ސްރީލަންކާގައި މިހާރު ވެރިކަންކުރާ ޖޭ.ވީ.ޕީ ވެރިކަމަށް އައި އިރު، އެޕާޓީގެވެސް އަދި ރައީސް އަނޫރަކުމާރަ ޑިސަނަޔަކަގެވެސް މާގިނަ ބައިނަލްއަގްވާމީ ރައްޓެހިންނެއް ނެތެވެ. އަދި އެޕާޓީގެ އިސް ސަފުގެ ގިނަ ބޭފުޅުންނަކީ ޑިޕްލޮމެޓިކް ކޮމިއުނިޓީއާއި އެހާ ގާތް ބައެއްވެސް ނޫނެވެ. އެއާއި ޚިލާފަށް، ލަންކާގައި ކުރިން ވެރިކަންކުރީ މުޅިންވެސް 'ޕޮލިޓިކަލް އެސްޓަބްލިޝްމެންޓް' ތެރެއިންކަމަށްވުމުން، ކުރީގައި ވެރިކަން ކުރެއްވި ބޭފުޅުންނާ ސަރަހައްދީ ބާރުތަކާ ދެމެދު ގާތް ގުޅުމެއް އޮތީ އުފެދިފައެވެ. އެހެންކަމުން ޖޭވީޕީ އަށް ވެރިކަންކުރަން އުނދަގޫވާނެކަމަށް ބައެއް މީހުން ދެކުނެވެ.

އެހެންނަމަވެސް ކަންކަން ވެގެން ދިޔައީ އެހެންނެއް ނޫނެވެ. ލަންކާގެ އައު ސަރުކާރުގެ ޚާރިޖީ ސިޔާސަތު ތަންފީޒުކުރަމުންދާ ގޮތަށް ދިރާސާކުރާ ފަރާތްތަކުން ތައުރީފްކުރެއެވެ. ވެރިކަމުގެ ކުރީކޮޅު އިންޑިއާ އަދި ޗައިނާއަށް ދަތުރުކުރައްވައި، ދެގައުމާއެކުވެސް ގާތް ގުޅުމެއް އުފެއްދެވިއެވެ. ވަކި ގައުމަކަށް ބަރޯސާވުމުގެ ބަދަލުގައި، ސަރަހައްދީ ހަގީގަތާއި ކުރިމަތިލައި، ނަމޫނާ ޚާރިޖީ ސިޔާސަތެއް ލަންކާއިން ތަންފީޒުކުރާކަމަށް ބައެއް ފަރާތްތަކުން ދެކެއެވެ.

ޗައިނާއާއެކުވެސް ގާތް ގުޅުމެއް ބާއްވަމުން، އެހެންނަމަވެސް ޖެހިގެން އުތުރަށް އޮތީ އިންޑިއާކަން ދަނެގެން ލަންކާއިން މަސައްކަތްކުރަން ފެށުން ފެނިގެންދަނީ އެގައުމަށް ރަނގަޅު ގޮތްތައް ވާތަނެވެ. ޖިއޮގްރަފީގެ ގޮތުން އިންޑިއާގެ ބުޑުގައި ލަންކާ އޮތުމާއެކު، އިންޑިއާއާއެކު އޮންނަ ގާތްގުޅުން ބަދަހިކުރަމުން ޗައިނާއިން ނުވަތަ ދުނިޔޭގެ އެހެން ބާރަކުންވެސް މާބޮޑަށް ޖައްސާނެ މައްސަލައެއް ނެތެވެ. އެހެނެއްކަމަކު، މާ ދުރުގައި އޮތް ޗައިނާ ނުވަތަ ޕާކިސްތާނާއެކު އޮންނަ ގުޅުން ލަންކާއިން ބަދަހިކޮށް، އިންޑިއާ ފެޔަށް ޖައްސަން އުޅޭނަމަ، ނިކުންނާނެ ކިތަންމެ މައްސަލައެއް އޮންނާނެއެވެ.

Advertisement

ޖޭވީޕީގެ ޖެނެރަލް ސެކްރެޓަރީ ތިލްވިން ސިލްވާ ވިދާޅުވީ އިންޑިއާއާއެކު ހަދަމުންދަނީ ދެގައުމަށްވެސް ފައިދާވާ އެއްބަސްވުންތައް ކަމަށާއި، ސަރުކާރަށް ފާޑުކިޔާ ފަރާތްތަކަށް އެ އެއްބަސްވުންތަކުން ގައުމަށް ގެއްލުންވާ މައްދާއެއް ދެއްކުމަށް ދައުވަތު ދެއްވާކަމަށެވެ. ތިލްވިން ސިލްވާ މިހެން ވިދާޅުވީ ލަންކާގެ ލޯކަލް ކައުންސިލް އިންތިޚާބަށް ތައްޔާރުވުމަށް ޖޭވީޕީއިން ބޭއްވި ބައްދަލުވުމެއްގައި ވާހަކަ ދައްކަވަމުންނެވެ. އަދި މިހާރުގެ ސަރުކާރުން މިވީ ކުޑަ ދުވަސްކޮޅުގެ ތެރޭގައި ހޯދި ބައިނަލްއަގްވާމީ ސަޕޯޓަކީ އެހެން އެއްވެސް ސަރުކާރަކަށް ނުކުރެވުނު ކަމެއްކަމަށްވެސް އޭނާ ވިދާޅުވިއެވެ.

"ކުރިން އެމީހުން ފާޑުކީ އަހަރެމެންގެ ބައިނަލްއަގްވާމީ ސަޕޯޓަރުންނެއް ނެތްކަމަށް ބުނެ. މިހާރު އެމީހުންނަށް ބައިނަލްއަގްވާމީ ސަޕޯޓު ހޯދުނު ވަރަށްވުރެވެސް މާބޮޑަށް ސަޕޯޓް ހޯދީމަ އެބުނަނީ ގައުމަށް ބޭވަފާތެރިވީއޭ"، އިދިކޮޅު ފަރާތްތަކުގެ ފާޑުކިޔުންތަކަށް ރައްދު ދެއްވަމުން ތިލްވިން ސިލްވާ ވިދާޅުވިއެވެ.

ލަންކާ އޮތީ އިންވެސްޓްމަންޓާއި، އެހީތެރިކަމަށާއި، ރަހުމަތްތެރިކަމަށް ހުޅުވާލެވިފައެވެ. އަދި އެކަން އެންމެ ބޮޑަށް ދަނެގެން، ލަންކާއާއެކު އޮތް ގުޅުން ބަދަހިކުރަން އެންމެ ބޮޑަށް އުޅޭތަންވެސް ފެންނަނީ އިންޑިއާއެވެ. އެހެން ގައުމެއްގެ އެހީތެރިކަމަށްވުރެ ބޮޑަށް ލަންކާއިން ހޯދާތަންވެސް އަދި ބޭނުނުންވާތަންވެސް ފެންނަނީ އިންޑިއާގެ އެހީއެވެ.