ގިނަ ދުވަސްތަކެއް ވަންދެން ޕީޕީއެމުން ތަމްސީލު ކުރަމުންދިޔަ މަޖިލީހުގެ ގުރައިދޫ ދާއިރާގެ ގޮނޑި ފަސޭހަކަމާއެކު ސަރުކާރު ހިންގާ މައި ޕާޓީ އެމްޑީޕީގެ ކެންޑިޑޭޓު މުޙައްމަދު ޝާޒު ކާމިޔާބުކުރައްވައިފި އެވެ. 

މިހާތަނަށް އެ އިންތިޚާބުގައި ބަހައްޓާފައިވާ ވޯޓު ފޮށިތަކުގެ ނަތީޖާތަކަށް ބަލައި، ޝާޒު އިންތިޚާބު ކާމިޔާބުކޮށްފައިވާކަން އެމްޑީޕީގެ މަޖިލިސް މެމްބަރުންނާއި އިސް ބައެއް ވެރިން ވަނީ އިއުލާނުކުރައްވާފަ އެވެ. އެފަދައިން އިއުލާނުކޮށްފައިވަނީ ނަތީޖާތަކަށް ބަލާއިރު، އިންތިޚާބުގެ ވަގުތީ ނަތީޖާ އިއުލާނު ނުކުރި ނަމަވެސް އެ ގޮނޑި ޝާޒަށް ކަށަވަރުވާ ވަރަށް ފަހަރު ބޮޑުކޮށް އޭނާ ކުރީގައި އޮތުމުންނެވެ. 

މި އިންތިޚާބުގައި އެމްޑީޕީއާއި އެންމެ ގާތުން ވާދަކުރީ މީގެ ކުރިން އެ ދާއިރާގެ ގޮނޑި ތަމްސީލު ކުރަމުން ގެންދިޔަ ޕީޕީއެމް އެވެ. ޕީޕީއެމްގެ ފަރާތުން އެ އިންތިޚާބުގައި ވާދަކުރައްވާފައި ވަނީ މީގެ ކުރިން ގުރައިދޫ ދާއިރާގެ ގޮނޑި ތަމްސީލު ކުރެއްވި މަރުހޫމު އިބްރާހިމް ރިޒާގެ ކޮއްކޮ ހުސެއިން ރިޒާއެވެ. 

Advertisement

މިއަދުގެ ކުރިއަށް ދިޔަ ބައި-އިލެކްޝަންގެ ވަގުތީ ނަތީޖާ ދައްކާ ގޮތުން އިބްރާހިމް ޝާޒްއަށް ވަނީ ޖުމްލަ 1340 ވޯޓު ލިބިފައެވެ. އަދި ޝާޒްއާއި ވާދަ ކުރި ޕީޕީއެމްގެ ހުސެއިން ރިޒާ 1226 ވޯޓު ލިބިފައިވާއިރު، އެމްއެންޕީގެ ކެނޑިޑޭޓް އާރިފް އަށް ލިބިފައިވަނީ 128 ވޯޓެވެ.

މާލޭޭން ޝާޒްއަށް 162 ވޯޓު ލިބިފައިވާއިރު، ރިޒާއަށް މާލޭ ވޯޓު ފޮށިން ލިބިފައިވަނީ 150 ވޯޓެވެ. އަދި އާރިފް އަށް ލިބިފައިވަނީ 20 ވޯޓެވެ.

ގުރައިދޫގެ ދެ ފޮށިން ޝާޒްއަށް 419 ވޯޓު ލިބިފައިވާއިރު، ރިޒާ ވަނީ މިފޮށިން 429 ވޯޓު ހޯދާފައެވެ. މި ފޮށިން އާރިފް އަށް ލިބިފައިވަނީ 49 ވޯޓެވެ.

މާފުށީގެ ދެ ފޮށިން ރިޒާއަށް 504 ވޯޓު ލިބިފައިވާއިރު، ޕީޕީއެމްގެ ރިޒާއަށް ލިބިފައިވަނީ 405 ވޯޓެވެ. އަދި އާރިފް އަށް ލިބިފައިވަނީ 51 ވޯޓެވެ. ގުޅީގައި ބަހައްޓާފައިވާ ވޯޓު ފޮއްޓަށް ބަލާއިރު، މި ފޮށިން ޝާޒްއަށް 255 ވޯޓު ލިބިފައިވާއިރު، ރިޒާއަށް ލިބިފައިވަނީ 242 ވޯޓެވެ. އަދި އާރިފް އަށް ލިބިފައިވަނީ 16 ވޯޓެވެ.

ގުރައިދޫ ދާއިރާގެ ގޮނޑި އެމްޑީޕީން ކާމިޔާބުކޮށްފައިވަނީ ސަރުކާރުން އިންތިޚާބުގެ ތެރެއަށް ވަދެ ވަރަށް ބޮޑަށް ނުފޫޒު ފޯރުވައިގެން ކަމަށް އިދިކޮޅު ކޯލިޝަނުން ދަނީ ތުހުމަތު ކުރަމުންނެވެ. 

އެގޮތުން މިއަދު ވޯޓުލުމަށް ހަމަޖެހިފައިވާ ވަގުތު އެއް ގަޑިއިރު އިތުރުކުރީ އެހިސާބަށް ނަތީޖާތައް ދައްކާގޮތުން އެމްޑީޕީއަށް ކާމިޔާބު ނުކުރެވޭނެކަން ޔަގީން ކުރެވޭތީކަމަށް އިދިކޮޅުން ވަނީ ތުހުމަތުކޮށްފަ އެވެ. އަދި ވަގުތު އިތުރުކުރީ ސަރުކާރުން ނުފޫޒު ފޯރުވައިގެންކަމަށް އީސީގެ ރައީސް ފުއާދު ތައުފީގު ވިދާޅުވިކަމަށް އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވަނީ ވިދާޅުވެފަ އެވެ. 

އަނެއްކޮޅުން އެމްޑީޕީން ބުނަމުންދަނީ މި އިންތިޚާބު އެމްޑީޕީއަށް ކާމިޔާބު ކުރެވުމުގެ އަސްލަކީ ރައީސް ޞާލިހުގެ ތަރައްގީ ކަމަށެވެ. އެމަނިކުފާނަށް ރައްޔިތުން ކުރާ އިތުބާރާއި، އެމަނިކުފާނަށް އޮތް ތާއީދު ގުރައިދޫ އިންތިޚާބުން ވަރަށް ރަނގަޅަށް ފެނިގެން ގޮސްފައިވާކަމަށް އެމްޑީޕީގެ ބައެއް މެމްބަރުން ގެންދަވަނީ ވިދާޅުވަމުން ނެވެ.