އަންނަ އަހަރުގެ ދައުލަތުގެ ބަޖެޓުގައި އިންޑައިރެކްޓު ސަބްސިޑީ އުވާލާ، ކޮންމެހެން ބޭނުން ޖެހިފައި ތިބި މީހުންނަށް އެކަނި ސަބްސިޑީ ދޭގޮތަށް ކަނޑައަޅައި ބަޖެޓު ދިރާސާ ކޮމެޓީން ބަޖެޓު ފާސްކޮށްފި އެވެ. 

އަންނަ އަހަރަށް ލަފާކޮށް ދައުލަތުން ބަޖެޓު ހުށައެޅިއިރު ފިނޭންސް މިނިސްޓްރީން ވަނީ ސަބްސިޑީ ދޭ އުސޫލަށް ބަދަލު ގެނައުމަށް ހުށައަޅާފަ އެވެ. 

އެގޮތުން މިހާރު ތެލާއި، ކަރަންޓާއި، ކާޑުގެ ބާވަތްތަކާއި، ފެނާއި ނަރުދަމާގެ ޚިދުމަތް ރައްޔިތުންނަށް ފޯރުކޮށްދިނުމުގައި ސަބްސިޑީ ދެނީ އެންމެ މުއްސަނދި މީހާއާއި އެންމެ ފަގީރު މީހާ ވެސް އެއްހަމައަކުން ކިރައިގެން ތަފާތު ކުރުމެއް ނެތިއެވެ. 

Advertisement

އެހެން ނަމަވެސް އިންޑައިރެކްޓު ސަބްސިޑީ އުވާލާ، ކޮންމެހެން ބޭނުން ޖެހިފައިވާ ފަރާތްތަކަށް ސަބްސިޑީ ދޭ އުސޫލަށް ބަދަލުކުރުމާއި އެކު، ދެން ސަބްސިޑީ ދޭނީ ދިރިއުޅުމުގެ ހާލަތަށް ބަލައި ދޭ ޑައިރެކްޓް ސަބްސިޑީގެ އުސޫލުގެ ތެރެއިން ނެވެ. 

ބުރާސްފަތި ދުވަހުގެރޭ ކުރިއަށް ދިޔަ ރައްޔިތުންގެ މަޖިލީހުގެ ބަޖެޓު ދިރާސާކުރާ ކޮމެޓީއަށް މަޖިލީހުގެ ދާންދޫ ދާއިރާގެ މެމްބަރު ޔައުގޫބު ވަނީ ފިނޭންސް މިނިސްޓްރީން ހުށައަޅާފައިވާ ގޮތަށް ޑައިރެކްޓް ސަބްސިޑީ ދިނުމަށް ހުށައަޅާފަ އެވެ.

މިގޮތަށް ސަބްސިޑީ ހުށައެޅުމުގެ ބޭނުމަކީ ދައުލަތުގެ ރިކަރެންޓު ޚަރަދުތައް ކުޑަކުރުންކަމަށް ފިނޭންސް މިނިސްޓަރީން ބަޔާންކޮށްފައިވާކަން ޔައުގޫބު ފާހަގަކުރެއްވި އެވެ. 

މިކަން މިގޮތަށް ފާސްވުމުން ސަރުކާރުން ކުންފުނިތަކަށް ސަބްސިޑީދިނުން ނިނުމަކަށް އަންނާނެ އެވެ. އަދި މި ނިންމުމާއެކު އިންޑައިރެކްޓު ސަބްސިޑީގެ ގޮތުގައި ހަމައެކަނި ދޭނީ މަސްވެރިންނަށް ދެމުންދާ ފިއުލް ސަބްސިޑީ އެވެ.