ރައީސް އިބްރާހިމް މުހައްމަދު ޞާލިހުގެ ސަރުކާރުން ގެދޮރުވެރިޔާ ސްކީމުގެ ފަށުން ފްލެޓު ދޫކުރުމުގެ މަސައްކަތް ވަގުތީގޮތުން ހުއްޓާލުމަށް އެންޓި ކޮރަޕްޝަން ކޮމިޝަން (އޭސީސީން) ޕްލޭނިން މިނިސްޓްރީއަށް އެންގީ، އެ އިދާރާއިން އެ މަސައްކަތް ނިންމާލި ފަހުން ކަމަށް ޕްލޭނިން މިނިސްޓްރީގެ ކުރީގެ ސްޓޭޓް މިނިސްޓަރު އަކުރަމް ކަމާލުއްދީން ވިދާޅުވެއްޖެ އެވެ.

އަކުރަމް މިފަދައިން ވިދާޅުވެފައި ވަނީ ނިމިދިޔަ ސަރުކާރުގެ ގެދިރުވެރިޔާ ސްކީމުގެ ދަށުން އެންމެ ފުރަތަމަ ފްލެޓުލިބޭ 4000 މީހުން ކަނޑައަޅާފައިވަނީ އުސޫލާއި ޚިލާފަށްކަމަށް ބަޔާންކޮށް މަޖިލީހުގެ ޕެޓިޝަން ކޮމެޓީއަށް ހުށައަޅާފައިވާ ޕެޓިޝަނާއި ގުޅިގެން ޕްލޭނިން މިނިސްޓްރީގައި އޭރު ތިއްބެވި އިސްވެރިން މަޖިލީހުގެ ޕެޓިޝަން ކޮމެޓީއަށް ހާޒިރުކޮށް މެމްބަރުން ކުރެއްވި ބައެއް ސުވާލުތަކަށް ޖަވާބުދެއްވަމުން ނެވެ. 

އަކްރަމް ވަނީ ގެދޮރުވެރިޔާ ސްކީމުގެ މަސައްކަތް ކުރިއަށް ގެންދިޔަ ގޮތާއި، އޭސީސީއާއި ކުރެވުނު މުއާމަލާތްތަކުގެ ތަފްސީލު ކޮމެޓީއާއި ހިއްސާކުރައްވާފަ އެވެ. 

އެގޮތުން އަކްރަމް ވިދާޅުވީ ޕްލޭނިން މިނިސްޓްރީން އެންމެ ފުރަތަމަ ނެރުނީ ގެދޮރުވެރިޔާ ސްކީމަށް ޝަރުތުހަމަވާ މީހުންގެ ލިސްޓަކާއި، ޝަރުތު ހަމަނުވާ މީހުންގެ ލިސްޓެއް ކަމަށެވެ. އަދި އެ ލިސްޓުގައި ޕޮއިންޓު ހިމަނާފައި ނުވާނެ ކަމަށާއި، އެހެން ނަމަވެސް ޝަކުވާއަށް ހުށައަޅާފައިވާނެ ކަމަށް އޭނާ ވިދާޅުވި އެވެ. 

ޕޮއިންޓު ހިމަނާ ފުރަތަމަ 4000 ފްލެޓު ލިބޭ މީހުންގެ ލިސްޓު މިދިޔަ މަހުގެ 4 ގައި އާންމުކޮށް، އެ ލިސްޓަށް ޝަކުވާ ހުށައެޅުމަށް ހުޅުވާލާ، ޝަކުވާ ހުށައެޅުމުގެ މުއްދަތު އުތުރުކުރުމާއި ހަމަޔަށް ވެސް އެ މަޝްރޫއު ކުރިއަށް ގެންދިއުން ވަގުތީގޮތުން ހުއްޓާލުމަށް އޭސީސީން އަންގާފައި ނުވާކަމަށް އަކްރަމް ވިދާޅުވި އެވެ. 

އޭނާ ވިދާޅުވީ ގެދޮރުވެރިޔާ ސްކީމާއި ގުޅޭގޮތުން އޭސީސީގެ ފުރަތަމަ ސިޓީއެއް ޕްލޭނިން މިނިސްޓްރީއަށް ލިބިފައިވަނީ ދާއިމީ ލިސްޓަށް ޝަކުވާ ހުށައެޅުމުގެ މުއްދަތު އިތުރުކުރި މަރުހަލާގައި ކަމަށެވެ. 

އޭސީސީގެ އެ ސިޓީގައި ވެސް ގެދޮރުވެރިޔާ ސްކީމުގެ މަސައްކަތް ހުއްޓާލުމަށް އަންގާފައި ނުވާކަމަށާއި، އޭސީސީން އެދިފައިވަނީ ޕޮއިންޓު ދީފައިވާ ގޮތާ މެދު ޝަކުވާ ހުށަހަޅަން ފުރުސަތު ދީ، އެ ޝަކުވާތައް ބެލުމަށް ފަހު ފްލެޓު ދިނުމުގެ ކަންކަން ކުރިއަށް ގެންދިއުމަށް ކަމަށް އަކްރަމް ފާހަގަކުރެއްވި އެވެ. 

