އއ.ރަސްދޫ މިސްކިތެއްގެ ވުޟޫ ކުރާ ބައިގައި ކުޑަކުއްޖަކަށް ގަނާކޮށް، އަނިޔާކުރި މައްސަލަ ތަހުގީގުކުރުމަށް ކަމާބެހޭ ފަރާތްތަކުގެ ޓީމެއް ރަސްދޫގައި ހަރަކާތްތެރިވާން ފަށައިފިއެވެ.

ޗީފް ސްޕްރިންޓެންޑެންޓް އޮފް ޕޮލިސް އަޙްމަދު ޝިފާން އެކްސްގައި ކުރެއްވި ޕޯސްޓެއްގައި ވިދާޅުވީ، މި މައްސަލަ އިތުރަށް ތަހުގީގު ކުރުމަށްޓަކައި ދިވެހި ފުލުހުންގެ ހިދުމަތާއި، ޑިޕާޓްމެންޓް އޮފް ޖުވެނައިލް ޖަސްޓިސް ގެ އިތުރުން މިނިސްޓްރީ އޮފް ފެމިލީ އެންޑް ސޯޝަލް ޑިވެލޮޕްމެންޓް ގެ ޓީމެއް ރަސްދޫގައި ހަރަކާތްތެރިވަމުންދާ ކަމަށެވެ.

މިނިސްޓްރީ އޮފް ފެމިލީ އެންޑް ސޯޝަލް ޑިވެލޮޕްމެންޓް އިން ވެސް ވަނީ ކުޑަ ކުއްޖަކަށް ބިރުދައްކައި އަނިޔާ ކުރާ މަންޒަރު ފެންނަ ވީޑިއޯއެއް އެ ވުޒާރާގެ ސަމާލުކަމަށް އައިސްފައިވާކަމަށާއި، މި މައްސަލަ އާއި ގުޅިގެން ކުރަން ޖެހޭ މަސައްކަތްތައް ފުލުހުންނާއި ގުޅިގެން ކުރަމުން އަންނަ ކަމަށް ބުނެފައެވެ.

ރަސްދޫގައި ރޭގައި ކުޑަ ކުއްޖަކަށް އަނިޔާކުރި މައްސަލަ ވަރަށް ސީރިއަސް މައްސަލައެއްގެ ގޮތުގައި ފުލުހުން ބަލަމުން އަންނައިރު، ފުލުހުން ވަނީ އަނިޔާކުރިކަމަށް ތުހުމަތު ކުރެވޭ 13 އަހަރާއި 14 އަހަރުގެ ކުއްޖަކު ދެނެގަނެފައެވެ.

މިކަމާއި ގުޅިގެން ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާން ވިދާޅުވީ، މި މައްސަލައިގައި  ޤާނޫނީ ގޮތުން ކުރަން ޖެހޭކަންކަން ކުރަމުން އަންނަ ކަމަށާއި، މިފަދަ ކަންކަން މުޖުތަމައުގައި ހިންގާ ފަރާތްތަކާއިމެދު އެޅެންއޮތް އެއްމެ ހަރުކަށި ފިޔަވަޅު އެޅިގެންދާނެ ކަމަށެވެ.

ސޯޝަލް މީޑިއާގައި ދައުރުވަމުންދާ ވީޑިއޯގައި ކުޑަ ކުއްޖާ އަށް އަނިޔާ ކުރާ މަންޒަރުތައް ފެންނައިރު، މިއީ ބަލަން އުދަނގޫ އަދި ކުޑަކުއްޖާގެ ކަރާމާތަށް އުނިކަން އަންނާނެ ފަދަ މަންޒަރުތަކަކަށް ވުމާއި އެކު މި ވީޑިއޯ އެކަކު އަނެކަކަށް ހިއްސާ ނުކުރުމަށާއި ސޯޝަލް މީޑިއާ ތެރޭގައި ދައުރު ނުކުރުމަށް ފުލުހުން ވަނީ އެދިފައެވެ.

ފުލުހުން ބުނީ އަނިޔާ ލިބުނު ކުއްޖާއަށް ބޭނުންވާ ސައިކޯ ސޯޝަލް ސަޕޯޓު ފޯރުކޮށްދިނުމުގެ މަސައްކަތް ކަމާބެހޭ އިދާރާތަކާއި ގުޅިގެން ކުރަމުން އަންނަ ކަމަށެވެ.

މި މައްސަލަ އާއި ގުޅިގެން، އެތައް ބަޔަކު އަންނަނީ މިކަމުގައި ޝާމިލްވާ ފަރާތްތަކަށް ހައްގު އަދަބު ދިނުމަށް ގޮވާލަމުންނެވެ.