ރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ އަހަރީ ރިޕޯޓުތައް އާންމު ނުކޮށް އަހަރަކަށްވުރެ ގިނަ ދުވަސްވެފައިވާތީ، އެ ބޯޑު ޖަވާބުދާރީ ކުރުވުމަށް ގޮވާލައި ރައްޔިތުންގެ މަޖިލީހަށް ޕެޓިޝަނެއް ހުށަހަޅައިފިއެވެ.
މި ޕެޓިޝަން ހުށެހެޅީ މިއަދު، ސޯޝަލް މީޑީއާގެ އެކްޓިވިސްޓެއް ކަމުގައިވާ މިދުއަމް ސައުދުއެވެ.
އެގޮތުން، ސަރުކާރު ހިއްސާވާ ކުންފުނިތަކުގެ ބެލެނިވެރި ފަރާތުގެ ހައިސިއްޔަތުން ޕީސީބީން އަދާ ކުރަން ޖެހޭ ޒިންމާތައް އަދާނުކުރާކަމަށް އެ ޕެޓިޝަނުގައި ވަނީ ބަޔާންކޮށްފައެވެ. އަދި ޕީސީބީން އާންމު ކުރަން ޖެހޭ ސަރުކާރު ހިއްސާވާ ކުންފުނިތަކުގެ ކުއާޓާލީ އަދި އަހަރީ ރިޕޯޓުތައް ހިއްސާ ކުރުން ލަސްކަން އެ ޕެޓިޝަނުގައި ވަނީ ފާހަގަކޮށްފައެވެ. އެހެން ކަމުން، މި އަހަރުގެ ފުރަތަމަ ކުއާރޓާ ނިމި ދެވަނަ ކުއާޓާރ ހިނގަމުން ދާއިރު ޕީސީބީއިން އެންމެ ފަހުން ނެރެފައިވާ ކުއާރޓާލީ ރިޕޯޓަކީ 2025 ވަނަ އަހަރުގެ ފުރަތަމަ ރިޕޯޓު ކަންވެސް ޕެޓިޝަނުގައި ވަނީ ފާހަގަކޮށްފައެވެ.
ރިޕޯޓުތައް ހިއްސާކުރުމުގައި 12 މަސް ނުވަތަ އެއް އަހަރުގެ ގެޕެއް އައުމަކީ ސަރުކާރު ހިއްސާވާ ކުންފުނިތަކާ ބެހޭ އެންމޭ އެންމެ ފަހުގެ މައުލޫމާތު ރައްޔިތުންނަށް ނުލިބޭ ސަބަބެއްކަން ޕެޓިޝަނުގައި ވަނީ ބަޔާންކޮށްފައެވެ. އެ ގޮތުން، އެއީ ސަރުކާރު ހިއްސާވާ ކުންފުނިތައް ޒިންމާދާރު ކުރުވަން އެޅޭ ހުރަހެއްކަން އޭގައި ވަނީ ފާހަގަކޮށްފައެވެ. އަދި އެއީ، ކުންފުނިތަކުން އުސޫލުތަކާއި ހިލާފަށް ހިންގާ އަދި ހިންގަމުންދާ ކޮރަޕްޝަނަށް މަގުފަހިވާ ކަންކަން މާ ލަސްވުމުގެ ސަބަބުން ނުބަލާ ދޫކޮށްލަން ދެވޭ ފުރުސަތެއްކަން ވެސް ޕެޓިޝަނުގައި ވަނީ ބުނެފައެވެ.
ޕެޓިޝަނުން އެދިލައްވައިފައިވާ ހައްލަކީ، ކަމާއި ބެހޭ ކޮމިޓީއަށް ހާޒިރުކޮށް ޕީސީބީން ރިޕޯޓުތައް ހިއްސާކޮށް، ލަސްވާ ސަބަބުތައް ސާފުކޮށް ހޯދާ ބެލުމާއި އެކަންކަމުގެ މައްޗަށް ރިޕޯޓެއް އެކުލަވާލާ އެކަންކަން ހައްލު ކުރަން މަޖިލީހުން ކުރަން ޖެހޭ ކަންކަން ކަނޑައަޅައި ކުރުމެވެ.
Advertisement
This content is created and paid for by advertisers and does not involve Voice Journalists
