން ފަށާފައިވާކަން ހަމަ ފާހަގަކޮށްލަން،" ރަޖްނީ ވިދާޅުވި އެވެ.
އެހެންނަމަވެސް މިފަދަ ކަންކަމަށް އާންމުން ހޭލުންތެރިވެފައިވާ މިންވަރު އިތުރުވެފައިވާކަމަށާއި އަދިވެސް އިތުރަށް ސަމާލުކަން ދެވޭނެ ކަންކަން ހުރިކަމަށް ޝުއައިބު ވިދާޅުވިއެވެ.

Advertisement

މިއާއެކު ޝުއައިބު ވިދާޅުވީ ޑޮލަރު ވިއްކުމާއި މީހުންނަށް އޮޅުވާލައިގެން ޑޮލަރުގެ މުއަމަލާތްތައް ހިންގުން ފަދަ މައްސަލަތަކުގައި ބިދޭސީންގެ ބައިވެރިވުން ބޮޑުކަމަށާ، ވައްކަމާއި މަސްތުވާތަކެތީގެ މައްސަލަ ތަކުގައިވެސް ބިދޭސީންގެ ބައިވެރިވުން އޮންނަ ކަމަށެވެ. 

ސްކޭމް ލިންކްތަކުގެ ބޭނުންކޮށްގެން މީހުންގެ އީމެއިލް ހެކްކޮށް، އީމެއިލަށް އޯޓީޕީ ފޮނުވައިގެން ބޭންކް އެކައުންޓުން ފައިސާ ނެގުން ފަދަ މައްސަލަތައް ހައްލުކުރުމަށް ބޭންކް އޮފް މޯލްޑިވްސް އިން މިހާރު ވަނީ ބޭންކިން އެޕްގެ އޯޓީޕީ ހަމަ އެކަނި ފޯނަށް ލިބޭ ގޮތަށް އެ ނިޒާމު ބަދަލުކޮށްފަ އެވެ.