ޗާގޯސް މައްސަލަ ނިންމި ގޮތުގެ ސަބަބުން ދިވެހިރާއްޖޭގެ ދެކުނުގެ ކަނޑުން ގެއްލުނު ސަރަހައްދު ހޯދުމަށް އަންނަ އަހަރުގެ ބަޖެޓުގައި އިތުރު 10 މިލިއަން ހިމަނަން ބަޖެޓު ދިރާސާކުރާ ކޮމެޓީން ފާސްކޮށްފި އެވެ. 

ކަނޑުން ގެއްލުނު ސަރަހައްދު ހޯދުމަށް ބަޖެޓު އިތުރުކުރަން ފާސްކޮށްފައިވަނީ ބުރާސްފަތިދުވަހުގެ ރޭ ކުރިއަށް ގެންދިޔަ ބަޖެޓު ދިރާސާ ކުރާ ކޮމެޓީގެ ބައްދަލުވުމުގަ އެވެ. 

ބުރާސްފަތި ދުވަހުގެ ރޭ ކުރިއަށް ގެންދިޔަ ބަޖެޓު ދިރާސާކުރާ ކޮމެޓީއަށް ރައްޔިތުންގެ މަޖިލީހުގެ ދާންދޫ ދާއިރާގެ މެމްބަރު ޔައުގޫބު އަބްދުالله ވަނީ އެޓާނީ ޖެނެރަލް އޮފީހުގެ ބަޖެޓު އިތުރުކުރުމަށް ހުށައަޅުއްވާފަ އެވެ.

ސަރުކާރުން ހުށައަޅާފައިވާ ބަޖެޓުގެ ތަފްސީލުތައް ހިއްސާކުރައްވަމުން ޔައުގޫބު ވިދާޅުވީ ރާއްޖެއާއި މޮރިޝަސްގެ ކަނޑުގެ މައްސަލަ ހައްލުކުރުމަށް ކުރަން ޖެހޭ ގާނޫނީ މަސައްކަތްތައް ކުރުމަށް އޭޖީ އޮފީހުގެ ބަޖެޓަށް 10 މިލިއަން ރުފިޔާ އިތުރުކޮށްފައިވާ ކަމަށެވެ. 

ރާއްޖެ އާއި މޮރިޝަސްއާ ދެމެދު އޮންނަ ކަނޑުގެ ސަރަހައްދު ނުވަތަ އައްޑޫގެ ދެކުނު އޮންނަ ފުށު އަރާ ކަނޑުގެ ސަރަހައްދުގެ އިން މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އިން ވަކިކުރުމުން ރާޢްޖެ އަށް ގެއްލުނު ބައި ހޯދުމަކީ ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ވައުދުފުޅެކެވެ. 

އެކަމަކީ އެމަނިކުފާނުގެ ވެރިކަމުގެ ފުރަތަމަ 14 ހަފްތާގައި ފައްޓަވާނެކަމަށް ހިމަނާފައިވާ މުހިންމު މަސައްކަތެވެ. 

އެ މަސައްކަތް ވީހާވެސް އަވަހަށް ފެށުމަށް ބައެއް ސިޔާސީ ލީޑަރުން ވެސް ސަރުކާރަށް ގޮވާލާފައިވާއިރު، ބަޖެޓު ދިރާސާކުރާ ކޮމެޓީން ވަނީ ގެއްލުނު ކަނޑު ހޯދުމަށް ބަޖެޓުގައި 10 މިލިއަން ރުފިޔާ އިތުރަށް ހިމަނައިދީ އަންނަ އަހަރަށް ލަފާކޮށް ހުށައަޅާފައިވާ ބަޖެޓު ކޮމެޓީ މަރުހަލާގައި ފާސްކޮށްދީފަ އެވެ.