މާލެ ސަރަހައްދުން ނުހިއްކާ ހުރި ފަޅުތަކުން ގޯތި ދޫކުރުމަށް ރައީސް އިބްރާހިމް މުހައްމަދު ޞާލިހުގެ ސަރުކާރުން ނިންމީ، އެއީ އެ ތަންތަނަކީ ކޮންމެ ވަގުތަކުވެސް ހިއްކާ ނިމިދާނެ ތަންތަނަށް ވާތީ ކަމަށް ޕްލޭނިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެ އެވެ.
ނިމިދިޔަ ސަރުކާރުން ގެދޮރުވެރިޔާ ސްކީމުގެ ފަށުން 4000 ފްލެޓު ބަހާލާފައިވާ ގޮތާއި ގުޅޭގޮތުން ސުވާލުކުރުމަށް ސްޓޭޓް މިނިސްޓްރީގެ އިސްވެރިން މިއަދު ވަނީ މަޖިލީހުގެ ޕެޓިޝަން ކޮމެޓީއަށް ހާޒިރުކޮށް ސުވާލުކޮށްފަ އެވެ.
މިއަދުގެ ބައްދަލުވުމުގައި ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވަނީ ނުހިއްކާ ހުރި ފަޅުތަކުން ވެރިކަން ނިމެން ކުޑަ ދުވަސްކޮޅަކަށް ވެފައިވަނިކޮށް ގޯތިތަކެއް ސަރުކާރުން ބަހާލީ ކޮން ސަބަބަާއި ހުރެތޯ ސުވާލު ކުރައްވާފައެވެ.
އޭގެ އިތުރުން ނުހިއްކާ ހުރި ތަންތަނުން ގޯތި ދޫކުރިއިރު، އެކަން ފަހުވަގުތަށް މަޑުނުކޮށް، ކޯވިޑް-19 ގެ ދުވަސްވަރުގައި ކުރިއަށް ނުގެންދެވެވީ ކޮން ސަބަބަކާއި ހުރެތޯ ވައްޑެ އެއްސެވި އެވެ.
އެ ސުވާލަށް ޖަވާބުދެއްވަމުން ކުރީގެ ޕްލޭނިން މިނިސްޓަރު އަކްރަމް ވިދާޅުވީ ސަރުކާރުން ގޯތި ދޫކުރީ އެ ތަންތަން ވަރަށް އަވަހަށް ހިއްކާ ނިމޭނެކަމަށް ބަލައިގެން ކަމަށެވެ.
އެގޮތުން ކޮންމެ ވަގުތަކު ވެސް ގޯތި ދިން ސަރަހައްދުތަކުން ބިން ހިއްކައި ނިމިދާނެ ކަމަށް އަކްރަމް ވިދާޅުވި އެވެ.
"އަޅުގަނޑުމެން ހިއްކަންވެގެން އެގްރިމެންޓުކޮށް ހިއްކަމުން އެދަނީ. ހަމަ ކޮންމެ އިރެއްގައި ވެސް ނިމިދާނެ. މޫސުމަށް ދިމާވާ ކަންކަމުން ލަސްވަމުން އެބަދޭ. ކޮންމެ ގޮތެއް ވިޔަސް މި ހުރިހާތަނެއް ހިއްކާ ނިމޭނެ އަޅުގަނޑުމެންގެ ޝެޑިއުލް އޮތް ގޮތުން ޖެނުއަރީގެ ނިޔަލަށް"
ކުރީގެ ސްޓޭޓް މިނިސްޓަރު އަކްރަމް ކަމާލުއްދީން
އަކްރަމް އިތުރަށް ވިދާޅުވީ ރައީސް އިބްރާހިމް މުހައްމަދު ޞާލިހުގެ ސަރުކާރުން ބިންވެރިޔާ ސްކީމުގެ ދަށުން ގޯތި ދޫކުރީ ވަރަށް މާތް މަގްސަދެއްގައި ކަމަށެވެ.
ފަހަރެއްގައި ވެސް އެއީ އަވަސް އަރުވާލައިގެން ކުރި ކަމެއް ނޫން ކަމަށާއި، އަދި އެއީ ނުހިއްކާ ހުރި ތަންތަނުން ބަޔަކަށް ގޯތިތަކެއް ދޫކުރުންކަމަށް ގަބޫލުވެސް ނުކުރައްވާ ކަމަށް އަކްރަމް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
