އިންޑިއާގެ މަސް ބޯޓުތަކަށް ލަންކާގެ ކަނޑުގެ ސަރަހައްދުން މަސް ބާނަން ހުއްދަދޭން ލަންކާ ސަރުކާރުން ހުށަހަޅާފައިވާތީ ލަންކާގެ މަސްވެރިން މުޒާހަރާ ކުރާނެ ކަމުގެ އިންޒާރު ދީފިއެވެ.

ލަންކާގެ ޖަފްނާ އަވަށުގައި މަސްވެރިންގެ ހައްގުގައި މަސައްކަތް ކުރަމުންދާ 40 އަށްވުރެ ގިނަ މަސްވެރިންގެ އެސޯސިއޭޝަނުން ބުނެފައިވާ ގޮތުގައި، ލަންކާގެ ކަނޑުން މަސްބޭނުމަށް އިންޑިއާ މަސްވެރިންނަށް ހުއްދަ ދިނުމަށް އެގައުމުގެ ފިޝަރީޒް މިނިސްޓަރު ޑޮގްލަސް ދޭވަނަންދާ، ހުށަހަޅާފައިވާ ހުށަހެޅުމަށް ޢަމަލުކޮށްފިނަމަ، އެމީހުންގެ މަސްބޯޓުތައް އެހެލައި މަގު މައްޗަށް ނެރެ މުޒާހަރާ ކުރާނެއެވެ. 

ޖަފްނާ އަވަށުގެ އެ މަސްވެރިންގެ ޖަމިއްޔާ ތަކުގައި ޖުމްލަ 8000 އެއްހާ މަސްވެރިން ހަރަކާތްތެރިވެއެވެ.

އެކަމާއި ގުޅިގެން އިތުރަށް މައުލޫމާތު ދެމުން، މަސްވެރިންގެ ޖަމިއްޔާގެ މީހަކު ބުނެފައިވާ ގޮތުގައި، އިންޑިޔާގެ މަސްވެރިންނަށް ލައިސެންސް ދޫކުރާ އުސޫލުގެ މަތިން ލަންކާގެ ކަނޑުން މަސްބޭނުމަށް ހުއްދަ ދިނުމާއި ގުޅިގެން ސަރުކާރުން ނިންމި ނިންމުމާއި ގުޅިގެން މަޝްވަރާ ކުރުމަށް އެގައުމުގެ ފިޝަރީޒް މިނިސްޓްރީއާއި އެކު ބައްދަލުވުމެއް ބޭއްވުމަށް ވަނީ ހަމަޖެހިފައެވެ. 

އަދި މީގެ އިތުރުން އިންޑިއާ މަސްވެރިންނަށް އެފަދަ ހުއްދައެއް ދިނުމަކީ އެމީހުން ކާންބޯން ކުރާ މަސައްކަތަށް ބޮޑު އަސަރެއް ކުރާނެ ކަމެއް ކަމަށާ، އެ ގައުމުގެ އިގްތިސާދަށްވެސް އޭގެ އެކަމުގެ ނޭދެވޭ އަސަރު ކުރާނެ ކަމަށް އެ ޖަމިއްޔާއިން ބުނެއެވެ. 

ހަމައެހެންމެ އެއީ އިންޑިއާ އާއި ލަންކާގެ ކަނޑުގެ ސަރަހައްދު ވަކިކުރާ އިންޓަނޭޝަނަލް މެރިޓައިމް ބައުންޑްރީ ލައިނަށްވެސް ކުރެވޭ ޖެއްސުމެއް ކަން ފާހަގަކޮށް އެފަރާތުން އިތުރަށް ބުނީ، މިފަަދަ ހުއްދައެއް ދީފިނަމަ ދެން ގަވާއިދާ ހިލާފަށް މަސްވެރިކަން ކުރާ އުޅަނދުތައް ދެނެގަންނަންވެސް އުނދަގޫ ވާނެ ކަމަށާ، އަދި ލައިސެންސް ދޫކުރުމުގެ ތެރެއިން ކޮރަޕްޝަންގެ އަމަލުތަކަށްވެސް އިތުރު ދޮރެއް ހުޅުވިގެންދާނެ ކަމަށެވެ. 

ލަންކާގެ މަސްވެރިން ދެކޭ ގޮތުގައި އިންޑިއާ ސަރުކާރުން ދަނީ މި ހުއްދަ ދޭން ނިންމުމަށް ލަންކާ ސަރުކާރަށް ފިއްތުންތައް ކުރިމަތިކުރަމުންނެވެ. އަދި ލަންކާގެ ރައީސް ރަނިލް ވިކްރެމްސިންހް އިންޑިއާއަށް ކުރައްވަން ހަމަޖެހިފައިވާ ދަތުރުފުޅުގައި މި ކަމާއި ގުޅޭގޮތުން މަޝްވަރާ ކުރާނެ ކަމަށް ލަންކާގެ ނޫސްތަކުގައި ބުނެފައިވެއެވެ.