އޭނާ ވިދާޅުވީ އެ ދާއިމީ ލިސްޓަށް ލިބިފައިވާ ޝަކުވާތަކަށް ބަލައި، ދާއިމީ ލިސްޓު އެކުލަވާލުމުގެ މަސައްކަތް ނޮވެމްބަރު މަހުގެ 15 ގައި ފަށާފައިވާއިރު، އެ ދުވަހުގެ މަސައްކަތް ނިންމާލުމާއި ހަމަޔަށް ވެސް އޭސީސީގެ ނައިބު ރައީސް، އަބްދުއްސަލާމްއާ ފްލެޓު ކޮމިޓިގެ މެމްބަރުން މުއާމަލާތް ކުރައްވަމުން ގޮސްފައިވާނެ ކަމަށެވެ. 

އެދުވަހާއި ހަމަޔަށް ވެސް ގްެދޮރުވެރިޔާ ސްކީމުގެ ދަށުން ފްލެޓު ދިނުމުގެ މަސައްކަތްތައް ހުއްޓާލުމަށް އޭސީސީން އަންގާފައި ނުވާކަމަށް އަކްރަމް ވިދާޅުވި އެވެ. 

އަކްރަމް ވިދާޅުވީ ފްލެޓު ދިނުމުގެ މަސައްކަތްތައް ހުއްޓާލުމަށް އޭސީސީގެ ސިޓީއެއް ލިބުނީ ފްލެޓު ލިސްޓަށް ހުށައެޅި ޝަކުވާތައް ބަލައި ނިންމާ ގުރުނަގައި ފްލެޓު ދިނުމުގެ މަސައްކަތް ނިންމާލިފަހުން އޭގެ އަނެއް ދުވަހުގައި ކަމަށެވެ. އަދި އޭސީސީން ފޮނުވި ސިޓީގައި "އަވަސް" ތައްގަނޑުވެސް ޖަހާފއި ނުވާކަން އޭނާ ފާހަގަކުރެއްވި އެވެ. 

އޭސީސީގެ ސިޓީ ލިބުމާއެކު، އެ މަސައްކަތް އެ އޮތް ހިސާބަށް ހުއްޓާލާފައިވާނެ ކަމަށާއި، އެހެން ނަމަވެސް އޭރު ޕްރޮސެސް ގާތްގަނޑަކަށް ހެން ނިމިފައިވާކަން އަކްރަމް ފާހަގަކުރެއްވި އެވެ.

ނިމިދިޔަ ސަރުކާރުން ގެދޮރުވެރިޔާ ސްކީމުގެ ދަށުން ފްލެޓުތައް ބަހާލާފައިވަނީ އުސޫލާއި ޚިލާފަށްކަން ފާހަގަކޮށް އޭސީސީއަށް 7000 އަށް ވުރެ ގިނަ ޝަކުވާ ހުށައަޅާފައިވާކަން ފާހަގަކޮށްލެވެ އެވެ. 

އޭގެ އިތުރުން ފްލެޓު ދޫކޮށްފައިވަނީ ސަރުކާރުން ބޭނުންވާ ވަކި ބަޔަކަށް ކަން ފާހަގަކޮށް އާންމުން ވަނީ ޕްލޭނިން މިނިސްޓްރީ ތެރެއަށް ވަދެ ނުރުހުން ވެސް ފާޅުކޮށްފަ އެވެ. 

ގެދޮރުވެރިޔާ ސްކީމުގެ ދަށުން ފްލެޓު ލިބޭ މީހުންގެ ލިސްޓު އަލުން ރިވިއު ކުރާނެކަމަށް މި ސަރުކާރުން ބުނި ނަމަވެސް، ރައީސުލްޖުމްހޫރިއްޔާ ޑރ މުހައްމަދު މުއިއްޒު އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވިދާޅުވެފައި ވަނީ އޮޅުވާލައިގެން، ނުވަތަ ނުބައި މައުލޫމާތެއް ދީގެން ލިބިފައިވާ ފްލެޓުނޫން ފްލެޓެއް އަތުނުލައްވާނެ ކަމަށެވެ. 

ސަރުކާރުން ގެޒެޓުކޮށްފައިވާ އެއްވެސް ލިސްޓެއް ބާތިލު ނުކުރައްވާނެ ކަމަށާއި، އެ ލިސްޓާއި އެއްގޮތަށް ފްލެޓުތައް ދެއްވާނެކަމުގެ ޔަގީންކަން ދެއްވާކަމަށް ވެސް ރައީސުލްޖުމްހޫރިއްޔާ ޑރ މުއިއްޒު ވިދާޅުވި އެވެ.